Found a tool called aksharamukha to convert samskritham text to other languages. Here is mooka pancha shathi in malayalam script. Soon I will put it together as a book. For the time being you can cut and paste from here into word if you want and format to your liking. This is the version my Sadguru Govinda Damodara Swamigal taught me and I am teaching others.
ആര്യാശതകം
കാരണപരചിദ്രൂപാ കാഞ്ചീപുരസീമ്നി കാമപീഠഗതാ .
കാചന വിഹരതി കരുണാ കാശ്മീരസ്തബകകോമലാംഗലതാ .. 1
കഞ്ചന കാഞ്ചീനിലയം കരധൃതകോദണ്ഡബാണസൃണിപാശം .
കഠിനസ്തനഭരനമ്രം കൈവല്യാനന്ദകന്ദമവലംബേ .. 2
ചിന്തിതഫലപരിപോഷണചിന്താമണിരേവ കാഞ്ചിനിലയാ മേ .
ചിരതരസുചരിതസുലഭാ ചിത്തം ശിശിരയതു ചിത്സുഖാധാരാ .. 3
കുടിലകചം കഠിനകുചം കുന്ദസ്മിതകാന്തി കുങ്കുമച്ഛായം .
കുരുതേ വിഹൃതിം കാഞ്ച്യാം കുലപർവതസാർവഭൗമസർവസ്വം .. 4
പഞ്ചശരശാസ്ത്രബോധനപരമാചാര്യേണ ദൃഷ്ടിപാതേന .
കാഞ്ചീസീമ്നി കുമാരീ കാചന മോഹയതി കാമജേതാരം .. 5
പരയാ കാഞ്ചീപുരയാ പർവതപര്യായപീനകുചഭരയാ .
പരതന്ത്രാ വയമനയാ പങ്കജസബ്രഹ്മചാരിലോചനയാ .. 6
ഐശ്വര്യമിന്ദുമൗലേരൈകാത്മ്യപ്രകൃതി കാഞ്ചിമധ്യഗതം .
ഐന്ദവകിശോരശേഖരമൈദമ്പര്യം ചകാസ്തി നിഗമാനാം .. 7
ശ്രിതകമ്പാസീമാനം ശിഥിലിതപരമശിവധൈര്യമഹിമാനം .
കലയേ പാടലിമാനം കഞ്ചന കഞ്ചുകിതഭുവനഭൂമാനം .. 8
ആദൃതകാഞ്ചീനിലയാമാദ്യാമാരൂഢയൗവനാടോപാം .
ആഗമവതംസകലികാമാനന്ദാദ്വൈതകന്ദലീം വന്ദേ .. 9
തുംഗാഭിരാമകുചഭരശൃംഗാരിതമാശ്രയാമി കാഞ്ചിഗതം .
ഗംഗാധരപരതന്ത്രം ശൃംഗാരാദ്വൈതതന്ത്രസിദ്ധാന്തം .. 10
കാഞ്ചീരത്നവിഭൂഷാം കാമപി കന്ദർപസൂതികാപാംഗീം .
പരമാം കലാമുപാസേ പരശിവവാമാങ്കപീഠികാസീനാം .. 11
കമ്പാതീരചരാണാം കരുണാകോരകിതദൃഷ്ടിപാതാനാം .
കേലീവനം മനോ മേ കേഷാഞ്ചിദ്ഭവതു ചിദ്വിലാസാനാം .. 12
ആമ്രതരുമൂലവസതേരാദിമപുരുഷസ്യ നയനപീയൂഷം .
ആരബ്ധയൗവനോത്സവമാമ്നായരഹസ്യമന്തരവലംബേ .. 13
അധികാഞ്ചി പരമയോഗിഭിരാദിമപരപീഠസീമ്നി ദൃശ്യേന .
അനുബദ്ധം മമ മാനസമരുണിമസർവസ്വസമ്പ്രദായേന .. 14
അങ്കിതശങ്കരദേഹാമങ്കുരിതോരോജകങ്കണാശ്ലേഷൈഃ .
അധികാഞ്ചി നിത്യതരുണീമദ്രാക്ഷം കാഞ്ചിദദ്ഭുതാം ബാലാം .. 15
മധുരധനുഷാ മഹീധരജനുഷാ നന്ദാമി സുരഭിബാണജുഷാ .
ചിദ്വപുഷാ കാഞ്ചിപുരേ കേലിജുഷാ ബന്ധുജീവകാന്തിമുഷാ .. 16
മധുരസ്മിതേന രമതേ മാംസലകുചഭാരമന്ദഗമനേന .
മധ്യേകാഞ്ചി മനോ മേ മനസിജസാമ്രാജ്യഗർവബീജേന .. 17
ധരണിമയീം തരണിമയീം പവനമയീം ഗഗനദഹനഹോതൃമയീം .
അംബുമയീമിന്ദുമയീമംബാമനുകമ്പമാദിമാമീക്ഷേ .. 18
ലീനസ്ഥിതി മുനിഹൃദയേ ധ്യാനസ്തിമിതം തപസ്യദുപകമ്പം .
പീനസ്തനഭരമീഡേ മീനധ്വജതന്ത്രപരമതാത്പര്യം .. 19
ശ്വേതാ മന്ഥരഹസിതേ ശാതാ മധ്യേ ച വാങ്മനോsതീതാ .
ശീതാ ലോചനപാതേ സ്ഫീതാ കുചസീമ്നി ശാശ്വതീ മാതാ .. 20
പുരതഃ കദാ നു കരവൈ പുരവൈരിവിമർദപുലകിതാംഗലതാം .
പുനതീം കാഞ്ചീദേശം പുഷ്പായുധവീര്യസരസപരിപാടീം .. 21
പുണ്യാ കാsപി പുരന്ധ്രീ പുംഖിതകന്ദർപസമ്പദാ വപുഷാ .
പുലിനചരീ കമ്പായാഃ പുരമഥനം പുലകനിചുലിതം കുരുതേ .. 22
തനിമാദ്വൈതവലഗ്നം തരുണാരുണസമ്പ്രദായതനുലേഖം .
തടസീമനി കമ്പായാസ്തരുണിമസർവസ്വമാദ്യമദ്രാക്ഷം .. 23
പൗഷ്ടികകർമവിപാകം പൗഷ്പശരം സവിധസീമ്നി കമ്പായാഃ .
അദ്രാക്ഷമാത്തയൗവനമഭ്യുദയം കഞ്ചിദർധശശിമൗലേ: .. 24
സംശ്രിതകാഞ്ചീദേശേ സരസിജദൗർഭാഗ്യജാഗ്രദുത്തംസേ .
സംവിന്മയേ വിലീയേ സാരസ്വതപുരുഷകാരസാമ്രാജ്യേ .. 25
മോദിതമധുകരവിശിഖം സ്വാദിമസമുദായസാരകോദണ്ഡം .
ആദൃതകാഞ്ചീഖേലനമാദിമമാരുണ്യഭേദമാകലയേ .. 26
ഉരരീകൃതകാഞ്ചിപുരാമുപനിഷദരവിന്ദകുഹരമധുധാരാം .
ഉന്നമ്രസ്തനകലശീമുത്സവലഹരീമുപാസ്മഹേ ശംഭോഃ .. 27
ഏണശിശുദീർഘലോചനമേനഃപരിപന്ഥി സന്തതം ഭജതാം .
ഏകാമ്രനാഥജീവിതമേവമ്പദദൂരമേകമവലംബേ .. 28
സ്മയമാനമുഖം കാഞ്ചീമയമാനം കമപി ദേവതാഭേദം .
ദയമാനം വീക്ഷ്യ മുഹുർവയമാനന്ദാമൃതാംബുധൗ മഗ്നാഃ .. 29
കുതുകജുഷി കാഞ്ചിദേശേ കുമുദതപോരാശിപാകശേഖരിതേ .
കുരുതേ മനോവിഹാരം കുലഗിരിപരിബൃഢകുലൈകമണിദീപേ .. 30
വീക്ഷേമഹി കാഞ്ചിപുരേ വിപുലസ്തനകലശഗരിമപരവശിതം .
വിദ്രുമസഹചരദേഹം വിഭ്രമസമവായസാരസന്നാഹം .. 31
കുരുവിന്ദഗോത്രഗാത്രം കൂലചരം കമപി നൗമി കമ്പായാഃ .
കൂലങ്കഷകുചകുംഭം കുസുമായുധവീര്യസാരസംരംഭം .. 32
കുഡ്മലിതകുചകിശോരൈഃ കുർവാണൈഃ കാഞ്ചിദേശസൗഹാർദം .
കുങ്കുമശോണൈർനിചിതം കുശലപഥം ശംഭുസുകൃതസംഭാരൈഃ .. 33
അങ്കിതകചേന കേനചിദന്ധങ്കരണൗഷധേന കമലാനാം .
അന്തഃപുരേണ ശംഭോരലങ്ക്രിയാ കാsപി കൽപ്യതേ കാഞ്ച്യാം .. 34
ഊരീകരോമി സന്തതമൂഷ്മലഫാലേന ലാലിതം പുംസാ .
ഉപകമ്പമുചിതഖേലനമുർവീധരവംശസമ്പദുന്മേഷം .. 35
അങ്കുരിതസ്തനകോരകമങ്കാലങ്കാരമേകചൂതപതേഃ .
ആലോകേമഹി കോമലമാഗമസംലാപസാരയാഥാർഥ്യം .. 36
പുഞ്ജിതകരുണമുദഞ്ചിതശിഞ്ജിതമണികാഞ്ചി കിമപി കാഞ്ചിപുരേ .
മഞ്ജരിതമൃദുലഹാസം പിഞ്ജരതനുരുചി പിനാകിമൂലധനം .. 37
ലോലഹൃദയോsസ്മി ശംഭോർലോചനയുഗലേന ലേഹ്യമാനായാം .
ലാലിതപരമശിവായാം ലാവണ്യാമൃതതരംഗമാലായാം .. 38
മധുകരസഹചരചികുരൈർമദനാഗമസമയദീക്ഷിതകടാക്ഷൈഃ .
മണ്ഡിതകമ്പാതീരൈർമംഗലകന്ദൈർമമാസ്തു സാരൂപ്യം .. 39
വദനാരവിന്ദവക്ഷോവാമാങ്കതടീവശംവദീഭൂതാ .
പുരുഷത്രിതയേ ത്രേധാ പുരന്ധ്രിരൂപാ ത്വമേവ കാമാക്ഷി .. 40
ബാധാകരീം ഭവാബ്ധേരാധാരാദ്യംബുജേഷു വിചരന്തീം .
ആധാരീകൃതകാഞ്ചീം ബോധാമൃതവീചിമേവ വിമൃശാമഃ .. 41
കലയാമ്യന്തഃ ശശധരകലയാsങ്കിതമൗലിമമലചിദ്വലയാം .
അലയാമാഗമപീഠീനിലയാം വലയാങ്കസുന്ദരീമംബാം .. 42
ശർവാദിപരമസാധകഗുർവാനീതായ കാമപീഠജുഷേ .
സർവാകൃതയേ ശോണിമഗർവായാസ്മൈ സമർപ്യതേ ഹൃദയം .. 43
സമയാ സാന്ധ്യമയൂഖൈഃ സമയാ ബുദ്ധ്യാ സദൈവ ശീലിതയാ .
ഉമയാ കാഞ്ചീരതയാ ന മയാ ലഭ്യേത കിം നു താദാത്മ്യം .. 44
ജന്തോസ്തവ പദപൂജനസന്തോഷതരംഗിതസ്യ കാമാക്ഷി .
ബന്ധോ യദി ഭവതി പുനഃ സിന്ധോരംഭസ്സു ബംഭ്രമീതി ശിലാ .. 45
കുണ്ഡലി കുമാരി കുടിലേ ചണ്ഡി ചരാചരസവിത്രി ചാമുണ്ഡേ .
ഗുണിനി ഗുഹാരിണി ഗുഹ്യേ ഗുരുമൂർതേ ത്വാം നമാമി കാമാക്ഷി .. 46
അഭിദാകൃതിർഭിദാകൃതിരചിദാകൃതിരപി ചിദാകൃതിർമാതഃ .
അനഹന്താ ത്വമഹന്താ ഭ്രമയസി കാമാക്ഷി ശാശ്വതീ വിശ്വം .. 47
ശിവ ശിവ പശ്യന്തി സമം ശ്രീകാമാക്ഷീകടാക്ഷിതാഃ പുരുഷാഃ .
വിപിനം ഭവനമമിത്രം മിത്രം ലോഷ്ടം ച യുവതിബിംബോഷ്ഠം .. 48
കാമപരിപന്ഥികാമിനി കാമേശ്വരി കാമപീഠമധ്യഗതേ .
കാമദുഘാ ഭവ കമലേ കാമകലേ കാമകോടി കാമാക്ഷി .. 49
മധ്യേഹൃദയം മധ്യേനിടിലം മധ്യേശിരോsപി വാസ്തവ്യാം .
ചണ്ഡകരശക്രകാർമുകചന്ദ്രസമാഭാം നമാമി കാമാക്ഷീം .. 50
അധികാഞ്ചി കേലിലോലൈരഖിലാഗമയന്ത്രതന്ത്രമന്ത്രമയൈഃ .
അതിശീതം മമ മാനസമസമശരദ്രോഹിജീവനോപായൈഃ .. 51
നന്ദതി മമ ഹൃദി കാചന മന്ദിരയന്തീ നിരന്തരം കാഞ്ചീം .
ഇന്ദുരവിമണ്ഡലകുചാ ബിന്ദുവിയന്നാദപരിണതാ തരുണീ .. 52
ശമ്പാലതാസവർണം സമ്പാദയിതും ഭവജ്വരചികിത്സാം .
ലിമ്പാമി മനസി കിഞ്ചന കമ്പാതടരോഹി സിദ്ധഭൈഷജ്യം .. 53
അനുമിതകുചകാഠിന്യാമധിവക്ഷഃപീഠമംഗജന്മരിപോഃ .
ആനന്ദദാം ഭജേ താമാനംഗബ്രഹ്മതത്വബോധസിരാം .. 54
ഐക്ഷിഷി പാശാങ്കുശധരഹസ്താന്തം വിസ്മയാർഹവൃത്താന്തം .
അധികാഞ്ചി നിഗമവാചാം സിദ്ധാന്തം ശൂലപാണിശുദ്ധാന്തം .. 55
ആഹിതവിലാസഭംഗീമാബ്രഹ്മസ്തംബശിൽപകൽപനയാ .
ആശ്രിതകാഞ്ചീമതുലാമാദ്യാം വിസ്ഫൂർതിമാദ്രിയേ വിദ്യാം .. 56
മൂകോsപി ജടിലദുർഗതിശോകോsപി സ്മരതി യഃ ക്ഷണം ഭവതീം .
ഏകോ ഭവതി സ ജന്തുർലോകോത്തരകീർതിരേവ കാമാക്ഷി .. 57
പഞ്ചദശവർണരൂപം കഞ്ചന കാഞ്ചീവിഹാരധൗരേയം .
പഞ്ചശരീയം ശംഭോർവഞ്ചനവൈദഗ്ധ്യമൂലമവലംബേ .. 58
പരിണതിമതീം ചതുർധാ പദവീം സുധിയാം സമേത്യ സൗഷുമ്നീം .
പഞ്ചാശദർണകൽപിതപദശിൽപാം ത്വാം നമാമി കാമാക്ഷി .. 59
ആദിക്ഷന്മമ ഗുരുരാഡാദിക്ഷാന്താക്ഷരാത്മികാം വിദ്യാം .
സ്വാദിഷ്ഠചാപദണ്ഡാം നേദിഷ്ഠാമേവ കാമപീഠഗതാം .. 60
തുഷ്യാമി ഹർഷിതസ്മരശാസനയാ കാഞ്ചിപുരകൃതാസനയാ .
സ്വാസനയാ സകലജഗദ്ഭാസനയാ കലിതശംബരാസനയാ .. 61
പ്രേമവതീ കമ്പായാം സ്ഥേമവതീ യതിമനസ്സു ഭൂമവതീ .
സാമവതീ നിത്യഗിരാ സോമവതീ ശിരസി ഭാതി ഹൈമവതീ .. 62
കൗതുകിനാ കമ്പായാം കൗസുമചാപേന കീലിതേനാന്തഃ .
കുലദൈവതേന മഹതാ കുഡ്മലമുദ്രാം ധുനോതു നഃപ്രതിഭാ .. 63
യൂനാ കേനാപി മിലദ്ദേഹാ സ്വാഹാസഹായതിലകേന .
സഹകാരമൂലദേശേ സംവിദ്രൂപാ കുടുംബിനീ രമതേ .. 64
കുസുമശരഗർവസമ്പത്കോശഗൃഹം ഭാതി കാഞ്ചിദേശഗതം .
സ്ഥാപിതമസ്മിൻകഥമപി ഗോപിതമന്തർമയാ മനോരത്നം .. 65
ദഗ്ധഷഡധ്വാരണ്യം ദരദലിതകുസുംഭസംഭൃതാരുണ്യം .
കലയേ നവതാരുണ്യം കമ്പാതടസീമ്നി കിമപി കാരുണ്യം .. 66
അധികാഞ്ചി വർധമാനാമതുലാം കരവാണി പാരണാമക്ഷ്ണോഃ .
ആനന്ദപാകഭേദാമരുണിമപരിണാമഗർവപല്ലവിതാം .. 67
ബാണസൃണിപാശകാർമുകപാണിമമും കമപി കാമപീഠഗതം .
ഏണധരകോണചൂഡം ശോണിമപരിപാകഭേദമാകലയേ .. 68
കിം വാ ഫലതി മമാന്യൈർബിംബാധരചുംബിമന്ദഹാസമുഖീ .
സംബാധകരീ തമസാമംബാ ജാഗർതി മനസി കാമാക്ഷീ .. 69
മഞ്ചേ സദാശിവമയേ പരശിവമയലലിതപൗഷ്പപര്യങ്കേ .
അധിചക്രമധ്യമാസ്തേ കാമാക്ഷീ നാമ കിമപി മമ ഭാഗ്യം .. 70
രക്ഷ്യോsസ്മി കാമപീഠീലാസികയാ ഘനകൃപാംബുരാശികയാ .
ശ്രുതിയുവതികുന്തലീമണിമാലികയാ തുഹിനശൈലബാലികയാ .. 71
ലീയേ പുരഹരജായേ മായേ തവ തരുണപല്ലവച്ഛായേ .
ചരണേ ചന്ദ്രാഭരണേ കാഞ്ചീശരണേ നതാർതിസംഹരണേ .. 72
മൂർതിമതി മുക്തിബീജേ മൂർധ്നി സ്തബകിതചകോരസാമ്രാജ്യേ .
മോദിതകമ്പാകൂലേ മുഹുർമുഹുർമനസി മുമുദിഷാsസ്മാകം .. 73
വേദമയീം നാദമയീം ബിന്ദുമയീം പരപദോദ്യദിന്ദുമയീം .
മന്ത്രമയീം തന്ത്രമയീം പ്രകൃതിമയീം നൗമി വിശ്വവികൃതിമയീം .. 74
പുരമഥനപുണ്യകോടീ പുഞ്ജിതകവിലോകസൂക്തിരസധാടീ .
മനസി മമ കാമകോടീ വിഹരതു കരുണാവിപാകപരിപാടീ .. 75
കുടിലം ചടുലം പൃഥുലം മൃദുലം കചനയനജഘനചരണേഷു .
അവലോകിതമവലംബിതമധികമ്പാതടമമേയമസ്മാഭിഃ .. 76
പ്രത്യങ്മുഖ്യാ ദൃഷ്ട്യാ പ്രസാദദീപാങ്കുരേണ കാമാക്ഷ്യാഃ .
പശ്യാമി നിസ്തുലമഹോ പചേലിമം കമപി പരശിവോല്ലാസം .. 77
വിദ്യേ വിധാതൃവിഷയേ കാത്യായനി കാലി കാമകോടികലേ .
ഭാരതി ഭൈരവി ഭദ്രേ ശാകിനി ശാംഭവി ശിവേ സ്തുവേ ഭവതീം .. 78
മാലിനി മഹേശചാലിനി കാഞ്ചീഖേലിനി വിപക്ഷകാലിനി തേ .
ശൂലിനി വിദ്രുമശാലിനി സുരജനപാലിനി കപാലിനി നമോsസ്തു .. 79
ദേശിക ഇതി കിം ശങ്കേ തത്താദൃക്തവ നു തരുണിമോന്മേഷഃ .
കാമാക്ഷി ശൂലപാണേഃ കാമാഗമസമയയജ്ഞദീക്ഷായാം .. 80
വേതണ്ഡകുംഭഡംബരവൈതണ്ഡികകുചഭരാർതമധ്യായ .
കുങ്കുമരുചേ നമസ്യാം ശങ്കരനയനാമൃതായ രചയാമഃ .. 81
അധികാഞ്ചിതമണികാഞ്ചനകാഞ്ചീമധികാഞ്ചി കാഞ്ചിദദ്രാക്ഷം .
അവനതജനാനുകമ്പാമനുകമ്പാകൂലമസ്മദനുകൂലാം .. 82
പരിചിതകമ്പാതീരം പർവതരാജന്യസുകൃതസന്നാഹം .
പരഗുരുകൃപയാ വീക്ഷേ പരമശിവോത്സംഗമംഗലാഭരണം .. 83
ദഗ്ധമദനസ്യ ശംഭോഃ പ്രഥീയസീം ബ്രഹ്മചര്യവൈദഗ്ധീം .
തവ ദേവി തരുണിമശ്രീചതുരിമപാകോ ന ചക്ഷമേ മാതഃ .. 84
മദജലതമാലപത്രാ വസനിതപത്രാ കരാദൃതഖനിത്രാ .
വിഹരതി പുലിന്ദയോഷാ ഗുഞ്ജാഭൂഷാ ഫണീന്ദ്രകൃതവേഷാ .. 85
അങ്കേ ശുകിനീ ഗീതേ കൗതുകിനീ പരിസരേ ച ഗായകിനീ .
ജയസി സവിധേsംബ ഭൈരവമണ്ഡലിനീ ശ്രവസി ശംഖകുൻഡലിനീ .. 86
പ്രണതജനതാപവർഗാ കൃതബഹുസർഗാ സസിംഹസംസർഗാ .
കാമാക്ഷി മുദിതഭർഗാ ഹതരിപുവർഗാ ത്വമേവ സാ ദുർഗാ .. 87
ശ്രവണചലദ്വേതണ്ഡാ സമരോദ്ദണ്ഡാ ധുതാസുരശിഖണ്ഡാ .
ദേവി കലിതാന്ത്രഷണ്ഡാ ധൃതനരമുണ്ഡാ ത്വമേവ ചാമുണ്ഡാ .. 88
ഉർവീധരേന്ദ്രകന്യേ ദർവീഭരിതേന ഭക്തപൂരേണ .
ഗുർവീമകിഞ്ചനാർതിം ഖർവീകുരുഷേ ത്വമേവ കാമാക്ഷി .. 89
താഡിതരിപുപരിപീഡന-ഭയഹരണനിപുണഹലമുസലാ .
ക്രോഡപതിഭീഷണമുഖീ ക്രീഡസി ജഗതി ത്വമേവ കാമാക്ഷി .. 90
സ്മരമഥനവരണലോലാ മന്മഥഹേലാവിലാസമണിശാലാ .
കനകരുചിചൗര്യശീലാ ത്വമംബ ബാലാ കരാബ്ജധൃതമാലാ .. 91
വിമലപടീ കമലകുടീ പുസ്തകരുദ്രാക്ഷശസ്തഹസ്തപുടീ .
കാമാക്ഷി പക്ഷ്മലാക്ഷീ കലിതവിപഞ്ചീ വിഭാസി വൈരിഞ്ചീ .. 92
കുങ്കുമരുചിപിംഗമസൃക്പങ്കിലമുണ്ഡാലിമണ്ഡിതം മാതഃ .
ജയതി തവ രൂപധേയം ജപപടപുസ്തകവരാഭയകരാബ്ജം .. 93
കനകമണികലിതഭൂഷാം കാലായസകലഹശീലകാന്തികലാം .
കാമാക്ഷി ശീലയേ ത്വാം കപാലശൂലാഭിരാമകരകമലാം .. 94
ലോഹിതിമപുഞ്ജമധ്യേ മോഹിതഭുവനേ മുദാ നിരീക്ഷന്തേ .
വദനം തവ കുചയുഗലം കാഞ്ചീസീമാം ച കേsപി കാമാക്ഷി .. 95
ജലധിദ്വിഗുണിതഹുതവഹദിശാദിനേശ്വരകലാശ്വിനേയദലൈഃ .
നലിനൈർമഹേശി ഗച്ഛസി സർവോത്തരകരകമലദലമമലം .. 96
സത്കൃതദേശികചരണാഃ സബീജനിർബീജയോഗനിശ്രേണ്യാ .
അപവർഗസൗധവലഭീമാരോഹന്ത്യംബ കേsപി തവ കൃപയാ .. 97
അന്തരപി ബഹിരപി ത്വം ജന്തുതതേരന്തകാന്തകൃദഹന്തേ .
ചിന്തിതസന്താനവതാം സന്തതമപി തന്തനീഷി മഹിമാനം .. 98
കലമഞ്ജുലവാഗനുമിതഗലപഞ്ജരഗതശുകഗ്രഹൗത്കണ്ഠ്യാത് .
അംബ രദനാംബരം തേ ബിംബഫലം ശംബരാരിണാ ന്യസ്തം .. 99
ജയ ജയ ജഗദംബ ശിവേ ജയ ജയ കാമാക്ഷി ജയ ജയാദ്രിസുതേ .
ജയ ജയ മഹേശദയിതേ ജയ ജയ ചിദ്ഗഗനകൗമുദീധാരേ .. 100
ആര്യാശതകം ഭക്ത്യാ പഠതാമാര്യാകടാക്ഷേണ .
നിസ്സരതി വദനകമലാദ്വാണീ പീയൂഷധോരണീ ദിവ്യാ .. 101
.. ഇതി ആര്യാശതകം സമ്പൂർണം ..
മഹിമ്നഃ പന്ഥാനം മദനപരിപന്ഥിപ്രണയിനി
പ്രഭുർനിർണേതും തേ ഭവതി യതമാനോsപി കതമഃ .
തഥാപി ശ്രീകാഞ്ചീവിഹൃതിരസികേ കോsപി മനസോ
വിപാകസ്ത്വത്പാദസ്തുതിവിധിഷു ജൽപാകയതി മാം .. 1
ഗലഗ്രാഹീ പൗരന്ദരപുരവനീപല്ലവരുചാം
ധൃതപ്രാഥമ്യാനാമരുണമഹസാമാദിമഗുരുഃ .
സമിന്ധേ ബന്ധൂകസ്തബകസഹയുധ്വാ ദിശി ദിശി
പ്രസർപൻകാമാക്ഷ്യാശ്ചരണകിരണാനാമരുണിമാ .. 2
മരാലീനാം യാനാഭ്യസനകലനാമൂലഗുരവേ
ദരിദ്രാണാം ത്രാണവ്യതികരസുരോദ്യാനതരവേ .
തമസ്കാണ്ഡപ്രൗഢിപ്രകടനതിരസ്കാരപടവേ
ജനോsയം കാമാക്ഷ്യാശ്ചരണനലിനായ സ്പൃഹയതേ .. 3
വഹന്തീ സൈന്ദൂരീം സരണിമവനമ്രാമരപുരീ-
പുരന്ധ്രീസീമന്തേ കവികമലബാലാർകസുഷമാ .
ത്രയീസീമന്തിന്യാഃ സ്തനതടനിചോലാരുണപടീ
വിഭാന്തീ കാമാക്ഷ്യാഃ പദനലിനകാന്തിർവിജയതേ .. 4
പ്രണമ്രീഭൂതസ്യ പ്രണയകലഹത്രസ്തമനസഃ
സ്മരാരാതേശ്ചൂഡാവിയതി ഗൃഹമേധീ ഹിമകരഃ .
യയോഃ സാന്ധ്യാം കാന്തിം വഹതി സുഷമാഭിശ്ചരണയോഃ
തയോർമേ കാമാക്ഷ്യാ ഹൃദയമപതന്ദ്രം വിഹരതാം .. 5
യയോഃ പീഠായന്തേ വിബുധമുകുടീനാം പടലികാ
യയോഃ സൗധായന്തേ സ്വയമുദയഭാജോ ഭണിതയഃ .
യയോഃ ദാസായന്തേ സരസിജഭവാദ്യാശ്ചരണയോഃ
തയോർമേ കാമാക്ഷ്യാ ദിനമനു വരീവർതു ഹൃദയം .. 6
നയന്തീ സങ്കോചം സരസിജരുചം ദിക്പരിസരേ
സൃജന്തീ ലൗഹിത്യം നഖകിരണചന്ദ്രാർധഖചിതാ .
കവീന്ദ്രാണാം ഹൃത്കൈരവവികസനോദ്യോഗജനനീ
സ്ഫുരന്തീ കാമാക്ഷ്യാഃ ചരണരുചിസന്ധ്യാ വിജയതേ .. 7
വിരാവൈർമാഞ്ജീരൈഃ കിമപി കഥയന്തീവ മധുരം
പുരസ്താദാനമ്രേ പുരവിജയിനി സ്മേരവദനേ .
വയസ്യേവ പ്രൗഢാ ശിഥിലയതി യാ പ്രേമകലഹ-
പ്രരോഹം കാമാക്ഷ്യാഃ ചരണയുഗലീ സാ വിജയതേ .. 8
സുപർവസ്ത്രീലോലാലകപരിചിതം ഷട്പദകുലൈഃ
സ്ഫുരല്ലാക്ഷാരാഗം തരുണതരണിജ്യോതിരരുണൈഃ .
ഭൃതം കാന്ത്യംഭോഭിഃ വിസൃമരമരന്ദൈഃ സരസിജൈഃ
വിധത്തേ കാമാക്ഷ്യാഃ ചരണയുഗലം ബന്ധുപദവീം .. 9
രജഃസംസർഗേsപി സ്ഥിതമരജസാമേവ ഹൃദയേ
പരം രക്തത്വേന സ്ഥിതമപി വിരക്തൈകശരണം .
അലഭ്യം മന്ദാനാം ദധദപി സദാ മന്ദഗതിതാം
വിധത്തേ കാമാക്ഷ്യാഃ ചരണയുഗമാശ്ചര്യലഹരീം .. 10
ജടാലാ മഞ്ജീരസ്ഫുരദരുണരത്നാംശുനികരൈഃ
നിഷീദന്തീ മധ്യേ നഖരുചിഝരീഗാംഗപയസാം .
ജഗത്ത്രാണം കർതും ജനനി മമ കാമാക്ഷി നിയതം
തപശ്ചര്യാം ധത്തേ തവ ചരണപാഥോജയുഗലീ .. 11
തുലാകോടിദ്വന്ദ്വക്വണിതഭണിതാഭീതിവചസോഃ
വിനമ്രം കാമാക്ഷീ വിസൃമരമഹഃപാടലിതയോഃ .
ക്ഷണം വിന്യാസേന ക്ഷപിതതമസോർമേ ലലിതയോഃ
പുനീയാന്മൂർധാനം പുരഹരപുരന്ധ്രീ ചരണയോഃ .. 12
ഭവാനി ദ്രുഹ്യേതാം ഭവനിബിഡിതേഭ്യോ മമ മുഹുഃ
തമോവ്യാമോഹേഭ്യസ്തവ ജനനി കാമാക്ഷി ചരണൗ .
യയോർലാക്ഷാബിന്ദുസ്ഫുരണധരണാദ്ധൂർജടിജടാ-
കുടീരാ ശോണാങ്കം വഹതി വപുരേണാങ്കകലികാ .. 13
പവിത്രീകുര്യുർന: പദതലഭുവഃ പാടലരുചഃ
പരാഗാസ്തേ പാപപ്രശമനധുരീണാഃ പരശിവേ .
കണം ലബ്ധും യേഷാം നിജശിരസി കാമാക്ഷി വിവശാ
വലന്തോ വ്യാതന്വന്ത്യഹമഹമികാം മാധവമുഖാഃ .. 14
ബലാകാമാലാഭിർനഖരുചിമയീഭിഃ പരിവൃതേ
വിനമ്രസ്വർനാരീവികചകചകാലാംബുദകുലേ .
സ്ഫുരന്തഃ കാമാക്ഷി സ്ഫുടദലിതബന്ധൂകസുഹൃദഃ
തടില്ലേഖായന്തേ തവ ചരണപാഥോജകിരണാഃ .. 15
സരാഗഃ സദ്വേഷഃ പ്രസൃമരസരോജേ പ്രതിദിനം
നിസർഗാദാക്രാമന്വിബുധജനമൂർധാനമധികം .
കഥങ്കാരം മാതഃ കഥയ പദപദ്മസ്തവ സതാം
നതാനാം കാമാക്ഷി പ്രകടയതി കൈവല്യസരണിം .. 16
ജപാലക്ഷ്മീശോണോ ജനിതപരമജ്ഞാനനലിനീ-
വികാസവ്യാസംഗോ വിഫലിതജഗജ്ജാഡ്യഗരിമാ .
മനഃപൂർവാദ്രിം മേ തിലകയതു കാമാക്ഷി തരസാ
തമസ്കാണ്ഡദ്രോഹീ തവ ചരണപാഥോജരമണഃ .. 17
നമസ്കുർമഃ പ്രേംഖന്മണികടകനീലോത്പലമഹഃ-
പയോധൗ രിംഖദ്ഭിർനഖകിരണഫേനൈർധവലിതേ .
സ്ഫുടം കുർവാണായ പ്രബലചലദൗർവാനലശിഖാ-
വിതർകം കാമാക്ഷ്യാഃ സതതമരുണിമ്നേ ചരണയോഃ .. 18
ശിവേ പാശായേതാമലഘുനി തമഃകൂപകുഹരേ
ദിനാധീശായേതാം മമ ഹൃദയപാഥോജവിപിനേ .
നഭോമാസായേതാം സരസകവിതാരീതിസരിതി
ത്വദീയൗ കാമാക്ഷി പ്രസൃതകിരണൗ ദേവി ചരണൗ .. 19
നിഷക്തം ശ്രുത്യന്തേ നയനമിവ സദ്വൃത്തരുചിരൈഃ
സമൈർജുഷ്ടം ശുദ്ധൈരധരമിവ രമ്യൈർദ്വിജഗണൈഃ .
ശിവേ വക്ഷോജന്മദ്വിതയമിവ മുക്താശ്രിതമുമേ
ത്വദീയം കാമാക്ഷി പ്രണതശരണം നൗമി ചരണം .. 20
നമസ്യാസംസജ്ജന്നമുചിപരിപന്ഥിപ്രണയിനീ-
നിസർഗപ്രേംഖോലത്കുരലകുലകാലാഹിശബലേ .
നഖച്ഛായാദുഗ്ധോദധിപയസി തേ വൈദ്രുമരുചാം
പ്രചാരം കാമാക്ഷി പ്രചുരയതി പാദാബ്ജസുഷമാ .. 21
കദാ ദൂരീകർതും കടുദുരിതകാകോലജനിതം
മഹാന്തം സന്താപം മദനപരിപന്ഥിപ്രിയതമേ .
ക്ഷണാത്തേ കാമാക്ഷി ത്രിഭുവനപരീതാപഹരണേ
പടീയാംസം ലപ്സ്യേ പദകമലസേവാമൃതരസം .. 22
യയോഃ സാന്ധ്യം രോചിഃ സതതമരുണിമ്നേ സ്പൃഹയതേ
യയോശ്ചാന്ദ്രീ കാന്തിഃ പരിപതതി ദൃഷ്ട്വാ നഖരുചിം .
യയോഃ പാകോദ്രേകം പിപഠിഷതി ഭക്ത്യാ കിസലയം
മ്രദിമ്നഃ കാമാക്ഷ്യാ മനസി ചരണൗ തൗ തനുമഹേ .. 23
ജഗന്നേദം നേദം പരമിതി പരിത്യജ്യ യതിഭിഃ
കുശാഗ്രീയസ്വാന്തൈഃ കുശലധിഷണൈഃ ശാസ്ത്രസരണൗ .
ഗവേഷ്യം കാമാക്ഷി ധ്രുവമകൃതകാനാം ഗിരിസുതേ
ഗിരാമൈദമ്പര്യം തവ ചരണപദ്മം വിജയതേ .. 24
കൃതസ്നാനം ശാസ്ത്രാമൃതസരസി കാമാക്ഷി നിതരാം
ദധാനം വൈശദ്യം കലിതരസമാനന്ദസുധയാ .
അലങ്കാരം ഭൂമേർമുനിജനമനശ്ചിന്മയമഹാ-
പയോധേരന്തസ്സ്ഥം തവ ചരണരത്നം മൃഗയതേ .. 25
മനോഗേഹേ മോഹോദ്ഭവതിമിരപൂർണേ മമ മുഹുഃ
ദരിദ്രാണീകുർവന്ദിനകരസഹസ്രാണി കിരണൈഃ .
വിധത്താം കാമാക്ഷി പ്രസൃമരതമോവഞ്ചനചണഃ
ക്ഷണാർധം സാന്നിധ്യം ചരണമണിദീപോ ജനനി തേ .. 26
കവീനാം ചേതോവന്നഖരരുചിസമ്പർകി വിബുധ-
സ്രവന്തീസ്രോതോവത്പടുമുഖരിതം ഹംസകരവൈഃ .
ദിനാരംഭശ്രീവന്നിയതമരുണച്ഛായസുഭഗം
മദന്തഃ കാമാക്ഷ്യാഃ സ്ഫുരതു പദപങ്കേരുഹയുഗം .. 27
സദാ കിം സമ്പർകാത്പ്രകൃതികഠിനൈർനാകിമുകുടൈഃ
തടൈർനീഹാരാദ്രേരധികമണുനാ യോഗിമനസാ .
വിഭിന്തേ സംമോഹം ശിശിരയതി ഭക്താനപി ദൃശാം
അദൃശ്യം കാമാക്ഷി പ്രകടയതി തേ പാദയുഗലം .. 28
പവിത്രാഭ്യാമംബ പ്രകൃതിമൃദുലാഭ്യാം തവ ശിവേ
പദാഭ്യാം കാമാക്ഷി പ്രസഭമഭിഭൂതൈഃ സചകിതൈഃ .
പ്രവാലൈരംഭോജൈരപി ച വനവാസവ്രതദശാഃ
സദൈവാരഭ്യന്തേ പരിചരിതനാനാദ്വിജഗണൈഃ .. 29
ചിരാദ്ദൃശ്യാ ഹംസൈഃ കഥമപി സദാ ഹംസസുലഭം
നിരസ്യന്തീ ജാഡ്യം നിയതജഡമധ്യൈകശരണം .
അദോഷവ്യാസംഗാ സതതമപി ദോഷാപ്തിമലിനം
പയോജം കാമാക്ഷ്യാഃ പരിഹസതി പാദാബ്ജയുഗലീ .. 30
സുരാണാമാനന്ദപ്രബലനതയാ മണ്ഡനതയാ
നഖേന്ദുജ്യോത്സ്നാഭിർവിസൃമരതമഃഖണ്ഡനതയാ .
പയോജശ്രീദ്വേഷവ്രതരതതയാ ത്വച്ചരണയോഃ
വിലാസഃ കാമാക്ഷി പ്രകടയതി നൈശാകരദശാം .. 31
സിതിമ്നാ കാന്തീനാം നഖരജനുഷാം പാദനലിന-
ച്ഛവീനാം ശോണിമ്നാ തവ ജനനി കാമാക്ഷി നമനേ .
ലഭന്തേ മന്ദാരഗ്രഥിതനവബന്ധൂകകുസുമ-
സ്രജാം സാമീചീന്യം സുരപുരപുരന്ധ്രീകചഭരാഃ .. 32
സ്ഫുരന്മധ്യേ ശുദ്ധേ നഖകിരണദുഗ്ധാബ്ധിപയസാം
വഹന്നബ്ജം ചക്രം ദരമപി ച ലേഖാത്മകതയാ .
ശ്രിതോ മാത്സ്യം രൂപം ശ്രിയമപി ദധാനോ നിരുപമാം
ത്രിധാമാ കാമാക്ഷ്യാഃ പദനലിനനാമാ വിജയതേ .. 33
നഖശ്രീസന്നദ്ധസ്തബകനിചിതഃ സ്വൈശ്ച കിരണൈഃ
പിശംഗൈഃ കാമാക്ഷി പ്രകടിതലസത്പല്ലവരുചിഃ .
സതാം ഗമ്യഃ ശങ്കേ സകലഫലദാതാ സുരതരുഃ
ത്വദീയഃ പാദോsയം തുഹിനഗിരിരാജന്യതനയേ .. 34
വഷട്കുർവന്മാഞ്ജീരജകലകലൈഃ കർമലഹരീ-
ഹവീംഷി പ്രോദ്ദണ്ഡം ജ്വലതി പരമജ്ഞാനദഹനേ .
മഹീയാൻകാമാക്ഷി സ്ഫുടമഹസി ജോഹോതി സുധിയാം
മനോവേദ്യാം മാതസ്തവ ചരണയജ്വാ ഗിരിസുതേ .. 35
മഹാമന്ത്രം കിഞ്ചിന്മണികടകനാദൈർമൃദു ജപൻ
ക്ഷിപന്ദിക്ഷു സ്വച്ഛം നഖരുചിമയം ഭാസ്മനരജഃ .
നതാനാം കാമാക്ഷി പ്രകൃതിപടുരുച്ചാട്യ മമതാ-
പിശാചീം പാദോsയം പ്രകടയതി തേ മാന്ത്രികദശാം .. 36
ഉദീതേ ബോധേന്ദൗ തമസി നിതരാം ജഗ്മുഷി ദശാം
ദരിദ്രാം കാമാക്ഷി പ്രകടമനുരാഗം വിദധതീ .
സിതേനാച്ഛാദ്യാംഗം നഖരുചിപടേനാംഘ്രിയുഗലീ-
പുരന്ധ്രീ തേ മാതഃ സ്വയമഭിസരത്യേവ ഹൃദയം .. 37
ദിനാരംഭഃ സമ്പന്നലിനവിപിനാനാമഭിനവോ
വികാസോ വാസന്തഃ സുകവിപികലോകസ്യ നിയതഃ .
പ്രദോഷഃ കാമാക്ഷി പ്രകടപരമജ്ഞാനശശിനഃ
ചകാസ്തി ത്വത്പാദസ്മരണമഹിമാ ശൈലതനയേ .. 38
ധൃതച്ഛായം നിത്യം സരസിരുഹമൈത്രീപരിചിതം
നിധാനം ദീപ്തീനാം നിഖിലജഗതാം ബോധജനകം .
മുമുക്ഷൂണാം മാർഗപ്രഥനപടു കാമാക്ഷി പദവീം
പദം തേ പാതംഗീം പരികലയതേ പർവതസുതേ .. 39
ശനൈസ്തീർത്വാ മോഹാംബുധിമഥ സമാരോഢുമനസഃ
ക്രമാത്കൈവല്യാഖ്യാം സുകൃതിസുലഭാം സൗധവലഭീം .
ലഭന്തേ നിഃശ്രേണീമിവ ഝടിതി കാമാക്ഷി ചരണം
പുരശ്ചര്യാഭിസ്തേ പുരമഥനസീമന്തിനി ജനാഃ .. 40
പ്രചണ്ഡാർതിക്ഷോഭപ്രമഥനകൃതേ പ്രാതിഭസരിത്
പ്രവാഹപ്രോദ്ദണ്ഡീകരണജലദായ പ്രണമതാം .
പ്രദീപായ പ്രൗഢേ ഭവതമസി കാമാക്ഷി ചരണ-
പ്രസാദൗന്മുഖ്യായ സ്പൃഹയതി ജനോsയം ജനനി തേ .. 41
മരുദ്ഭിഃ സംസേവ്യാ സതതമപി ചാഞ്ചല്യരഹിതാ
സദാരുണ്യം യാന്തീ പരിണതിദരിദ്രാണസുഷമാ .
ഗുണോത്കർഷാന്മാഞ്ജീരജകലകലൈസ്തർജനപടുഃ
പ്രവാലം കാമാക്ഷ്യാഃ പരിഹസതി പാദാബ്ജയുഗലീ .. 42
ജഗദ്രക്ഷാദക്ഷാ ജലജരുചിശിക്ഷാപടുതരാ
സമൈർനമ്യാ രമ്യാ സതതമഭിഗമ്യാ ബുധജനൈഃ .
ദ്വയീ ലീലാലോലാ ശ്രുതിഷു സുരപാലാദിമുകുടീ-
തടീസീമാധാമാ തവ ജനനി കാമാക്ഷി പദയോഃ .. 43
ഗിരാം ദൂരൗ ചോരൗ ജഡിമതിമിരാണാം കൃതജഗത്
പരിത്രാണൗ ശോണൗ മുനിഹൃദയലീലൈകനിപുണൗ .
നഖൈഃ സ്മേരൗ സാരൗ നിഗമവചസാം ഖണ്ഡിതഭവ-
ഗ്രഹോന്മാദൗ പാദൗ തവ ജനനി കാമാക്ഷി കലയേ .. 44
അവിശ്രാന്തം പങ്കം യദപി കലയന്യാവകമയം
നിരസ്യൻകാമാക്ഷി പ്രണമനജുഷാം പങ്കമഖിലം .
തുലാകോടിദ്വന്ദ്വം ദധദപി ച ഗച്ഛന്നതുലതാം
ഗിരാം മാർഗം പാദോ ഗിരിവരസുതേ ലംഘയതി തേ .. 45
പ്രവാലം സവ്രീലം വിപിനവിവരേ വേപയതി യാ
സ്ഫുരല്ലീലം ബാലാതപമധികബാലം വദതി യാ .
രുചിം സാന്ധ്യാം വന്ധ്യാം വിരചയതി യാ വർധയതു സാ
ശിവം മേ കാമാക്ഷ്യാഃ പദനലിനപാടല്യലഹരീ .. 46
കിരഞ്ജ്യോത്സ്നാരീതിം നഖമുഖരുചാ ഹംസമനസാം
വിതന്വാനഃ പ്രീതിം വികചതരുണാംഭോരുഹരുചിഃ .
പ്രകാശഃ ശ്രീപാദസ്തവ ജനനി കാമാക്ഷി തനുതേ
ശരത്കാലപ്രൗഢിം ശശിശകലചൂഡപ്രിയതമേ .. 47
നഖാങ്കൂരസ്മേരദ്യുതിവിമലഗംഗാംഭസി സുഖം
കൃതസ്നാനം ജ്ഞാനാമൃതമമലമാസ്വാദ്യ നിയതം .
ഉദഞ്ചന്മഞ്ജീരസ്ഫുരണമണിദീപേ മമ മനോ
മനോജ്ഞേ കാമാക്ഷ്യാശ്ചരണമണിഹർമ്യേ വിഹരതാം .. 48
ഭവാംഭോധൗ നൗകാം ജഡിമവിപിനേ പാവകശിഖാം
അമർത്യേന്ദ്രാദീനാമധിമുകുടമുത്തംസകലികാം .
ജഗത്താപേ ജ്യോത്സ്നാമകൃതകവചഃപഞ്ജരപുടേ
ശുകസ്ത്രീം കാമാക്ഷ്യാ മനസി കലയേ പാദയുഗലീം .. 49
പരാത്മപ്രാകാശ്യപ്രതിഫലനചുഞ്ചുഃ പ്രണമതാം
മനോജ്ഞസ്ത്വത്പാദോ മണിമുകുരമുദ്രാം കലയതേ .
യദീയാം കാമാക്ഷി പ്രകൃതിമസൃണാഃ ശോധകദശാം
വിധാതും ചേഷ്ടന്തേ ബലരിപുവധൂടീകചഭരാഃ .. 50
അവിശ്രാന്തം തിഷ്ഠന്നകൃതകവചഃകന്ദരപുടീ-
കുടീരാന്തഃ പ്രൗഢം നഖരുചിസടാലീം പ്രകടയൻ .
പ്രചണ്ഡം ഖണ്ഡത്വം നയതു മമ കാമാക്ഷി തരസാ
തമോവേതണ്ഡേന്ദ്രം തവ ചരണകണ്ഠീരവപതിഃ .. 51
പുരസ്താത്കാമാക്ഷി പ്രചുരരസമാഖണ്ഡലപുരീ-
പുരന്ധ്രീണാം ലാസ്യം തവ ലലിതമാലോക്യ ശനകൈഃ .
നഖശ്രീഭിഃ സ്മേരാ ബഹു വിതനുതേ നൂപുരരവൈഃ
ചമത്കൃത്യാ ശങ്കേ ചരണയുഗലീ ചാടുരചനാഃ .. 52
സരോജം നിന്ദന്തീ നഖകിരണകർപൂരശിശിരാ
നിഷിക്താ മാരാരേർമുകുടശശിരേഖാഹിമജലൈഃ .
സ്ഫുരന്തീ കാമാക്ഷി സ്ഫുടരുചിമയേ പല്ലവചയേ
തവാധത്തേ മൈത്രീം പഥികസുദൃശാ പാദയുഗലീ .. 53
നതാനാം സമ്പത്തേരനവരതമാകർഷണജപഃ
പ്രരോഹത്സംസാരപ്രസരഗരിമസ്തംഭനജപഃ .
ത്വദീയഃ കാമാക്ഷി സ്മരഹരമനോമോഹനജപഃ
പടീയാന്നഃ പായാത്പദനലിനമഞ്ജീരനിനദഃ .. 54
വിതന്വീഥാ നാഥേ മമ ശിരസി കാമാക്ഷി കൃപയാ
പദാംഭോജന്യാസം പശുപരിബൃഢപ്രാണദയിതേ .
പിബന്തോ യന്മുദ്രാം പ്രകടമുപകമ്പാപരിസരം
ദൃശാ നാനന്ദ്യന്തേ നലിനഭവനാരായണമുഖാഃ .. 55
പ്രണാമോദ്യദ്ബൃന്ദാരകമുകുടമന്ദാരകലികാ-
വിലോലല്ലോലംബപ്രകരമയധൂമപ്രചുരിമാ .
പ്രദീപ്തഃ പാദാബ്ജദ്യുതിവിതതിപാടല്യലഹരീ-
കൃശാനുഃ കാമാക്ഷ്യാ മമ ദഹതു സംസാരവിപിനം .. 56
വലക്ഷശ്രീർഋക്ഷാധിപശിശുസദൃക്ഷൈസ്തവ നഖൈഃ
ജിഘൃക്ഷുർദക്ഷത്വം സരസിരുഹഭിക്ഷുത്വകരണേ .
ക്ഷണാന്മേ കാമാക്ഷി ക്ഷപിതഭവസങ്ക്ഷോഭഗരിമാ
വചോവൈചക്ഷണ്യം ചരണയുഗലീ പക്ഷ്മലയതാത് .. 57
സമന്താത്കാമാക്ഷി ക്ഷതതിമിരസന്താനസുഭഗാൻ
അനന്താഭിർഭാഭിർദിനമനു ദിഗന്താന്വിരചയൻ .
അഹന്തായാ ഹന്താ മമ ജഡിമദന്താവലഹരിഃ
വിഭിന്താം സന്താപം തവ ചരണചിന്താമണിരസൗ .. 58
ദധാനോ ഭാസ്വത്താമമൃതനിലയോ ലോഹിതവപുഃ
വിനമ്രാണാം സൗമ്യോ ഗുരുരപി കവിത്വം ച കലയൻ .
ഗതൗ മന്ദോ ഗംഗാധരമഹിഷി കാമാക്ഷി ഭജതാം
തമഃകേതുർമാതസ്തവ ചരണപദ്മോ വിജയതേ .. 59
നയന്തീം ദാസത്വം നലിനഭവമുഖ്യാനസുലഭ-
പ്രദാനാദ്ദീനാനാമമരതരുദൗർഭാഗ്യജനനീം .
ജഗജ്ജന്മക്ഷേമക്ഷയവിധിഷു കാമാക്ഷി പദയോഃ
ധുരീണാമീഷ്ടേ കഃ തവ ഭണിതുമാഹോപുരുഷികാം .. 60
ജനോsയം സന്തപ്തോ ജനനി ഭവചണ്ഡാംശുകിരണൈഃ
അലബ്ധ്വൈകം ശീതം കണമപി പരജ്ഞാനപയസഃ .
തമോമാർഗേ പാന്ഥസ്തവ ഝടിതി കാമാക്ഷി ശിശിരാം
പദാംഭോജച്ഛായാം പരമശിവജായേ മൃഗയതേ .. 61
ജയത്യംബ ശ്രീമന്നഖകിരണചീനാംശുകമയം
വിതാനം ബിഭ്രാണേ സുരമകുടസംഘട്ടമസൃണേ .
നിജാരുണ്യക്ഷൗമാസ്തരണവതി കാമാക്ഷി സുലഭാ
ബുധൈഃ സംവിന്നാരീ തവ ചരണമാണിക്യഭവനേ .. 62
പ്രതീമഃ കാമാക്ഷി സ്ഫുരിതതരുണാദിത്യകിരണ-
ശ്രിയോ മൂലദ്രവ്യം തവ ചരണമദ്രീന്ദ്രതനയേ .
സുരേന്ദ്രാശാമാപൂരയതി യദസൗ ധ്വാന്തമഖിലം
ധുനീതേ ദിഗ്ഭാഗാനപി ച മഹസാ പാടലയതേ .. 63
മഹാഭാഷ്യവ്യാഖ്യാപടുശയനമാരോപയതി വാ
സ്മരവ്യാപാരേർഷ്യാപിശുനനിടിലം കാരയതി വാ .
ദ്വിരേഫാണാമധ്യാസയതി സതതം വാധിവസതിം
പ്രണമ്രാൻകാമാക്ഷ്യാഃ പദനലിനമാഹാത്മ്യഗരിമാ .. 64
വിവേകാംഭസ്സ്രോതസ്സ്നപനപരിപാടീശിശിരിതേ
സമീഭൂതേ ശാസ്ത്രസ്മരണഹലസങ്കർഷണവശാത് .
സതാം ചേതഃ ക്ഷേത്രേ വപതി തവ കാമാക്ഷി ചരണഃ
മഹാസംവിത്സസ്യപ്രകരവരബീജം ഗിരിസുതേ .. 65
ദധാനോ മന്ദാരസ്തബകപരിപാടീം നഖരുചാ
വഹന്ദീപ്താം ശോണാംഗുലിപടലചാമ്പേയകലികാം .
അശോകോല്ലാസം നഃ പ്രചുരയതു കാമാക്ഷി ചരണഃ
വികാസീ വാസന്തഃ സമയ ഇവ തേ ശർവദയിതേ .. 66
നഖാംശുപ്രാചുര്യപ്രസൃമരമരാലാലിധവലഃ
സ്ഫുരന്മഞ്ജീരോദ്യന്മരകതമഹശ്ശൈവലയുതഃ .
ഭവത്യാഃ കാമാക്ഷി സ്ഫുടചരണപാടല്യകപടഃ
നദഃ ശോണാഭിഖ്യോ നഗപതിതനൂജേ വിജയതേ .. 67
ധുനാനം പങ്കൗഘം പരമസുലഭം കണ്ടകകുലൈഃ
വികാസവ്യാസംഗം വിദധദപരാധീനമനിശം .
നഖേന്ദുജ്യോത്സ്നാഭിർവിശദരുചി കാമാക്ഷി നിതരാം
അസാമാന്യം മന്യേ സരസിജമിദം തേ പദയുഗം .. 68
കരീന്ദ്രായ ദ്രുഹ്യത്യലസഗതിലീലാസു വിമലൈഃ
പയോജൈർമാത്സര്യം പ്രകടയതി കാമം കലയതേ .
പദാംഭോജദ്വന്ദ്വം തവ തദപി കാമാക്ഷി ഹൃദയം
മുനീനാം ശാന്താനാം കഥമനിശമസ്മൈ സ്പൃഹയതേ .. 69
നിരസ്താ ശോണിമ്നാ ചരണകിരണാനാം തവ ശിവേ
സമിന്ധാനാ സന്ധ്യാരുചിരചലരാജന്യതനയേ .
അസാമർഥ്യാദേനം പരിഭവിതുമേതത്സമരുചാം
സരോജാനാം ജാനേ മുകുലയതി ശോഭാം പ്രതിദിനം .. 70
ഉപാദിക്ഷദ്ദാക്ഷ്യം തവ ചരണനാമാ ഗുരുരസൗ
മരാലാനാം ശങ്കേ മസൃണഗതിലാലിത്യസരണൗ .
അതസ്തേ നിസ്തന്ദ്രം നിയതമമുനാ സഖ്യപദവീം
പ്രപന്നം പാഥോജം പ്രതി ദധതി കാമാക്ഷി കുതുകം .. 71
ദധാനൈഃ സംസർഗം പ്രകൃതിമലിനൈഃ ഷട്പദകുലൈഃ
ദ്വിജാധീശശ്ലാഘാവിധിഷു വിദധദ്ഭിർമുകുലതാം .
രജോമിശ്രൈഃ പദ്മൈർനിയതമപി കാമാക്ഷി പദയോഃ
വിരോധസ്തേ യുക്തോ വിഷമശരവൈരിപ്രിയതമേ .. 72
കവിത്വശ്രീമിശ്രീകരണനിപുണൗ രക്ഷണചണൗ
വിപന്നാനാം ശ്രീമന്നലിനമസൃണൗ ശോണകിരണൗ .
മുനീന്ദ്രാണാമന്തഃകരണശരണൗ മന്ദസരണൗ
മനോജ്ഞൗ കാമാക്ഷ്യാ ദുരിതഹരണൗ നൗമി ചരണൗ .. 73
പരസ്മാത്സർവസ്മാദപി ച പരയോർമുക്തികരയോഃ
നഖശ്രീഭിർജ്യോത്സ്നാകലിതതുലയോസ്താമ്രതലയോഃ .
നിലീയേ കാമാക്ഷ്യാ നിഗമനുതയോർനാകിനതയോഃ
നിരസ്തപ്രോന്മീലന്നലിനമദയോരേവ പദയോഃ .. 74
സ്വഭാവാദന്യോന്യം കിസലയമപീദം തവ പദം
മ്രദിമ്നാ ശോണിമ്നാ ഭഗവതി ദധാതേ സദൃശതാം .
വനേ പൂർവസ്യേച്ഛാ സതതമവനേ കിം തു ജഗതാം
പരസ്യേത്ഥം ഭേദഃ സ്ഫുരതി ഹൃദി കാമാക്ഷി സുധിയാം .. 75
കഥം വാചാലോsപി പ്രകടമണിമഞ്ജീരനിനദൈഃ
സദൈവാനന്ദാർദ്രാന്വിരചയതി വാചംയമജനാൻ .
പ്രകൃത്യാ തേ ശോണച്ഛവിരപി ച കാമാക്ഷി ചരണോ
മനീഷാനൈർമല്യം കഥമിവ നൃണാം മാംസലയതേ .. 76
ചലത്തൃഷ്ണാവീചീപരിചലനപര്യാകുലതയാ
മുഹുർഭ്രാന്തസ്താന്തഃ പരമശിവവാമാക്ഷി പരവാൻ .
തിതീർഷുഃ കാമാക്ഷി പ്രചുരതരകർമാംബുധിമമും
കദാഹം ലപ്സ്യേ തേ ചരണമണിസേതും ഗിരിസുതേ .. 77
വിശുഷ്യന്ത്യാം പ്രജ്ഞാസരിതി ദുരിതഗ്രീഷ്മസമയ-
പ്രഭാവേണ ക്ഷീണേ സതി മമ മനഃകേകിനി ശുചാ .
ത്വദീയഃ കാമാക്ഷി സ്ഫുരിതചരണാംഭോദമഹിമാ
നഭോമാസാടോപം നഗപതിസുതേ കിം ന കുരുതേ .. 78
വിനമ്രാണാം ചേതോഭവനവലഭീസീമ്നി ചരണ-
പ്രദീപേ പ്രാകാശ്യം ദധതി തവ നിർധൂതതമസി .
അസീമാ കാമാക്ഷി സ്വയമലഘുദുഷ്കർമലഹരീ
വിഘൂർണന്തീ ശാന്തിം ശലഭപരിപാടീവ ഭജതേ .. 79
വിരാജന്തീ ശുക്തിർനഖകിരണമുക്താമണിതതേഃ
വിപത്പാഥോരാശൗ തരിരപി നരാണാം പ്രണമതാം .
ത്വദീയഃ കാമാക്ഷി ധ്രുവമലഘുവഹ്നിർഭവവനേ
മുനീനാം ജ്ഞാനാഗ്നേരരണിരയമംഘ്രിർവിജയതേ .. 80
സമസ്തൈഃ സംസേവ്യഃ സതതമപി കാമാക്ഷി വിബുധൈഃ
സ്തുതോ ഗന്ധർവസ്ത്രീസുലലിതവിപഞ്ചീകലരവൈഃ .
ഭവത്യാ ഭിന്ദാനോ ഭവഗിരികുലം ജൃംഭിതതമോ-
വലദ്രോഹീ മാതശ്ചരണപുരുഹൂതോ വിജയതേ .. 81
വസന്തം ഭക്താനാമപി മനസി നിത്യം പരിലസദ്-
ഘനച്ഛായാപൂർണം ശുചിമപി നൃണാം താപശമനം .
നഖേന്ദുജ്യോത്സ്നാഭിഃ ശിശിരമപി പദ്മോദയകരം
നമാമഃ കാമാക്ഷ്യാശ്ചരണമധികാശ്ചര്യകരണം .. 82
കവീന്ദ്രാണാം നാനാഭണിതിഗുണചിത്രീകൃതവചഃ-
പ്രപഞ്ചവ്യാപാരപ്രകടനകലാകൗശലനിധിഃ .
അധഃകുർവന്നബ്ജം സനകഭൃഗുമുഖ്യൈർമുനിജനൈഃ
നമസ്യഃ കാമാക്ഷ്യാശ്ചരണപരമേഷ്ഠീ വിജയതേ .. 83
ഭവത്യാഃ കാമാക്ഷി സ്ഫുരിതപദപങ്കേരുഹഭുവാം
പരാഗാണാം പൂരൈഃ പരിഹൃതകലങ്കവ്യതികരൈഃ .
നതാനാമാമൃഷ്ടേ ഹൃദയമുകുരേ നിർമലരുചി
പ്രസന്നേ നിശ്ശേഷം പ്രതിഫലതി വിശ്വം ഗിരിസുതേ .. 84
തവ ത്രസ്തം പാദാത്കിസലയമരണ്യാന്തരമഗാത്
പരം രേഖാരൂപം കമലമമുമേവാശ്രിതമഭൂത് .
ജിതാനാം കാമാക്ഷി ദ്വിതയമപി യുക്തം പരിഭവേ
വിദേശേ വാസോ വാ ചരണഗമനം വാ നിജരിപോഃ .. 85
ഗൃഹീത്വാ യാഥാർഥ്യം നിഗമവചസാം ദേശികകൃപാ-
കടാക്ഷാർകജ്യോതിശ്ശമിതമമതാബന്ധതമസഃ .
യതന്തേ കാമാക്ഷി പ്രതിദിവസമന്തർദ്രഢയിതും
ത്വദീയം പാദാബ്ജം സുകൃതപരിപാകേന സുജനാഃ .. 86
ജഡാനാമപ്യംബ സ്മരണസമയേ ത്വച്ചരണയോഃ
ഭ്രമന്മന്ഥക്ഷ്മാഭൃദ്ധുമുഘുമിതസിന്ധുപ്രതിഭടാഃ .
പ്രസന്നാഃ കാമാക്ഷി പ്രസഭമധരസ്പന്ദനകരാ
ഭവന്തി സ്വച്ഛന്ദം പ്രകൃതിപരിപക്വാ ഭണിതയഃ .. 87
വഹന്നപ്യശ്രാന്തം മധുരനിനദം ഹംസകമസൗ
തമേവാധഃ കർതും കിമിവ യതതേ കേലിഗമനേ .
ഭവസ്യൈവാനന്ദം വിദധദപി കാമാക്ഷി ചരണോ
ഭവത്യാസ്തദ്ദ്രോഹം ഭഗവതി കിമേവം വിതനുതേ .. 88
യദത്യന്തം താമ്യത്യലസഗതിവാർതാസ്വപി ശിവേ
തദേതത്കാമാക്ഷി പ്രകൃതിമൃദുലം തേ പദയുഗം .
കിരീടൈഃ സംഘട്ടം കഥമിവ സുരൗഘസ്യ സഹതേ
മുനീന്ദ്രാണാമാസ്തേ മനസി ച കഥം സൂചിനിശിതേ .. 89
മനോരംഗേ മത്കേ വിബുധജനസംമോദജനനീ
സരാഗവ്യാസംഗം സരസമൃദുസഞ്ചാരസുഭഗാ .
മനോജ്ഞാ കാമാക്ഷി പ്രകടയതു ലാസ്യപ്രകരണം
രണന്മഞ്ജീരാ തേ ചരണയുഗലീനർതകവധൂഃ .. 90
പരിഷ്കുർവന്മാതഃ പശുപതികപർദം ചരണരാട്
പരാചാം ഹൃത്പദ്മം പരമഭണിതീനാം ച മുകുടം .
ഭവാഖ്യേ പാഥോധൗ പരിഹരതു കാമാക്ഷി മമതാ-
പരാധീനത്വം മേ പരിമുഷിതപാഥോജമഹിമാ .. 91
പ്രസൂനൈഃ സമ്പർകാദമരതരുണീകുന്തലഭവൈഃ
അഭീഷ്ടാനാം ദാനാദനിശമപി കാമാക്ഷി നമതാം .
സ്വസംഗാത്കങ്കേലിപ്രസവജനകത്വേന ച ശിവേ
ത്രിധാ ധത്തേ വാർതാം സുരഭിരിതി പാദോ ഗിരിസുതേ .. 92
മഹാമോഹസ്തേനവ്യതികരഭയാത്പാലയതി യഃ
വിനിക്ഷിപ്തം സ്വസ്മിന്നിജജനമനോരത്നമനിശം .
സ രാഗസ്യോദ്രേകാത്സതതമപി കാമാക്ഷി തരസാ
കിമേവം പാദോsസൗ കിസലയരുചിം ചോരയതി തേ .. 93
സദാ സ്വാദുങ്കാരം വിഷയലഹരീശാലികണികാം
സമാസ്വാദ്യ ശ്രാന്തം ഹൃദയശുകപോതം ജനനി മേ .
കൃപാജാലേ ഫാലേക്ഷണമഹിഷി കാമാക്ഷി രഭസാത്
ഗൃഹീത്വാ രുന്ധീഥാസ്തവ പദയുഗീപഞ്ജരപുടേ .. 94
ധുനാനം കാമാക്ഷി സ്മരണലവമാത്രേണ ജഡിമ-
ജ്വരപ്രൗഢിം ഗൂഢസ്ഥിതി നിഗമനൈകുഞ്ജകുഹരേ .
അലഭ്യം സർവേഷാം കതിചന ലഭന്തേ സുകൃതിനഃ
ചിരാദന്വിഷ്യന്തസ്തവ ചരണസിദ്ധൗഷധമിദം .. 95
രണന്മഞ്ജീരാഭ്യാം ലലിതഗമനാഭ്യാം സുകൃതിനാം
മനോവാസ്തവ്യാഭ്യാം മഥിതതിമിരാഭ്യാം നഖരുചാ .
നിധേയാഭ്യാം പത്യാ നിജശിരസി കാമാക്ഷി സതതം
നമസ്തേ പാദാഭ്യാം നലിനമൃദുലാഭ്യാം ഗിരിസുതേ .. 96
സുരാഗേ രാകേന്ദുപ്രതിനിധിമുഖേ പർവതസുതേ
ചിരാല്ലഭ്യേ ഭക്ത്യാ ശമധനജനാനാം പരിഷദാ .
മനോഭൃംഗോ മത്കഃ പദകമലയുഗ്മേ ജനനി തേ
പ്രകാമം കാമാക്ഷി ത്രിപുരഹരവാമാക്ഷി രമതാം .. 97
ശിവേ സംവിദ്രൂപേ ശശിശകലചൂഡപ്രിയതമേ
ശനൈർഗത്യാssഗത്യാ ജിതസുരവരേഭേ ഗിരിസുതേ .
യതന്തേ സന്തസ്തേ ചരണനലിനാലാനയുഗലേ
സദാ ബദ്ധും ചിത്തപ്രമദകരിയൂഥം ദൃഢതരം .. 98
യശഃ സൂതേ മാതർമധുരകവിതാം പക്ഷ്മലയതേ
ശ്രിയം ധത്തേ ചിത്തേ കമപി പരിപാകം പ്രഥയതേ .
സതാം പാശഗ്രന്ഥിം ശിഥിലയതി കിം കിം ന കുരുതേ
പ്രപന്നേ കാമാക്ഷ്യാഃ പ്രണതിപരിപാടീ ചരണയോഃ .. 99
മനീഷാം മാഹേന്ദ്രീം കകുഭമിവ തേ കാമപി ദശാം
പ്രധത്തേ കാമാക്ഷ്യാശ്ചരണതരുണാദിത്യകിരണഃ .
യദീയേ സമ്പർകേ ധൃതരസമരന്ദാ കവയതാം
പരീപാകം ധത്തേ പരിമലവതീ സൂക്തിനലിനീ .. 100
പുരാ മാരാരാതിഃ പുരമജയദംബ സ്തവശതൈഃ
പ്രസന്നായാം സത്യാം ത്വയി തുഹിനശൈലേന്ദ്രതനയേ .
അതസ്തേ കാമാക്ഷി സ്ഫുരതു തരസാ കാലസമയേ
സമായാതേ മാതർമമ മനസി പാദാബ്ജയുഗലം .. 101
പദദ്വന്ദ്വം മന്ദം ഗതിഷു നിവസന്തം ഹൃദി സതാം
ഗിരാമന്തേ ഭ്രാന്തം കൃതകരഹിതാനാം പരിബൃഢേ .
ജനാനാമാനന്ദം ജനനി ജനയന്തം പ്രണമതാം
ത്വദീയം കാമാക്ഷി പ്രതിദിനമഹം നൗമി വിമലം .. 102
ഇദം യഃ കാമാക്ഷ്യാശ്ചരണനലിനസ്തോത്രശതകം
ജപേന്നിത്യം ഭക്ത്യാ നിഖിലജഗദാഹ്ലാദജനകം .
സ വിശ്വേഷാം വന്ദ്യഃ സകലകവിലോകൈകതിലകഃ
ചിരം ഭുക്ത്വാ ഭോഗാൻപരിണമതി ചിദ്രൂപകലയാ .. 103
.. ഇതി പാദാരവിന്ദശതകം സമ്പൂർണം ..
സ്തുതിശതകം
പാണ്ഡിത്യം പരമേശ്വരി സ്തുതിവിധൗ നൈവാശ്രയന്തേ ഗിരാം
വൈരിഞ്ചാന്യപി ഗുംഫനാനി വിഗലദ്ഗർവാണി ശർവാണി തേ .
സ്തോതും ത്വാം പരിഫുല്ലനീലനലിനശ്യാമാക്ഷി കാമാക്ഷി മാം
വാചാലീകുരുതേ തഥാപി നിതരാം ത്വത്പാദസേവാദരഃ .. 1
താപിഞ്ഛസ്തബകത്വിഷേ തനുഭൃതാം ദാരിദ്ര്യമുദ്രാദ്വിഷേ
സംസാരാഖ്യതമോമുഷേ പുരരിപോർവാമാങ്കസീമാജുഷേ .
കമ്പാതീരമുപേയുഷേ കവയതാം ജിഹ്വാകുടീം ജഗ്മുഷേ
വിശ്വത്രാണപുഷേ നമോsസ്തു സതതം തസ്മൈ പരഞ്ജ്യോതിഷേ .. 2
യേ സന്ധ്യാരുണയന്തി ശങ്കരജടാകാന്താരചന്ദ്രാർഭകം
സിന്ദൂരന്തി ച യേ പുരന്ദരവധൂസീമന്തസീമാന്തരേ .
പുണ്യം യേ പരിപക്വയന്തി ഭജതാം കാഞ്ചീപുരേ മാമമീ
പായാസുഃ പരമേശ്വരപ്രണയിനീപാദോദ്ഭവാഃ പാംസവഃ .. 3
കാമാഡംബരപൂരയാ ശശിരുചാ കമ്രസ്മിതാനാം ത്വിഷാ
കാമാരേരനുരാഗസിന്ധുമധികം കല്ലോലിതം കുർവതീ .
കാമാക്ഷീതി സമസ്തസജ്ജനനുതാ കല്യാണദാത്രീ നൃണാം
കാരുണ്യാകുലമാനസാ ഭഗവതീ കമ്പാതടേ ജൃംഭതേ .. 4
കാമാക്ഷീണപരാക്രമപ്രകടനം സംഭാവയന്തീ ദൃശാ
ശ്യാമാ ക്ഷീരസഹോദരസ്മിതരുചിപ്രക്ഷാലിതാശാന്തരാ .
വാമാക്ഷീജനമൗലിഭൂഷണമണിർവാചാം പരാ ദേവതാ
കാമാക്ഷീതി വിഭാതി കാപി കരുണാ കമ്പാതടിന്യാസ്തടേ .. 5
ശ്യാമാ കാചന ചന്ദ്രികാ ത്രിഭുവനേ പുണ്യാത്മനാമാനനേ
സീമാശൂന്യകവിത്വവർഷജനനീ യാ കാപി കാദംബിനീ .
മാരാരാതിമനോവിമോഹനവിധൗ കാചിത്തമഃകന്ദലീ
കാമാക്ഷ്യാഃ കരുണാകടാക്ഷലഹരീ കാമായ മേ കൽപതാം .. 6
പ്രൗഢധ്വാന്തകദംബകേ കുമുദിനീപുണ്യാങ്കുരം ദർശയൻ
ജ്യോത്സ്നാസംഗമനേsപി കോകമിഥുനം മിശ്രം സമുദ്ഭാവയൻ .
കാലിന്ദീലഹരീദശാം പ്രകടയൻകമ്രാം നഭസ്യദ്ഭുതാം
കശ്ചിന്നേത്രമഹോത്സവോ വിജയതേ കാഞ്ചീപുരേ ശൂലിനഃ .. 7
തന്ദ്രാഹീനതമാലനീലസുഷമൈസ്താരുണ്യലീലാഗൃഹൈഃ
താരാനാഥകിശോരലാഞ്ഛിതകചൈസ്താമ്രാരവിന്ദേക്ഷണൈഃ .
മാതഃ സംശ്രയതാം മനോ മനസിജപ്രാഗൽഭ്യനാഡിന്ധമൈഃ
കമ്പാതീരചരൈർഘനസ്തനഭരൈഃ പുണ്യാങ്കുരൈഃ ശാങ്കരൈഃ .. 8
നിത്യം നിശ്ചലതാമുപേത്യ മരുതാം രക്ഷാവിധിം പുഷ്ണതീ
തേജസ്സഞ്ചയപാടവേന കിരണാനുഷ്ണദ്യുതേർമുഷ്ണതീ .
കാഞ്ചീമധ്യഗതാപി ദീപ്തിജനനീ വിശ്വാന്തരേ ജൃംഭതേ
കാചിച്ചിത്രമഹോ സ്മൃതാപി തമസാം നിർവാപികാ ദീപികാ .. 9
കാന്തൈഃ കേശരുചാം ചയൈർഭ്രമരിതം മന്ദസ്മിതൈഃ പുഷ്പിതം
കാന്ത്യാ പല്ലവിതം പദാംബുരുഹയോർനേത്രത്വിഷാ പത്രിതം .
കമ്പാതീരവനാന്തരം വിദധതീ കല്യാണജന്മസ്ഥലീ
കാഞ്ചീമധ്യമഹാമണിർവിജയതേ കാചിത്കൃപാകന്ദലീ .. 10
രാകാചന്ദ്രസമാനകാന്തിവദനാ നാകാധിരാജസ്തുതാ
മൂകാനാമപി കുർവതീ സുരധുനീനീകാശവാഗ്വൈഭവം .
ശ്രീകാഞ്ചീനഗരീവിഹാരരസികാ ശോകാപഹന്ത്രീ സതാം
ഏകാ പുണ്യപരമ്പരാ പശുപതേരാകാരിണീ രാജതേ .. 11
ജാതാ ശീതലശൈലതഃ സുകൃതിനാം ദൃശ്യാ പരം ദേഹിനാം
ലോകാനാം ക്ഷണമാത്രസംസ്മരണതഃ സന്താപവിച്ഛേദിനീ .
ആശ്ചര്യം ബഹു ഖേലനം വിതനുതേ നൈശ്ചല്യമാബിഭ്രതീ
കമ്പായാസ്തടസീമ്നി കാപി തടിനീ കാരുണ്യപാഥോമയീ .. 12
ഐക്യം യേന വിരച്യതേ ഹരതനൗ ദംഭാവപുംഭാവികേ
രേഖാ യത്കചസീമ്നി ശേഖരദശാം നൈശാകരീ ഗാഹതേ .
ഔന്നത്യം മുഹുരേതി യേന സ മഹാന്മേനാസഖഃ സാനുമാൻ
കമ്പാതീരവിഹാരിണാ സശരണാസ്തേനൈവ ധാമ്നാ വയം .. 13
അക്ഷ്ണോശ്ച സ്തനയോഃ ശ്രിയാ ശ്രവണയോർബാഹ്വോശ്ച മൂലം സ്പൃശൻ
ഉത്തംസേന മുഖേന ച പ്രതിദിനം ദ്രുഹ്യൻപയോജന്മനേ .
മാധുര്യേണ ഗിരാം ഗതേന മൃദുനാ ഹംസാംഗനാം ഹ്രേപയൻ
കാഞ്ചീസീമ്നി ചകാസ്തി കോപി കവിതാസന്താനബീജാങ്കുരഃ.. 14
ഖണ്ഡം ചാന്ദ്രമസം വതംസമനിശം കാഞ്ചീപുരേ ഖേലനം
കാലായശ്ഛവിതസ്കരീം തനുരുചിം കർണേജപേ ലോചനേ .
താരുണ്യോഷ്മനഖമ്പചം സ്തനഭരം ജംഘാസ്പൃശം കുന്തലം
ഭാഗ്യം ദേശികസഞ്ചിതം മമ കദാ സമ്പാദയേദംബികേ .. 15
തന്വാനം നിജകേലിസൗധസരണിം നൈസർഗികീണാം ഗിരാം
കേദാരം കവിമല്ലസൂക്തിലഹരീസസ്യശ്രിയാം ശാശ്വതം .
അംഹോവഞ്ചനചുഞ്ചു കിഞ്ചന ഭജേ കാഞ്ചീപുരീമണ്ഡനം
പര്യായച്ഛവി പാകശാസനമണേഃ പൗഷ്പേഷവം പൗരുഷം .. 16
ആലോകേ മുഖപങ്കജേ ച ദധതീ സൗധാകരീം ചാതുരീം
ചൂഡാലങ്ക്രിയമാണപങ്കജവനീവൈരാഗമപ്രക്രിയാ .
മുഗ്ധസ്മേരമുഖീ ഘനസ്തനതടീമൂർച്ഛാലമധ്യാഞ്ചിതാ
കാഞ്ചീസീമനി കാമിനീ വിജയതേ കാചിജ്ജഗന്മോഹിനീ .. 17
യസ്മിന്നംബ ഭവത്കടാക്ഷരജനീ മന്ദേsപി മന്ദസ്മിത-
ജ്യോത്സ്നാസംസ്നപിതാ ഭവത്യഭിമുഖീ തം പ്രത്യഹോ ദേഹിനം .
ദ്രാക്ഷാമാക്ഷികമാധുരീമദഭരവ്രീഡാകരീ വൈഖരീ
കാമാക്ഷി സ്വയമാതനോത്യഭിസൃതിം വാമേക്ഷണേവ ക്ഷണം .. 18
കാലിന്ദീജലകാന്തയഃ സ്മിതരുചിസ്വർവാഹിനീപാഥസി
പ്രൗഢധ്വാന്തരുചഃ സ്ഫുടാധരമഹോലൗഹിത്യസന്ധ്യോദയേ .
മാണിക്യോപലകുണ്ഡലാംശുശിഖിനി വ്യാമിശ്രധൂമശ്രിയഃ
കല്യാണൈകഭുവഃ കടാക്ഷസുഷമാഃ കാമാക്ഷി രാജന്തി തേ .. 19
കലകലരണത്കാഞ്ചീ കാഞ്ചീവിഭൂഷണമാലികാ
കചഭരലസച്ചന്ദ്രാ ചന്ദ്രാവതംസസധർമിണീ .
കവികുലഗിരഃ ശ്രാവംശ്രാവം മിലത്പുലകാങ്കുരാ
വിരചിതശിരഃകമ്പാ കമ്പാതടേ പരിശോഭതേ .. 20
സരസവചസാം വീചീ നീചീഭവന്മധുമാധുരീ
ഭരിതഭുവനാ കീർതിർമൂർതിർമനോഭവജിത്വരീ .
ജനനി മനസോ യോഗ്യം ഭോഗ്യം നൃണാം തവ ജായതേ
കഥമിവ വിനാ കാഞ്ചീഭൂഷേ കടാക്ഷതരംഗിതം .. 21
ഭ്രമരിതസരിത്കൂലോ നീലോത്പലപ്രഭയാssഭയാ
നതജനതമഃഖണ്ഡീ തുണ്ഡീരസീമ്നി വിജൃംഭതേ .
അചലതപസാമേകഃ പാകഃ പ്രസൂനശരാസന-
പ്രതിഭടമനോഹാരീ നാരീകുലൈകശിഖാമണിഃ .. 22
മധുരവചസോ മന്ദസ്മേരാ മതംഗജഗാമിനഃ
തരുണിമജുഷസ്താപിച്ഛാഭാസ്തമഃപരിപന്ഥിനഃ .
കുചഭരനതാഃ കുര്യുർഭദ്രം കുരംഗവിലോചനാഃ
കലിതകരുണാഃ കാഞ്ചീഭാജഃ കപാലിമഹോത്സവാഃ .. 23
കമലസുഷമാകക്ഷ്യാരോഹേ വിചക്ഷണവീക്ഷണാഃ
കുമുദസുകൃതക്രീഡാചൂഡാലകുന്തലബന്ധുരാഃ .
രുചിരരുചിഭിസ്താപിഞ്ഛശ്രീപ്രപഞ്ചനചുഞ്ചവഃ
പുരവിജയിനഃ കമ്പാതീരേ സ്ഫുരന്തി മനോരഥാഃ .. 24
കലിതരതയഃ കാഞ്ചീലീലാവിധൗ കവിമണ്ഡലീ-
വചനലഹരീവാസന്തീനാം വസന്തവിഭൂതയഃ .
കുശലവിധയേ ഭൂയാസുർമേ കുരംഗവിലോചനാഃ
കുസുമവിശിഖാരാതേരക്ഷ്ണാം കുതൂഹലവിഭ്രമാഃ .. 25
കബലിതതമസ്കാണ്ഡാസ്തുണ്ഡീരമണ്ഡലമണ്ഡനാഃ
സരസിജവനീസന്താനാനാമരുന്തുദശേഖരാഃ .
നയനസരണേർനേദീയാംസഃ കദാ നു ഭവന്തി മേ
തരുണജലദശ്യാമാഃ ശംഭോസ്തപഃഫലവിഭ്രമാഃ .. 26
അചരമമിഷും ദീനം മീനധ്വജസ്യ മുഖശ്രിയാ
സരസിജഭുവോ യാനം മ്ലാനം ഗതേന ച മഞ്ജുനാ .
ത്രിദശസദസാമന്നം ഖിന്നം ഗിരാ ച വിതന്വതീ
തിലകയതി സാ കമ്പാതീരം ത്രിലോചനസുന്ദരീ .. 27
ജനനി ഭുവനേ ചങ്ക്രമ്യേsഹം കിയന്തമനേഹസം
കുപുരുഷകരഭ്രഷ്ടൈർദുഷ്ടൈർധനൈരുദരംഭരിഃ .
തരുണകരുണേ തന്ദ്രാശൂന്യേ തരംഗയ ലോചനേ
നമതി മയി തേ കിഞ്ചിത്കാഞ്ചീപുരീമണിദീപികേ .. 28
മുനിജനമനഃപേടീരത്നം സ്ഫുരത്കരുണാനടീ-
വിഹരണകലാഗേഹം കാഞ്ചീപുരീമണിഭൂഷണം .
ജഗതി മഹതോ മോഹവ്യാധേർനൃണാം പരമൗഷധം
പുരഹരദൃശാം സാഫല്യം മേ പുരഃ പരിജൃംഭതാം .. 29
മുനിജനമനോധാമ്നേ ധാമ്നേ വചോമയജാഹ്നവീ-
ഹിമഗിരിതടപ്രാഗ്ഭാരായാക്ഷരായ പരാത്മനേ .
വിഹരണജുഷേ കാഞ്ചീദേശേ മഹേശ്വരലോചന-
ത്രിതയസരസക്രീഡാസൗധാംഗണായ നമോ നമഃ .. 30
മരകതരുചാം പ്രത്യാദേശം മഹേശ്വരചക്ഷുഷാം
അമൃതലഹരീപൂരം പാരം ഭവാഖ്യപയോനിധേഃ .
സുചരിതഫലം കാഞ്ചീഭാജോ ജനസ്യ പചേലിമം
ഹിമശിഖരിണോ വംശസ്യൈകം വതംസമുപാസ്മഹേ .. 31
പ്രണമനദിനാരംഭേ കമ്പാനദീസഖി താവകേ
സരസകവിതോന്മേഷഃ പൂഷാ സതാം സമുദഞ്ചിതഃ .
പ്രതിഭടമഹാപ്രൗഢപ്രോദ്യത്കവിത്വകുമുദ്വതീം
നയതി തരസാ നിദ്രാമുദ്രാം നഗേശ്വരകന്യകേ .. 32
ശമിതജഡിമാരംഭാ കമ്പാതടീനികടേചരീ
നിഹതദുരിതസ്തോമാ സോമാർധമുദ്രിതകുന്തലാ .
ഫലിതസുമനോവാഞ്ഛാ പാഞ്ചായുധീ പരദേവതാ
സഫലയതു മേ നേത്രേ ഗോത്രേശ്വരപ്രിയനന്ദിനീ .. 33
മമ തു ധിഷണാ പീഡ്യാ ജാഡ്യാതിരേക കഥം ത്വയാ
കുമുദസുഷമാമൈത്രീപാത്രീവതംസിതകുന്തലാം .
ജഗതി ശമിതസ്തംഭാം കമ്പാനദീനിലയാമസൗ
ശ്രയതി ഹി ഗലത്തന്ദ്രാ ചന്ദ്രാവതംസസധർമിണീം .. 34
പരിമലപരീപാകോദ്രേകം പയോമുചി കാഞ്ചനേ
ശിഖരിണി പുനർദ്വൈധീഭാവം ശശിന്യരുണാതപം .
അപി ച ജനയൻകംബോർലക്ഷ്മീമനംബുനി കോsപ്യസൗ
കുസുമധനുഷഃ കാഞ്ചീദേശേ ചകാസ്തി പരാക്രമഃ .. 35
പുരദമയിതുർവാമോത്സംഗസ്ഥലേന രസജ്ഞയാ
സരസകവിതാഭാജാ കാഞ്ചീപുരോദരസീമയാ .
തടപരിസരൈർനീഹാരാദ്രേർവചോഭിരകൃത്രിമൈഃ
കിമിവ ന തുലാമസ്മച്ചേതോ മഹേശ്വരി ഗാഹതേ .. 36
നയനയുഗലീമാസ്മാകീനാം കദാ നു ഫലേഗ്രഹീം
വിദധതി ഗതൗ വ്യാകുർവാണാ ഗജേന്ദ്രചമത്ക്രിയാം .
മരകതരുചോ മാഹേശാനാ ഘനസ്തനനമ്രിതാഃ
സുകൃതവിഭവാഃ പ്രാഞ്ചഃ കാഞ്ചീവതംസധുരന്ധരാഃ .. 37
മനസിജയശഃപാരമ്പര്യം മരന്ദഝരീകിരാം
കവികുലഗിരാം കന്ദം കമ്പാനദീതടമണ്ഡനം .
മധുരലലിതം മത്കം ചക്ഷുർമനീഷിമനോഹരം
പുരവിജയിനഃ സർവസ്വം തത്പുരസ്കുരുതേ കദാ .. 38
ശിഥിലിതതമോലീലാം നീലാരവിന്ദവിലോചനാം
ദഹനവിലസത്ഫാലാം ശ്രീകാമകോടിമുപാസ്മഹേ .
കരധൃതലസച്ഛൂലാം കാലാരിചിത്തഹരാം പരാം
മനസിജകൃപാലീലാം ലോലാലകാമലികേക്ഷണാം .. 39
കലാലീലാശാലാ കവികുലവചഃകൈരവവനീ-
ശരജ്ജ്യോത്സ്നാധാരാ ശശധരശിശുശ്ലാഘ്യമുകുടീ .
പുനീതേ നഃ കമ്പാപുലിനതടസൗഹാർദതരലാ
കദാ ചക്ഷുർമാർഗം കനകഗിരിധാനുഷ്കമഹിഷീ .. 40
നമഃ സ്താന്നമ്രേഭ്യഃ സ്തനഗരിമഗർവേണ ഗുരുണാ
ദധാനേഭ്യശ്ചൂഡാഭരണമമൃതസ്യന്ദി ശിശിരം .
സദാ വാസ്തവ്യേഭ്യഃ സവിധഭുവി കമ്പാഖ്യസരിതോ
യശോവ്യാപാരേഭ്യഃ സുകൃതവിഭവേഭ്യോ രതിപതേഃ .. 41
അസൂയന്തീ കാചിന്മരകതരുചേ നാകിമുകുടീ-
കദംബം ചുംബന്തീ ചരണനഖചന്ദ്രാംശുപടലൈഃ .
തമോമുദ്രാം വിദ്രാവയതു മമ കാഞ്ചീനിലയനാ
ഹരോത്സംഗശ്രീമന്മണിഗൃഹമഹാദീപകലികാ .. 42
അനാദ്യന്താ കാചിത്സുജനനയനാനന്ദജനനീ
നിരുന്ധാനാ കാന്തിം നിജരുചിവിലാസൈർജലമുചാം .
സ്മരാരേസ്താരല്യം മനസി ജനയന്തീ സ്വയമഹോ
ഗലത്കമ്പാ ശമ്പാ പരിലസതി കമ്പാപരിസരേ .. 43
സുധാഡിണ്ഡീരശ്രീഃ സ്മിതരുചിഷു തുണ്ഡീരവിഷയം
പരിഷ്കുർവാണാസൗ പരിഹസിതനീലോത്പലരുചിഃ .
സ്തനാഭ്യാമാനമ്രാ സ്തബകയതു മേ കാങ്ക്ഷിതതരും
ദൃശാമൈശാനീനാം സുകൃതഫലപാണ്ഡിത്യഗരിമാ .. 44
കൃപാധാരാദ്രോണീ കൃപണധിഷണാനാം പ്രണമതാം
നിഹന്ത്രീ സന്താപം നിഗമമുകുടോത്തംസകലികാ .
പരാ കാഞ്ചീലീലാപരിചയവതീ പർവതസുതാ
ഗിരാം നീവീ ദേവീ ഗിരിശപരതന്ത്രാ വിജയതേ .. 45
കവിത്വശ്രീകന്ദഃ സുകൃതപരിപാടീ ഹിമഗിരേഃ
വിധാത്രീ വിശ്വേഷാം വിഷമശരവീരധ്വജപടീ .
സഖീ കമ്പാനദ്യാഃ പദഹസിതപാഥോജയുഗലീ
പുരാണീ പായാന്നഃ പുരമഥനസാമ്രാജ്യപദവീ .. 46
ദരിദ്രാണാ മധ്യേ ദരദലിതതാപിഞ്ഛസുഷമാഃ
സ്തനാഭോഗക്ലാന്താസ്തരുണഹരിണാങ്കാങ്കിതകചാഃ .
ഹരാധീനാ നാനാവിബുധമുകുടീചുംബിതപദാഃ
കദാ കമ്പാതീരേ കഥയ വിഹരാമോ ഗിരിസുതേ .. 47
വരീവർതു സ്ഥേമാ ത്വയി മമ ഗിരാം ദേവി മനസോ
നരീനർതു പ്രൗഢാ വദനകമലേ വാക്യലഹരീ .
ചരീചർതു പ്രജ്ഞാജനനി ജഡിമാ നഃ പരജനേ
സരീസർതു സ്വൈരം ജനനി മയി കാമാക്ഷി കരുണാ .. 48
ക്ഷണാത്തേ കാമാക്ഷി ഭ്രമരസുഷമാശിക്ഷണഗുരുഃ
കടാക്ഷവ്യാക്ഷേപോ മമ ഭവതു മോക്ഷായ വിപദാം .
നരീനർതു സ്വൈരം വചനലഹരീ നിർജരപുരീ-
സരിദ്വീചീനീചീകരണപടുരാസ്യേ മമ സദാ .. 49
പുരസ്താന്മേ ഭൂയഃപ്രശമനപരഃ സ്താന്മമ രുജാം
പ്രചാരസ്തേ കമ്പാതടവിഹൃതിസമ്പാദിനി ദൃശോഃ .
ഇമാം യാച്ഞാമൂരീകുരു സപദി ദൂരീകുരു തമഃ-
പരീപാകം പാകം ഝടിതി ബുധലോകം ച നയ മാം .. 50
ഉദഞ്ചന്തീ കാഞ്ചീനഗരനിലയേ ത്വത്കരുണയാ
സമൃദ്ധാ വാഗ്ധാടീ പരിഹസിതമാധ്വീ കവയതാം .
ഉപാദത്തേ മാരപ്രതിഭടജടാജൂടമുകുടീ-
കുടീരോല്ലാസിന്യാഃ ശതമഖതടിന്യാ ജയപടീം .. 51
ശ്രിയം വിദ്യാം ദദ്യാജ്ജനനി നമതാം കീർതിമമിതാം
സുപുത്രാൻ പ്രാദത്തേ തവ ഝടിതി കാമാക്ഷി കരുണാ .
ത്രിലോക്യാമാധിക്യം ത്രിപുരപരിപന്ഥിപ്രണയിനി
പ്രണാമസ്ത്വത്പാദേ ശമിതദുരിതേ കിം ന കുരുതേ .. 52
മനഃകമ്പം കമ്പം ഗമയദുപകമ്പം പ്രണമതാം
സദാ ലോലം നീലം ചികുരജിതലോലംബനികരം .
ഗിരാം ദൂരം സ്മേരം ധൃതശശികിശോരം പശുപതേഃ
ദൃശാം യോഗ്യം ഭോഗ്യം തുഹിനഗിരിഭാഗ്യം വിജയതേ .. 53
ഘനശ്യാമാൻകാമാന്തകമഹിഷി കാമാക്ഷി മധുരാൻ
ദൃശാം പാതാനേതാനമൃതജലശീതാനനുപമാൻ .
ഭവോത്പാതേ ഭീതേ മയി വിതര ജാതേ ദൃഢഭവൻ
മനശ്ശോകേ മൂകേ ഹിമഗിരിപതാകേ കരുണയാ .. 54
നതാനാം മന്ദാനാം ഭവനിഗലബന്ധാകുലധിയാം
മഹാന്ധ്യം രുന്ധാനാമഭിലഷിതസന്താനലതികാം .
ചരന്തീം കമ്പായാസ്തടഭുവി സവിത്രീം ത്രിജഗതാം
സ്മരാമസ്താം നിത്യം സ്മരമഥനജീവാതുകലികാം .. 55
പരാ വിദ്യാ ഹൃദ്യാശ്രിതമദനവിദ്യാ മരകത-
പ്രഭാനീലാ ലീലാപരവശിതശൂലായുധമനാഃ .
തമഃപൂരം ദൂരം ചരണനതപൗരന്ദരപുരീ-
മൃഗാക്ഷീ കാമാക്ഷീ കമലതരലാക്ഷീ നയതു മേ .. 56
അഹന്താഖ്യാ മത്കം കബലയതി ഹാ ഹന്ത ഹരിണീ
ഹഠാത്സംവിദ്രൂപം ഹരമഹിഷി സസ്യാങ്കുരമസൗ .
കടാക്ഷവ്യാക്ഷേപപ്രകടഹരിപാഷാണശകലൈഃ
ഇമാമുച്ചൈരുച്ചാടയ ഝടിതി കാമാക്ഷി കൃപയാ .. 57
ബുധേ വാ മൂകേ വാ തവ പതതി യസ്മിൻക്ഷണമസൗ
കടാക്ഷഃ കാമാക്ഷി പ്രകടജഡിമക്ഷോദപടിമാ .
കഥങ്കാരം നാസ്മൈ കരമുകുലചൂഡാലമുകുടാ
നമോവാകം ബ്രൂയുർനമുചിപരിപന്ഥിപ്രഭൃതയഃ .. 58
പ്രതീചീം പശ്യാമഃ പ്രകടരുചിനീവാരകണിശ-
പ്രഭാസധ്രീചീനാം പ്രദലിതഷഡാധാരകമലാം .
ചരന്തീം സൗഷുമ്നേ പഥി പരപദേന്ദുപ്രവിഗലത്
സുധാർദ്രാം കാമാക്ഷീം പരിണതപരഞ്ജ്യോതിരുദയാം .. 59
ജംഭാരാതിപ്രഭൃതിമുകുടീഃ പാദയോഃ പീഠയന്തീ
ഗുംഫാന്വാചാം കവിജനകൃതാൻസ്വൈരമാരാമയന്തീ .
ശമ്പാലക്ഷ്മീം മണിഗണരുചാപാടലൈഃ പ്രാപയന്തീ
കമ്പാതീരേ കവിപരിഷദാം ജൃംഭതേ ഭാഗ്യസീമാ .. 60
ചന്ദ്രാപീഡാം ചതുരവദനാം ചഞ്ചലാപാംഗലീലാം
കുന്ദസ്മേരാം കുചഭരനതാം കുന്തലോദ്ധൂതഭൃംഗാം .
മാരാരാതേർമദനശിഖിനം മാംസലം ദീപയന്തീം
കാമാക്ഷീം താം കവികുലഗിരാം കൽപവല്ലീമുപാസേ .. 61
കാലാംഭോദപ്രകരസുഷമാം കാന്തിഭിസ്തർജയന്തീ
കല്യാണാനാമുദയസരണിഃ കൽപവല്ലീ കവീനാം .
കന്ദർപാരേഃ പ്രിയസഹചരീ കൽമഷാണാം നിഹന്ത്രീ
കാഞ്ചീദേശം തിലകയതി സാ കാപി കാരുണ്യസീമാ .. 62
ഊരീകുർവന്നുരസിജതടേ ചാതുരീം ഭൂധരാണാം
പാഥോജാനാം നയനയുഗലേ പാരിപന്ഥ്യം വിതന്വൻ .
കമ്പാതീരേ വിഹരതി രുചാ മോഘയന്മേഘശൈലീം
കോകദ്വേഷം ശിരസി കലയൻകോsപി വിദ്യാവിശേഷഃ .. 63
കാഞ്ചീലീലാപരിചയവതീ കാപി താപിഞ്ഛലക്ഷ്മീഃ
ജാഡ്യാരണ്യേ ഹുതവഹശിഖാ ജന്മഭൂമിഃ കൃപായാഃ .
മാകന്ദശ്രീർമധുരകവിതാചാതുരീ കോകിലാനാം
മാർഗേ ഭൂയാന്മമ നയനയോർമാന്മഥീ കാപി വിദ്യാ .. 64
സേതുർമാതർമരകതമയോ ഭക്തിഭാജാം ഭവാബ്ധൗ
ലീലാലോലാ കുവലയമയീ മാന്മഥീ വൈജയന്തീ .
കാഞ്ചീഭൂഷാ പശുപതിദൃശാം കാപി കാലാഞ്ജനാലീ
മത്കം ദുഃഖം ശിഥിലയതു തേ മഞ്ജുലാപാംഗമാലാ .. 65
വ്യാവൃണ്വാനാഃ കുവലയദലപ്രക്രിയാവൈരമുദ്രാം
വ്യാകുർവാണാ മനസിജമഹാരാജസാമ്രാജ്യലക്ഷ്മീം .
കമ്പാതീരേ വിഹൃതിരസികേ കാങ്ക്ഷിതം നഃ ക്രിയാസുഃ
ബന്ധച്ഛേദേ തവ നിയമിനാം ബദ്ധദീക്ഷാഃ കടാക്ഷാഃ .. 66
കാലാംഭോദേ ശശിരുചി ദലം കൈതകം ദർശയന്തീ
മധ്യേസൗദാമിനി മധുലിഹാം മാലികാം രാജയന്തീ .
ഹംസാരാവം വികചകമലേ മഞ്ജുമുല്ലാസയന്തീ
കമ്പാതീരേ വിലസതി നവാ കാപി കാരുണ്യലക്ഷ്മീഃ .. 67
ചിത്രം ചിത്രം നിജമൃദുതയാ തർജയൻപല്ലവാലിം
പുംസാം കാമാൻഭുവി ച നിയതം പൂരയൻപുണ്യഭാജാം .
ജാതഃ ശൈലാന്ന തു ജലനിധേഃ സ്വൈരസഞ്ചാരശീലഃ
കാഞ്ചീഭൂഷാ കലയതു ശിവം കോsപി ചിന്താമണിർമേ .. 68
താമ്രാംഭോജം ജലദനികടേ തത്ര ബന്ധൂകപുഷ്പം
തസ്മിന്മല്ലീകുസുമസുഷമാം തത്ര വീണാനിനാദം .
വ്യാവൃന്വാനാ സുകൃതലഹരീ കാപി കാഞ്ചീനഗര്യാം
ഐശാനീ സാ കലയതിതരാമൈന്ദ്രജാലം വിലാസം .. 69
ആഹാരാംശം ത്രിദശസദസാമാശ്രയേ ചാതകാനാം
ആകാശോപര്യപി ച കലയന്നാലയം തുംഗമേഷാം .
കമ്പാതീരേ വിഹരതിതരാം കാമധേനുഃ കവീനാം
മന്ദസ്മേരോ മദനനിഗമപ്രക്രിയാസമ്പ്രദായഃ .. 70
ആർദ്രീഭൂതൈരവിരലകൃപൈരാത്തലീലാവിലാസൈഃ
ആസ്ഥാപൂർണൈരധികചപലൈരഞ്ചിതാംഭോജശിൽപൈഃ .
കാന്തൈർലക്ഷ്മീലലിതഭവനൈഃ കാന്തികൈവല്യസാരൈഃ
കാശ്മല്യം നഃ കബലയതു സാ കാമകോടീ കടാക്ഷൈഃ .. 71
ആധൂന്വന്ത്യൈ തരലനയനൈരാംഗജീം വൈജയന്തീം
ആനന്ദിന്യൈ നിജപദജുഷാമാത്തകാഞ്ചീപുരായൈ .
ആസ്മാകീനം ഹൃദയമഖിലൈരാഗമാനാം പ്രപഞ്ചൈഃ
ആരാധ്യായൈ സ്പൃഹയതിതരാമദിമായൈ ജനന്യൈ .. 72
ദൂരം വാചാം ത്രിദശസദസാം ദുഃഖസിന്ധോസ്തരിത്രം
മോഹക്ഷ്വേലക്ഷിതിരുഹവനേ ക്രൂരധാരം ലവിത്രം .
കമ്പാതീരപ്രണയി കവിഭിർവർണിതോദ്യച്ചരിത്രം
ശാന്ത്യൈ സേവേ സകലവിപദാം ശാങ്കരം സത്കലത്രം .. 73
ഖണ്ഡീകൃത്യ പ്രകൃതികുടിലം കൽമഷം പ്രാതിഭശ്രീ-
ശുണ്ഡീരത്വം നിജപദജുഷാം ശൂന്യതന്ദ്രം ദിശന്തീ .
തുണ്ഡീരാഖ്യേ മഹതി വിഷയേ സ്വർണവൃഷ്ടിപ്രദാത്രീ
ചണ്ഡീ ദേവീ കലയതി രതിം ചന്ദ്രചൂഡാലചൂഡേ .. 74
യേന ഖ്യാതോ ഭവതി സ ഗൃഹീ പൂരുഷോ മേരുധന്വാ
യദ്ദൃക്കോണേ മദനനിഗമപ്രാഭവം ബോഭവീതി .
യത്പ്രീത്യൈവ ത്രിജഗദധിപോ ജൃംഭതേ കിമ്പചാനഃ
കമ്പാതീരേ സ ജയതി മഹാൻകശ്ചിദോജോവിശേഷഃ .. 75
ധന്യാ ധന്യാ ഗതിരിഹ ഗിരാം ദേവി കാമാക്ഷി യന്മേ
നിന്ദ്യാം ഭിന്ദ്യാത്സപദി ജഡതാം കൽമഷാദുന്മിഷന്തീം .
സാധ്വീ മാധ്വീരസമധുരതാഭഞ്ജിനീ മഞ്ജുരീതിഃ
വാണീവേണീ ഝടിതി വൃണുതാത്സ്വർധുനീസ്പർധിനീ മാം .. 76
യസ്യാ വാടീ ഹൃദയകമലം കൗസുമീ യോഗഭാജാം
യസ്യാഃ പീഠീ സതതശിശിരാ ശീകരൈർമാകരന്ദൈഃ .
യസ്യാഃ പേടീ ശ്രുതിപരിചലന്മൗലിരത്നസ്യ കാഞ്ചീ
സാ മേ സോമാഭരണമഹിഷീ സാധയേത്കാങ്ക്ഷിതാനി .. 77
ഏകാ മാതാ സകലജഗതാമേയുഷീ ധ്യാനമുദ്രാം
ഏകാമ്രാധീശ്വരചരണയോരേകതാനാ സമിന്ധേ .
താടങ്കോദ്യന്മണിഗണരുചാ താമ്രകർണപ്രദേശാ
താരുണ്യശ്രീസ്തബകിതതനുസ്താപസീ കാപി ബാലാ .. 78
ദന്താദന്തിപ്രകടനകരീ ദന്തിഭിർമന്ദയാനൈഃ
മന്ദാരാണാം മദപരിണതിം മഥ്നതീ മന്ദഹാസൈഃ .
അങ്കൂരാഭ്യാം മനസിജതരോരങ്കിതോരാഃ കുചാഭ്യാം
അന്തഃകാഞ്ചി സ്ഫുരതി ജഗതാമാദിമാ കാപി മാതാ .. 79
ത്രിയംബകകുടുംബിനീം ത്രിപുരസുന്ദരീമിന്ദിരാം
പുലിന്ദപതിസുന്ദരീം ത്രിപുരഭൈരവീം ഭാരതീം .
മതംഗകുലനായികാം മഹിഷമർദനീം മാതൃകാം
ഭണന്തി വിബുധോത്തമാ വിഹൃതിമേവ കാമാക്ഷി തേ .. 80
മഹാമുനിമനോനടീ മഹിതരമ്യകമ്പാതടീ-
കുടീരകവിഹാരിണീ കുടിലബോധസംഹാരിണീ .
സദാ ഭവതു കാമിനീ സകലദേഹിനാം സ്വാമിനീ
കൃപാതിശയകിങ്കരീ മമ വിഭൂതയേ ശാങ്കരീ .. 81
ജഡാഃ പ്രകൃതിനിർധനാ ജനവിലോചനാരുന്തുദാ
നരാ ജനനി വീക്ഷണം ക്ഷണമവാപ്യ കാമാക്ഷി തേ .
വചസ്സു മധുമാധുരീം പ്രകടയന്തി പൗരന്ദരീ-
വിഭൂതിഷു വിഡംബനാം വപുഷി മാന്മഥീം പ്രക്രിയാം .. 82
ഘനസ്തനതടസ്ഫുടസ്ഫുരിതകഞ്ചുലീചഞ്ചലീ-
കൃതത്രിപുരശാസനാ സുജനശീലിതോപാസനാ .
ദൃശോഃ സരണിമശ്നുതേ മമ കദാ നു കാഞ്ചീപുരേ
പരാ പരമയോഗിനാം മനസി ചിത്കലാ പുഷ്കലാ .. 83
കവീന്ദ്രഹൃദയേചരീ പരിഗൃഹീതകാഞ്ചീപുരീ
നിരൂഢകരുണാഝരീ നിഖിലലോകരക്ഷാകരീ .
മനഃപഥദവീയസീ മദനശാസനപ്രേയസീ
മഹാഗുണഗരീയസീ മമ ദൃശോsസ്തു നേദീയസീ .. 84
ധനേന ന രമാമഹേ ഖലജനാന്ന സേവാമഹേ
ന ചാപലമയാമഹേ ഭവഭയാന്ന ദൂയാമഹേ .
സ്ഥിരാം തനുമഹേതരാം മനസി കിം ച കാഞ്ചീരത-
സ്മരാന്തകകുടുംബിനീചരണപല്ലവോപാസനാം .. 85
സുരാഃ പരിജനാ വപുർമനസിജായ വൈരായതേ
ത്രിവിഷ്ടപനിതംബിനീകുചതടീ ച കേലീഗിരിഃ .
ഗിരഃ സുരഭയോ വയസ്തരുണിമാ ദരിദ്രസ്യ വാ
കടാക്ഷസരണൗ ക്ഷണം നിപതിതസ്യ കാമാക്ഷി തേ .. 86
പവിത്രയ ജഗത്ത്രയീവിബുധബോധജീവാതുഭിഃ
പുരത്രയവിമർദിനഃ പുലകകഞ്ചുലീദായിഭിഃ .
ഭവക്ഷയവിചക്ഷണൈർവ്യസനമോക്ഷണൈർവീക്ഷണൈഃ
നിരക്ഷരശിരോമണിം കരുണയൈവ കാമാക്ഷി മാം .. 87
കദാ കലിതഖേലനാഃ കരുണയൈവ കാഞ്ചീപുരേ
കലായമുകുലത്വിഷഃ ശുഭകദംബപൂർണാങ്കുരാഃ .
പയോധരഭരാലസാഃ കവിജനേഷു തേ ബന്ധുരാഃ
പചേലിമകൃപാരസാ പരിപതന്തി മാർഗേ ദൃശോഃ .. 88
അശോധ്യമചലോദ്ഭവം ഹൃദയനന്ദനം ദേഹിനാം
അനർഘമധികാഞ്ചി തത്കിമപി രത്നമുദ്ദ്യോതതേ .
അനേന സമലങ്കൃതാ ജയതി ശങ്കരാങ്കസ്ഥലീ
കദാസ്യ മമ മാനസം വ്രജതി പേടികാവിഭ്രമം .. 89
പരാമൃതഝരീപ്ലുതാ ജയതി നിത്യമന്തശ്ചരീ
ഭുവാമപി ബഹിശ്ചരീ പരമസംവിദേകാത്മികാ .
മഹദ്ഭിരപരോക്ഷിതാ സതതമേവ കാഞ്ചീപുരേ
മമാന്വഹമഹംമതിർമനസി ഭാതു മാഹേശ്വരീ .. 90
തമോവിപിനധാവിനം സതതമേവ കാഞ്ചീപുരേ
വിഹാരരസികാ പരാ പരമസംവിദുർവീരുഹം .
കടാക്ഷനിഗലൈർദൃഢം ഹൃദയദുഷ്ടദന്താവലം
ചിരം നയതു മാമകം ത്രിപുരവൈരിസീമന്തിനീ .. 91
ത്വമേവ സതി ചണ്ഡികാ ത്വമസി ദേവി ചാമുണ്ഡികാ
ത്വമേവ പരമാതൃകാ ത്വമപി യോഗിനീരൂപിണീ .
ത്വമേവ കില ശാംഭവീ ത്വമസി കാമകോടീ ജയാ
ത്വമേവ വിജയാ ത്വയി ത്രിജഗദംബ കിം ബ്രൂമഹേ .. 92
പരേ ജനനി പാർവതി പ്രണതപാലിനി പ്രാതിഭ-
പ്രദാത്രി പരമേശ്വരി ത്രിജഗദാശ്രിതേ ശാശ്വതേ .
ത്രിയംബകകുടുംബിനി ത്രിപദസംഗിനി ത്രീക്ഷണേ
ത്രിശക്തിമയി വീക്ഷണം മയി നിധേഹി കാമാക്ഷി തേ .. 93
മനോമധുകരോത്സവം വിദധതീ മനീഷാജുഷാം
സ്വയമ്പ്രഭവവൈഖരീവിപിനവീഥികാലംബിനീ .
അഹോ ശിശിരിതാ കൃപാമധുരസേന കമ്പാതടേ
ചരാചരവിധായിനീ ചരതി കാപി ചിന്മഞ്ജരീ .. 94
കലാവതി കലാഭൃതോ മുകുടസീമ്നി ലീലാവതി
സ്പൃഹാവതി മഹേശ്വരേ ഭുവനമോഹനേ ഭാസ്വതി .
പ്രഭാവതി രമേ സദാ മഹിതരൂപശോഭാവതി
ത്വരാവതി പരേ സതാം ഗുരുകൃപാംബുധാരാവതി .. 95
ത്വയൈവ ജഗദംബയാ ഭുവനമണ്ഡലം സൂയതേ
ത്വയൈവ കരുണാർദ്രയാ തദപി രക്ഷണം നീയതേ .
ത്വയൈവ ഖരകോപയാ നയനപാവകേ ഹൂയതേ
ത്വയൈവ കില നിത്യയാ ജഗതി സന്തതം സ്ഥീയതേ .. 96
ചരാചരജഗന്മയീം സകലഹൃന്മയീം ചിന്മയീം
ഗുണത്രയമയീം ജഗത്ത്രയമയീം ത്രിധാമാമയീം .
പരാപരമയീം സദാ ദശദിശാം നിശാഹർമയീം
പരാം സതതസന്മയീം മനസി ചിന്മയീം ശീലയേ .. 97
ജയ ജഗദംബികേ ഹരകുടുംബിനി വക്ത്രരുചാ
ജിതശരദംബുജേ ഘനവിഡംബിനി കേശരുചാ .
പരമവലംബനം കുരു സദാ പരരൂപധരേ
മമ ഗതസംവിദോ ജഡിമഡംബരതാണ്ഡവിനഃ .. 98
ഭുവനജനനി ഭൂഷാഭൂതചന്ദ്രേ നമസ്തേ
കലുഷശമനി കമ്പാതീരഗേഹേ നമസ്തേ .
നിഖിലനിഗമവേദ്യേ നിത്യരൂപേ നമസ്തേ
പരശിവമയി പാശച്ഛേദഹസ്തേ നമസ്തേ .. 99
ക്വണത്കാഞ്ചീ കാഞ്ചീപുരമണിവിപഞ്ചീലയഝരീ-
ശിരഃകമ്പാ കമ്പാവസതിരനുകമ്പാജലനിധിഃ .
ഘനശ്യാമാ ശ്യാമാ കഠിനകുചസീമാ മനസി മേ
മൃഗാക്ഷീ കാമാക്ഷീ ഹരനടനസാക്ഷീ വിഹരതാത് .. 100
സമരവിജയകോടീ സാധകാനന്ദധാടീ
മൃദുഗുണപരിപേടീ മുഖ്യകാദംബവാടീ .
മുനിനുതപരിപാടീ മോഹിതാജാണ്ഡകോടീ
പരമശിവവധൂടീ പാതു മാം കാമകോടീ .. 101
ഇമം പരവരപ്രദം പ്രകൃതിപേശലം പാവനം
പരാപരചിദാകൃതിപ്രകടനപ്രദീപായിതം .
സ്തവം പഠതി നിത്യദാ മനസി ഭാവയന്നംബികാം
ജപൈരലമലം മഖൈരധികദേഹസംശോഷണൈഃ .. 102
.. ഇതി സ്തുതിശതകം സമ്പൂർണം ..
കടാക്ഷശതകം
മോഹാന്ധകാരനിവഹം വിനിഹന്തുമീഡേ
മൂകാത്മനാമപി മഹാകവിതാവദാന്യാൻ .
ശ്രീകാഞ്ചിദേശശിശിരീകൃതിജാഗരൂകാൻ
ഏകാമ്രനാഥതരുണീകരുണാവലോകാൻ .. 1
മാതർജയന്തി മമതാഗ്രഹമോക്ഷണാനി
മാഹേന്ദ്രനീലരുചിശിക്ഷണദക്ഷിണാനി .
കാമാക്ഷി കൽപിതജഗത്ത്രയരക്ഷണാനി
ത്വദ്വീക്ഷണാനി വരദാനവിചക്ഷണാനി .. 2
ആനംഗതന്ത്രവിധിദർശിതകൗശലാനാം
ആനന്ദമന്ദപരിഘൂർണിതമന്ഥരാണാം .
താരല്യമംബ തവ താഡിതകർണസീമ്നാം
കാമാക്ഷി ഖേലതി കടാക്ഷനിരീക്ഷണാനാം .. 3
കല്ലോലിതേന കരുണാരസവേല്ലിതേന
കൽമാഷിതേന കമനീയമൃദുസ്മിതേന .
മാമഞ്ചിതേന തവ കിഞ്ചന കുഞ്ചിതേന
കാമാക്ഷി തേന ശിശിരീകുരു വീക്ഷിതേന .. 4
സാഹായ്യകം ഗതവതീ മുഹുരർജുനസ്യ
മന്ദസ്മിതസ്യ പരിതോഷിതഭീമചേതാഃ .
കാമാക്ഷി പാണ്ഡവചമൂരിവ താവകീനാ
കർണാന്തികം ചലതി ഹന്ത കടാക്ഷലക്ഷ്മീഃ .. 5
അസ്തം ക്ഷണാന്നയതു മേ പരിതാപസൂര്യം
ആനന്ദചന്ദ്രമസമാനയതാം പ്രകാശം .
കാലാന്ധകാരസുഷമാം കലയന്ദിഗന്തേ
കാമാക്ഷി കോമലകടാക്ഷനിശാഗമസ്തേ .. 6
താടങ്കമൗക്തികരുചാങ്കുരദന്തകാന്തിഃ
കാരുണ്യഹസ്തിപശിഖാമണിനാധിരൂഢഃ .
ഉന്മൂലയത്വശുഭപാദപമസ്മദീയം
കാമാക്ഷി താവകകടാക്ഷമതംഗജേന്ദ്രഃ .. 7
ഛായാഭരേണ ജഗതാം പരിതാപഹാരീ
താടങ്കരത്നമണിതല്ലജപല്ലവശ്രീഃ .
കാരുണ്യനാമ വികിരന്മകരന്ദജാലം
കാമാക്ഷി രാജതി കടാക്ഷസുരദ്രുമസ്തേ .. 8
സൂര്യാശ്രയപ്രണയിനീ മണികുണ്ഡലാംശു-
ലൗഹിത്യകോകനദകാനനമാനനീയാ .
യാന്തീ തവ സ്മരഹരാനനകാന്തിസിന്ധും
കാമാക്ഷി രാജതി കടാക്ഷകലിന്ദകന്യാ .. 9
പ്രാപ്നോതി യം സുകൃതിനം തവ പക്ഷപാതാത്
കാമാക്ഷി വീക്ഷണവിലാസകലാപുരന്ധ്രീ .
സദ്യസ്തമേവ കില മുക്തിവധൂർവൃണീതേ
തസ്മാന്നിതാന്തമനയോരിദമൈകമത്യം .. 10
യാന്തീ സദൈവ മരുതാമനുകൂലഭാവം
ഭ്രൂവല്ലിശക്രധനുരുല്ലസിതാ രസാർദ്രാ .
കാമാക്ഷി കൗതുകതരംഗിതനീലകണ്ഠാ
കാദംബിനീവ തവ ഭാതി കടാക്ഷമാലാ .. 11
ഗംഗാംഭസി സ്മിതമയേ തപനാത്മജേവ
ഗംഗാധരോരസി നവോത്പലമാലികേവ .
വക്ത്രപ്രഭാസരസി ശൈവലമണ്ഡലീവ
കാമാക്ഷി രാജതി കടാക്ഷരുചിച്ഛടാ തേ .. 12
സംസ്കാരതഃ കിമപി കന്ദലിതാൻ രസജ്ഞ-
കേദാരസീമ്നി സുധിയാമുപഭോഗയോഗ്യാൻ .
കല്യാണസൂക്തിലഹരീകലമാങ്കുരാന്നഃ
കാമാക്ഷി പക്ഷ്മലയതു ത്വദപാംഗമേഘഃ .. 13
ചാഞ്ചല്യമേവ നിയതം കലയൻപ്രകൃത്യാ
മാലിന്യഭൂഃ ശ്രുതിപഥാക്രമജാഗരൂകഃ .
കൈവല്യമേവ കിമു കൽപയതേ നതാനാം
കാമാക്ഷി ചിത്രമപി തേ കരുണാകടാക്ഷഃ .. 14
സഞ്ജീവനേ ജനനി ചൂതശിലീമുഖസ്യ
സംമോഹനേ ശശികിശോരകശേഖരസ്യ .
സംസ്തംഭനേ ച മമതാഗ്രഹചേഷ്ടിതസ്യ
കാമാക്ഷി വീക്ഷണകലാ പരമൗഷധം തേ .. 15
നീലോsപി രാഗമധികം ജനയൻപുരാരേഃ
ലോലോsപി ഭക്തിമധികാം ദ്രഢയന്നരാണാം .
വക്രോsപി ദേവി നമതാം സമതാം വിതന്വൻ
കാമാക്ഷി നൃത്യതു മയി ത്വദപാംഗപാതഃ .. 16
കാമദ്രുഹോ ഹൃദയയന്ത്രണജാഗരൂകാ
കാമാക്ഷി ചഞ്ചലദൃഗഞ്ചലമേഖലാ തേ .
ആശ്ചര്യമംബ ഭജതാം ഝടിതി സ്വകീയ-
സമ്പർക ഏവ വിധുനോതി സമസ്തബന്ധാൻ .. 17
കുണ്ഠീകരോതു വിപദം മമ കുഞ്ചിതഭ്രൂ-
ചാപാഞ്ചിതഃ ശ്രിതവിദേഹഭവാനുരാഗഃ .
രക്ഷോപകാരമനിശം ജനയഞ്ജഗത്യാം
കാമാക്ഷി രാമ ഇവ തേ കരുണാകടാക്ഷഃ .. 18
ശ്രീകാമകോടി ശിവലോചനശോഷിതസ്യ
ശൃംഗാരബീജവിഭവസ്യ പുനഃപ്രരോഹേ .
പ്രേമാംഭസാർദ്രമചിരാത്പ്രചുരേണ ശങ്കേ
കേദാരമംബ തവ കേവലദൃഷ്ടിപാതം .. 19
മാഹാത്മ്യശേവധിരസൗ തവ ദുർവിലംഘ്യ-
സംസാരവിന്ധ്യഗിരികുണ്ഠനകേലിചുഞ്ചുഃ .
ധൈര്യാംബുധിം പശുപതേശ്ചുലകീകരോതി
കാമാക്ഷി വീക്ഷണവിജൃംഭണകുംഭജന്മാ .. 20
പീയൂഷവർഷശിശിരാ സ്ഫുടദുത്പലശ്രീ-
മൈത്രീ നിസർഗമധുരാ കൃതതാരകാപ്തിഃ .
കാമാക്ഷി സംശ്രിതവതീ വപുരഷ്ടമൂർതേഃ
ജ്യോത്സ്നായതേ ഭഗവതി ത്വദപാംഗമാലാ .. 21
അംബ സ്മരപ്രതിഭടസ്യ വപുർമനോജ്ഞം
അംഭോജകാനനമിവാഞ്ചിതകണ്ടകാഭം .
ഭൃംഗീവ ചുംബതി സദൈവ സപക്ഷപാതാ
കാമാക്ഷി കോമലരുചിസ്ത്വദപാംഗമാലാ .. 22
കേശപ്രഭാപടലനീലവിതാനജാലേ
കാമാക്ഷി കുണ്ഡലമണിച്ഛവിദീപശോഭേ .
ശങ്കേ കടാക്ഷരുചിരംഗതലേ കൃപാഖ്യാ
ശൈലൂഷികാ നടതി ശങ്കരവല്ലഭേ തേ .. 23
അത്യന്തശീതലമതന്ദ്രയതു ക്ഷണാർധം
അസ്തോകവിഭ്രമമനംഗവിലാസകന്ദം .
അൽപസ്മിതാദൃതമപാരകൃപാപ്രവാഹം
അക്ഷിപ്രരോഹമചിരാന്മയി കാമകോടി .. 24
മന്ദാക്ഷരാഗതരലീകൃതിപാരതന്ത്ര്യാത്
കാമാക്ഷി മന്ഥരതരാം ത്വദപാംഗഡോലാം .
ആരുഹ്യ മന്ദമതികൗതുകശാലി ചക്ഷുഃ
ആനന്ദമേതി മുഹുരർധശശാങ്കമൗലേഃ .. 25
ത്രൈയംബകം ത്രിപുരസുന്ദരി ഹർമ്യഭൂമി-
രംഗം വിഹാരസരസീ കരുണാപ്രവാഹഃ .
ദാസാശ്ച വാസവമുഖാഃ പരിപാലനീയം
കാമാക്ഷി വിശ്വമപി വീക്ഷണഭൂഭൃതസ്തേ .. 26
വാഗീശ്വരീ സഹചരീ നിയമേന ലക്ഷ്മീഃ
ഭ്രൂവല്ലരീവശകരീ ഭുവനാനി ഗേഹം .
രൂപം ത്രിലോകനയനാമൃതമംബ തേഷാം
കാമാക്ഷി യേഷു തവ വീക്ഷണപാരതന്ത്രീ .. 27
മാഹേശ്വരം ഝടിതി മാനസമീനമംബ
കാമാക്ഷി ധൈര്യജലധൗ നിതരാം നിമഗ്നം .
ജാലേന ശൃംഖലയതി ത്വദപാംഗനാമ്നാ
വിസ്താരിതേന വിഷമായുധദാശകോsസൗ .. 28
ഉന്മഥ്യ ബോധകമലാകരമംബ ജാഡ്യ-
സ്തംബേരമം മമ മനോവിപിനേ ഭ്രമന്തം .
കുണ്ഠീകുരുഷ്വ തരസാ കുടിലാഗ്രസീമ്നാ
കാമാക്ഷി താവകകടാക്ഷമഹാങ്കുശേന .. 29
ഉദ്വേല്ലിതസ്തബകിതൈർലലിതൈർവിലാസൈഃ
ഉത്ഥായ ദേവി തവ ഗാഢകടാക്ഷകുഞ്ജാത് .
ദൂരം പലായയതു മോഹമൃഗീകുലം മേ
കാമാക്ഷി സത്വരമനുഗ്രഹകേസരീന്ദ്രഃ .. 30
സ്നേഹാർദ്രിതാം വിദലിതോത്പലകാന്തിചോരാം
ജേതാരമേവ ജഗദീശ്വരി ജേതുകാമഃ .
മാനോദ്ധതോ മകരകേതുരസൗ ധുനീതേ
കാമാക്ഷി താവകകടാക്ഷകൃപാണവല്ലീം .. 31
ശ്രൗതീം വ്രജന്നപി സദാ സരണിം മുനീനാം
കാമാക്ഷി സന്തതമപി സ്മൃതിമാർഗഗാമീ .
കൗടില്യമംബ കഥമസ്ഥിരതാം ച ധത്തേ
ചൗര്യം ച പങ്കജരുചാം ത്വദപാംഗപാതഃ .. 32
നിത്യം ശ്രുതേഃ പരിചിതൗ യതമാനമേവ
നീലോത്പലം നിജസമീപനിവാസലോലം .
പ്രീത്യൈവ പാഠയതി വീക്ഷണദേശികേന്ദ്രഃ
കാമാക്ഷി കിന്തു തവ കാലിമസമ്പ്രദായം .. 33
ഭ്രാന്ത്വാ മുഹുഃ സ്തബകിതസ്മിതഫേനരാശൗ
കാമാക്ഷി വക്ത്രരുചിസഞ്ചയവാരിരാശൗ .
ആനന്ദതി ത്രിപുരമർദനനേത്രലക്ഷ്മീഃ
ആലംബ്യ ദേവി തവ മന്ദമപാംഗസേതും .. 34
ശ്യാമാ തവ ത്രിപുരസുന്ദരി ലോചനശ്രീഃ
കാമാക്ഷി കന്ദലിതമേദുരതാരകാന്തിഃ .
ജ്യോത്സ്നാവതീ സ്മിതരുചാപി കഥം തനോതി
സ്പർധാമഹോ കുവലയൈശ്ച തഥാ ചകോരൈഃ .. 35
കാലാഞ്ജനം ച തവ ദേവി നിരീക്ഷണം ച
കാമാക്ഷി സാമ്യസരണിം സമുപൈതി കാന്ത്യാ .
നിശ്ശേഷനേത്രസുലഭം ജഗതീഷു പൂർവം
അന്യത്ത്രിനേത്രസുലഭം തുഹിനാദ്രികന്യേ .. 36
ധൂമാങ്കുരോ മകരകേതനപാവകസ്യ
കാമാക്ഷി നേത്രരുചിനീലിമചാതുരീ തേ .
അത്യന്തമദ്ഭുതമിദം നയനത്രയസ്യ
ഹർഷോദയം ജനയതേ ഹരിണാങ്കമൗലേഃ .. 37
ആരംഭലേശസമയേ തവ വീക്ഷണസ്യ
കാമാക്ഷി മൂകമപി വീക്ഷണമാത്രനമ്രം .
സർവജ്ഞതാ സകലലോകസമക്ഷമേവ
കീർതിസ്വയംവരണമാല്യവതീ വൃണീതേ .. 38
കാലാംബുവാഹ ഇവ തേ പരിതാപഹാരീ
കാമാക്ഷി പുഷ്കരമധഃകുരുതേ കടാക്ഷഃ .
പൂർവഃ പരം ക്ഷണരുചാ സമുപൈതി മൈത്രീം
അന്യസ്തു സന്തതരുചിം പ്രകടീകരോതി .. 39
സൂക്ഷ്മേsപി ദുർഗമതരേsപി ഗുരുപ്രസാദ-
സാഹായ്യകേന വിചരന്നപവർഗമാർഗേ .
സംസാരപങ്കനിചയേ ന പതത്യമൂം തേ
കാമാക്ഷി ഗാഢമവലംബ്യ കടാക്ഷയഷ്ടിം .. 40
കാമാക്ഷി സന്തതമസൗ ഹരിനീലരത്ന-
സ്തംഭേ കടാക്ഷരുചിപുഞ്ജമയേ ഭവത്യാഃ .
ബദ്ധോsപി ഭക്തിനിഗലൈർമമ ചിത്തഹസ്തീ
സ്തംഭം ച ബന്ധമപി മുഞ്ചതി ഹന്ത ചിത്രം .. 41
കാമാക്ഷി കാർഷ്ണ്യമപി സന്തതമഞ്ജനം ച
ബിഭ്രന്നിസർഗതരലോsപി ഭവത്കടാക്ഷഃ .
വൈമല്യമന്വഹമനഞ്ജനതാം ച ഭൂയഃ
സ്ഥൈര്യം ച ഭക്തഹൃദയായ കഥം ദദാതി .. 42
മന്ദസ്മിതസ്തബകിതം മണികുണ്ഡലാംശു-
സ്തോമപ്രവാലരുചിരം ശിശിരീകൃതാശം .
കാമാക്ഷി രാജതി കടാക്ഷരുചേഃ കദംബ-
മുദ്യാനമംബ കരുണാഹരിണേക്ഷണായാഃ .. 43
കാമാക്ഷി താവകകടാക്ഷമഹേന്ദ്രനീല-
സിംഹാസനം ശ്രിതവതോ മകരധ്വജസ്യ .
സാമ്രാജ്യമംഗലവിധൗ മണികുണ്ഡലശ്രീഃ
നീരാജനോത്സവതരംഗിതദീപമാലാ .. 44
മാതഃ ക്ഷണം സ്നപയ മാം തവ വീക്ഷിതേന
മന്ദാക്ഷിതേന സുജനൈരപരോക്ഷിതേന .
കാമാക്ഷി കർമതിമിരോത്കരഭാസ്കരേണ
ശ്രേയസ്കരേണ മധുപദ്യുതിതസ്കരേണ .. 45
പ്രേമാപഗാപയസി മജ്ജനമാരചയ്യ
യുക്തഃ സ്മിതാംശുകൃതഭസ്മവിലേപനേന .
കാമാക്ഷി കുണ്ഡലമണിദ്യുതിഭിർജടാലഃ
ശ്രീകണ്ഠമേവ ഭജതേ തവ ദൃഷ്ടിപാതഃ .. 46
കൈവല്യദായ കരുണാരസകിങ്കരായ
കാമാക്ഷി കന്ദലിതവിഭ്രമശങ്കരായ .
ആലോകനായ തവ ഭക്തശിവങ്കരായ
മാതർനമോsസ്തു പരതന്ത്രിതശങ്കരായ .. 47
സാമ്രാജ്യമംഗലവിധൗ മകരധ്വജസ്യ
ലോലാലകാലികൃതതോരണമാല്യശോഭേ .
കാമേശ്വരി പ്രചലദുത്പലവൈജയന്തീ-
ചാതുര്യമേതി തവ ചഞ്ചലദൃഷ്ടിപാതഃ .. 48
മാർഗേണ മഞ്ജുകചകാന്തിതമോവൃതേന
മന്ദായമാനഗമനാ മദനാതുരാസൗ .
കാമാക്ഷി ദൃഷ്ടിരയതേ തവ ശങ്കരായ
സങ്കേതഭൂമിമചിരാദഭിസാരികേവ .. 49
വ്രീഡാനുവൃത്തിരമണീകൃതസാഹചര്യാ
ശൈവാലിതാം ഗലരുചാ ശശിശേഖരസ്യ .
കാമാക്ഷി കാന്തിസരസീം ത്വദപാംഗലക്ഷ്മീഃ
മന്ദം സമാശ്രയതി മജ്ജനഖേലനായ .. 50
കാഷായമംശുകമിവ പ്രകടം ദധാനോ
മാണിക്യകുണ്ഡലരുചിം മമതാവിരോധീ .
ശ്രുത്യന്തസീമനി രതഃ സുതരാം ചകാസ്തി
കാമാക്ഷി താവകകടാക്ഷയതീശ്വരോsസൗ .. 51
പാഷാണ ഏവ ഹരിനീലമണിർദിനേഷു
പ്രമ്ലാനതാം കുവലയം പ്രകടീകരോതി .
നൈമിത്തികോ ജലദമേചകിമാ തതസ്തേ
കാമാക്ഷി ശൂന്യമുപമാനമപാംഗലക്ഷ്മ്യാഃ .. 52
ശൃംഗാരവിഭ്രമവതീ സുതരാം സലജ്ജാ
നാസാഗ്രമൗക്തികരുചാ കൃതമന്ദഹാസാ .
ശ്യാമാ കടാക്ഷസുഷമാ തവ യുക്തമേതത്
കാമാക്ഷി ചുംബതി ദിഗംബരവക്ത്രബിംബം .. 53
നീലോത്പലേന മധുപേന ച ദൃഷ്ടിപാതഃ
കാമാക്ഷി തുല്യ ഇതി തേ കഥമാമനന്തി .
ശൈത്യേന നിന്ദതി യദന്വഹമിന്ദുപാദാൻ
പാഥോരുഹേണ യദസൗ കലഹായതേ ച .. 54
ഓഷ്ഠപ്രഭാപടലവിദ്രുമമുദ്രിതേ തേ
ഭ്രൂവല്ലിവീചിസുഭഗേ മുഖകാന്തിസിന്ധൗ .
കാമാക്ഷി വാരിഭരപൂരണലംബമാന-
കാലാംബുവാഹസരണിം ലഭതേ കടാക്ഷഃ .. 55
മന്ദസ്മിതൈർധവലിതാ മണികുണ്ഡലാംശു-
സമ്പർകലോഹിതരുചിസ്ത്വദപാംഗധാരാ .
കാമാക്ഷി മല്ലികുസുമൈർനവപല്ലവൈശ്ച
നീലോത്പലൈശ്ച രചിതേവ വിഭാതി മാലാ .. 56
കാമാക്ഷി ശീതലകൃപാരസനിർഝരാംഭഃ-
സമ്പർകപക്ഷ്മലരുചിസ്ത്വദപാംഗമാലാ .
ഗോഭിഃ സദാ പുരരിപോരഭിലഷ്യമാണാ
ദൂർവാകദംബകവിഡംബനമാതനോതി .. 57
ഹൃത്പങ്കജം മമ വികാസയതു പ്രമുഷ്ണൻ
ഉല്ലാസമുത്പലരുചേസ്തമസാം നിരോദ്ധാ .
ദോഷാനുഷംഗജഡതാം ജഗതാം ധുനാനഃ
കാമാക്ഷി വീക്ഷണവിലാസദിനോദയസ്തേ .. 58
ചക്ഷുർവിമോഹയതി ചന്ദ്രവിഭൂഷണസ്യ
കാമാക്ഷി താവകകടാക്ഷതമഃപ്രരോഹഃ .
പ്രത്യങ്മുഖം തു നയനം സ്തിമിതം മുനീനാം
പ്രാകാശ്യമേവ നയതീതി പരം വിചിത്രം .. 59
കാമാക്ഷി വീക്ഷണരുചാ യുധി നിർജിതം തേ
നീലോത്പലം നിരവശേഷഗതാഭിമാനം .
ആഗത്യ തത്പരിസരം ശ്രവണാവതംസ-
വ്യാജേന നൂനമഭയാർഥനമാതനോതി .. 60
ആശ്ചര്യമംബ മദാനാഭ്യുദയാവലംബഃ
കാമാക്ഷി ചഞ്ചലനിരീക്ഷണവിഭ്രമസ്തേ .
ധൈര്യം വിധൂയ തനുതേ ഹൃദി രാഗബന്ധം
ശംഭോസ്തദേവ വിപരീതതയാ മുനീനാം .. 61
ജന്തോഃ സകൃത്പ്രണമതോ ജഗദീഡ്യതാം ച
തേജസ്വിതാം ച നിശിതാം ച മതിം സഭായാം .
കാമാക്ഷി മാക്ഷികഝരീമിവ വൈഖരീം ച
ലക്ഷ്മീം ച പക്ഷ്മലയതി ക്ഷണവീക്ഷണം തേ .. 62
കാദംബിനീ കിമയതേ ന ജലാനുഷംഗം
ഭൃംഗാവലീ കിമുരരീകുരുതേ ന പദ്മം .
കിം വാ കലിന്ദതനയാ സഹതേ ന ഭംഗം
കാമാക്ഷി നിശ്ചയപദം ന തവാക്ഷിലക്ഷ്മീഃ .. 63
കാകോലപാവകതൃണീകരണേsപി ദക്ഷഃ
കാമാക്ഷി ബാലകസുധാകരശേഖരസ്യ .
അത്യന്തശീതലതമോsപ്യനുപാരതം തേ
ചിത്തം വിമോഹയതി ചിത്രമയം കടാക്ഷഃ .. 64
കാർപണ്യപൂരപരിവർധിതമംബ മോഹ-
കന്ദോദ്ഗതം ഭവമയം വിഷപാദപം മേ .
തുംഗം ഛിനത്തു തുഹിനാദ്രിസുതേ ഭവത്യാഃ
കാഞ്ചീപുരേശ്വരി കടാക്ഷകുഠാരധാരാ .. 65
കാമാക്ഷി ഘോരഭവരോഗചികിത്സനാർഥം
അഭ്യർഥ്യ ദേശികകടാക്ഷഭിഷക്പ്രസാദാത് .
തത്രാപി ദേവി ലഭതേ സുകൃതീ കദാചിത്
അത്യന്ത ദുർലഭമപാംഗമഹൗഷധം തേ .. 66
കാമാക്ഷി ദേശികകൃപാങ്കുരമാശ്രയന്തോ
നാനാതപോനിയമനാശിതപാശബന്ധാഃ .
വാസാലയം തവ കടാക്ഷമമും മഹാന്തോ
ലബ്ധ്വാ സുഖം സമധിയോ വിചരന്തി ലോകേ .. 67
സാകൂതസംലപിതസംഭൃതമുഗ്ധഹാസം
വ്രീഡാനുരാഗസഹചാരി വിലോകനം തേ .
കാമാക്ഷി കാമപരിപന്ഥിനി മാരവീര-
സാമ്രാജ്യവിഭ്രമദശാം സഫലീകരോതി .. 68
കാമാക്ഷി വിഭ്രമബലൈകനിധിർവിധായ
ഭ്രൂവല്ലിചാപകുടിലീകൃതിമേവ ചിത്രം .
സ്വാധീനതാം തവ നിനായ ശശാങ്കമൗലേഃ
അംഗാർധരാജ്യസുഖലാഭമപാംഗവീരഃ .. 69
കാമാങ്കുരൈകനിലയസ്തവ ദൃഷ്ടിപാതഃ
കാമാക്ഷി ഭക്തമനസാം പ്രദദാതി കാമാൻ .
രാഗാന്വിതഃ സ്വയമപി പ്രകടീകരോതി
വൈരാഗ്യമേവ കഥമേഷ മഹാമുനീനാം .. 70
കാലാംബുവാഹനിവഹൈഃ കലഹായതേ തേ
കാമാക്ഷി കാലിമമദേന സദാ കടാക്ഷഃ .
ചിത്രം തഥാപി നിതരാമമുമേവ ദൃഷ്ട്വാ
സോത്കണ്ഠ ഏവ രമതേ കില നീലകണ്ഠഃ .. 71
കാമാക്ഷി മന്മഥരിപും പ്രതി മാരതാപ-
മോഹാന്ധകാരജലദാഗമനേന നൃത്യൻ .
ദുഷ്കർമകഞ്ചുകികുലം കബലീകരോതു
വ്യാമിശ്രമേചകരുചിസ്ത്വദപാംഗകേകീ .. 72
കാമാക്ഷി മന്മഥരിപോരവലോകനേഷു
കാന്തം പയോജമിവ താവകമക്ഷിപാതം .
പ്രേമാഗമോ ദിവസവദ്വികചീകരോതി
ലജ്ജാഭരോ രജനിവന്മുകുലീകരോതി .. 73
മൂകോ വിരിഞ്ചതി പരം പുരുഷഃ കുരൂപഃ
കന്ദർപതി ത്രിദശരാജതി കിമ്പചാനഃ .
കാമാക്ഷി കേവലമുപക്രമകാല ഏവ
ലീലാതരംഗിതകടാക്ഷരുചഃ ക്ഷണം തേ .. 74
നീലാലകാ മധുകരന്തി മനോജ്ഞനാസാ-
മുക്താരുചഃ പ്രകടകന്ദബിസാങ്കുരന്തി .
കാരുണ്യമംബ മകരന്ദതി കാമകോടി
മന്യേ തതഃ കമലമേവ വിലോകനം തേ .. 75
ആകാങ്ക്ഷ്യമാണഫലദാനവിചക്ഷണായാഃ
കാമാക്ഷി താവകകടാക്ഷകകാമധേനോഃ .
സമ്പർക ഏവ കഥമംബ വിമുക്തപാശ-
ബന്ധാഃ സ്ഫുടം തനുഭൃതഃ പശുതാം ത്യജന്തി .. 76
സംസാരഘർമപരിതാപജുഷാം നരാണാം
കാമാക്ഷി ശീതലതരാണി തവേക്ഷിതാനി .
ചന്ദ്രാതപന്തി ഘനചന്ദനകർദമന്തി
മുക്താഗുണന്തി ഹിമവാരിനിഷേചനന്തി .. 77
പ്രേമാംബുരാശിസതതസ്നപിതാനി ചിത്രം
കാമാക്ഷി താവകകടാക്ഷനിരീക്ഷണാനി .
സന്ധുക്ഷയന്തി മുഹുരിന്ധനരാശിരീത്യാ
മാരദ്രുഹോ മനസി മന്മഥചിത്രഭാനും .. 78
കാലാഞ്ജനപ്രതിഭടം കമനീയകാന്ത്യാ
കന്ദർപതന്ത്രകലയാ കലിതാനുഭാവം .
കാഞ്ചീവിഹാരരസികേ കലുഷാർതിചോരം
കല്ലോലയസ്വ മയി തേ കരുണാകടാക്ഷം .. 79
ക്രാന്തേന മന്മഥമദേന വിമോഹ്യമാന-
സ്വാന്തേന ചൂതതരുമൂലഗതസ്യ പുംസഃ .
കാന്തേന കിഞ്ചിദവലോകയ ലോചനസ്യ
പ്രാന്തേന മാം ജനനി കാഞ്ചിപുരീവിഭൂഷേ .. 80
കാമാക്ഷി കേsപി സുജനാസ്ത്വദപാംഗസംഗേ
കണ്ഠേന കന്ദലിതകാലിമസമ്പ്രദായാഃ .
ഉത്തംസകൽപിതചകോരകുടുംബപോഷാ
നക്തന്ദിവപ്രസവഭൂനയനാ ഭവന്തി .. 81
നീലോത്പലപ്രസവകാന്തിനിദർശനേന
കാരുണ്യവിഭ്രമജുഷാ തവ വീക്ഷണേന .
കാമാക്ഷി കർമജലധേഃ കലശീസുതേന
പാശത്രയാദ്വയമമീ പരിമോചനീയാഃ .. 82
അത്യന്തചഞ്ചലമകൃത്രിമമഞ്ജനം കിം
ഝങ്കാരഭംഗിരഹിതാ കിമു ഭൃംഗമാലാ .
ധൂമാങ്കുരഃ കിമു ഹുതാശനസംഗഹീനഃ
കാമാക്ഷി നേത്രരുചിനീലിമകന്ദലീ തേ .. 83
കാമാക്ഷി നിത്യമയമഞ്ജലിരസ്തു മുക്തി-
ബീജായ വിഭ്രമമദോദയഘൂർണിതായ .
കന്ദർപദർപപുനരുദ്ഭവസിദ്ധിദായ
കല്യാണദായ തവ ദേവി ദൃഗഞ്ചലായ .. 84
ദർപാങ്കുരോ മകരകേതനവിഭ്രമാണാം
നിന്ദാങ്കുരോ വിദലിതോത്പലചാതുരീണാം .
ദീപാങ്കുരോ ഭവതമിസ്രകദംബകാനാം
കാമാക്ഷി പാലയതു മാം ത്വദപാംഗപാതഃ .. 85
കൈവല്യദിവ്യമണിരോഹണപർവതേഭ്യഃ
കാരുണ്യനിർഝരപയഃകൃതമജ്ജനേഭ്യഃ .
കാമാക്ഷി കിങ്കരിതശങ്കരമാനസേഭ്യഃ
തേഭ്യോ നമോsസ്തു തവ വീക്ഷണവിഭ്രമേഭ്യഃ .. 86
അൽപീയ ഏവ നവമുത്പലമംബ ഹീനാ
മീനസ്യ വാ സരണിരംബുരുഹാം ച കിം വാ .
ദൂരേ മൃഗീദൃഗസമഞ്ജസമഞ്ജനം ച
കാമാക്ഷി വീക്ഷണരുചൗ തവ തർകയാമഃ .. 87
മിശ്രീഭവദ്ഗരലപങ്കിലശങ്കരോരസ്-
സീമാംഗണേ കിമപി രിംഖണമാദധാനഃ .
ഹേലാവധൂതലലിതശ്രവണോത്പലോsസൗ
കാമാക്ഷി ബാല ഇവ രാജതി തേ കടാക്ഷഃ .. 88
പ്രൗഢീകരോതി വിദുഷാം നവസൂക്തിധാടീ-
ചൂതാടവീഷു ബുധകോകിലലാല്യമാനം .
മാധ്വീരസം പരിമലം ച നിരർഗലം തേ
കാമാക്ഷി വീക്ഷണവിലാസവസന്തലക്ഷ്മീഃ .. 89
കൂലങ്കഷം വിതനുതേ കരുണാംബുവർഷീ
സാരസ്വതം സുകൃതിനഃ സുലഭം പ്രവാഹം .
തുച്ഛീകരോതി യമുനാംബുതരംഗഭംഗീം
കാമാക്ഷി കിം തവ കടാക്ഷമഹാംബുവാഹഃ .. 90
ജാഗർതി ദേവി കരുണാശുകസുന്ദരീ തേ
താടങ്കരത്നരുചിദാഡിമഖണ്ഡശോണേ .
കാമാക്ഷി നിർഭരകടാക്ഷമരീചിപുഞ്ജ-
മാഹേന്ദ്രനീലമണിപഞ്ജരമധ്യഭാഗേ .. 91
കാമാക്ഷി സത്കുവലയസ്യ സഗോത്രഭാവാത്
ആക്രാമതി ശ്രുതിമസൗ തവ ദൃഷ്ടിപാതഃ .
കിഞ്ച സ്ഫുടം കുടിലതാം പ്രകടീകരോതി
ഭ്രൂവല്ലരീപരിചിതസ്യ ഫലം കിമേതത് .. 92
ഏഷാ തവാക്ഷിസുഷമാ വിഷമായുധസ്യ
നാരാചവർഷലഹരീ നഗരാജകന്യേ .
ശങ്കേ കരോതി ശതധാ ഹൃദി ധൈര്യമുദ്രാം
ശ്രീകാമകോടി യദസൗ ശിശിരാംശുമൗലേഃ .. 93
ബാണേന പുഷ്പധനുഷഃ പരികൽപ്യമാന-
ത്രാണേന ഭക്തമനസാം കരുണാകരേണ .
കോണേന കോമലദൃശസ്തവ കാമകോടി
ശോണേന ശോഷയ ശിവേ മമ ശോകസിന്ധും .. 94
മാരദ്രുഹാ മകുടസീമനി ലാല്യമാനേ
മന്ദാകിനീപയസി തേ കുടിലം ചരിഷ്ണുഃ .
കാമാക്ഷി കോപരഭസാദ്വലമാനമീന-
സന്ദേഹമങ്കുരയതി ക്ഷണമക്ഷിപാതഃ .. 95
കാമാക്ഷി സംവലിതമൗക്തികകുണ്ഡലാംശു-
ചഞ്ചത്സിതശ്രവണചാമരചാതുരീകഃ .
സ്തംഭേ നിരന്തരമപാംഗമയേ ഭവത്യാ
ബദ്ധശ്ചകാസ്തി മകരധ്വജമത്തഹസ്തീ .. 96
യാവത്കടാക്ഷരജനീസമയാഗമസ്തേ
കാമാക്ഷി താവദചിരാന്നമതാം നരാണാം .
ആവിർഭവത്യമൃതദീധിതിബിംബമംബ
സംവിന്മയം ഹൃദയപൂർവഗിരീന്ദ്രശൃംഗേ .. 97
കാമാക്ഷി കൽപവിടപീവ ഭവത്കടാക്ഷോ
ദിത്സുഃ സമസ്തവിഭവം നമതാം നരാണാം .
ഭൃംഗസ്യ നീലനലിനസ്യ ച കാന്തിസമ്പത്
സർവസ്വമേവ ഹരതീതി പരം വിചിത്രം .. 98
അത്യന്തശീതലമനർഗലകർമപാക-
കാകോലഹാരി സുലഭം സുമനോഭിരേതത് .
പീയൂഷമേവ തവ വീക്ഷണമംബ കിന്തു
കാമാക്ഷി നീലമിദമിത്യയമേവ ഭേദഃ .. 99
അജ്ഞാതഭക്തിരസമപ്രസരദ്വിവേകം
അത്യന്തഗർവമനധീതസമസ്തശാസ്ത്രം .
അപ്രാപ്തസത്യമസമീപഗതം ച മുക്തേഃ
കാമാക്ഷി നൈവ തവ കാങ്ക്ഷതി ദൃഷ്ടിപാതഃ .. 100
പാതേന ലോചനരുചേസ്തവ കാമകോടി
പോതേന പാതകപയോധിഭയാതുരാണാം .
പൂതേന തേന നവകാഞ്ചനകുണ്ഡലാംശു-
വീതേന ശീതലയ ഭൂധരകന്യകേ മാം .. 101
.. ഇതി കടാക്ഷശതകം സമ്പൂർണം ..
മന്ദസ്മിതശതകം
ബധ്നീമോ വയമഞ്ജലിം പ്രതിദിനം ബന്ധച്ഛിദേ ദേഹിനാം
കന്ദർപാഗമതന്ത്രമൂലഗുരവേ കല്യാണകേലീഭുവേ .
കാമാക്ഷ്യാ ഘനസാരപുഞ്ജരജസേ കാമദ്രുഹശ്ചക്ഷുഷാം
മന്ദാരസ്തബകപ്രഭാമദമുഷേ മന്ദസ്മിതജ്യോതിഷേ .. 1
സധ്രീചേ നവമല്ലികാസുമനസാം നാസാഗ്രമുക്താമണേഃ
ആചാര്യായ മൃണാലകാണ്ഡമഹസാം നൈസർഗികായ ദ്വിഷേ .
സ്വർധുന്യാ സഹ യുധ്വനേ ഹിമരുചേരർധാസനാധ്യാസിനേ
കാമാക്ഷ്യാഃ സ്മിതമഞ്ജരീധവലിമാദ്വൈതായ തസ്മൈ നമഃ .. 2
കർപൂരദ്യുതിചാതുരീമതിതരാമൽപീയസീം കുർവതീ
ദൗർഭാഗ്യോദയമേവ സംവിദധതീ ദൗഷാകരീണാം ത്വിഷാം .
ക്ഷുല്ലാനേവ മനോജ്ഞമല്ലിനികരാൻഫുല്ലാനപി വ്യഞ്ജതീ
കാമാക്ഷ്യാ മൃദുലസ്മിതാംശുലഹരീ കാമപ്രസൂരസ്തു മേ .. 3
യാ പീനസ്തനമണ്ഡലോപരി ലസത്കർപൂരലേപായതേ
യാ നീലേക്ഷണരാത്രികാന്തിതതിഷു ജ്യോത്സ്നാപ്രരോഹായതേ .
യാ സൗന്ദര്യധുനീതരംഗതതിഷു വ്യാലോലഹംസായതേ
കാമാക്ഷ്യാഃ ശിശിരീകരോതു ഹൃദയം സാ മേ സ്മിതപ്രാചുരീ .. 4
യേഷാം ഗച്ഛതി പൂർവപക്ഷസരണിം കൗമുദ്വതഃ ശ്വേതിമാ
യേഷാം സന്തതമാരുരുക്ഷതി തുലാകക്ഷ്യാം ശരച്ചന്ദ്രമാഃ .
യേഷാമിച്ഛതി കംബുരപ്യസുലഭാമന്തേവസത്പ്രക്രിയാം
കാമാക്ഷ്യാ മമതാം ഹരന്തു മമ തേ ഹാസത്വിഷാമങ്കുരാഃ .. 5
ആശാസീമസു സന്തതം വിദധതീ നൈശാകരീം വ്യാക്രിയാം
കാശാനാമഭിമാനഭംഗകലനാകൗശല്യമാബിഭ്രതീ .
ഈശാനേന വിലോകിതാ സകുതുകം കാമാക്ഷി തേ കൽമഷ-
ക്ലേശാപായകരീ ചകാസ്തി ലഹരീ മന്ദസ്മിതജ്യോതിഷാം .. 6
ആരൂഢസ്യ സമുന്നതസ്തനതടീസാമ്രാജ്യസിംഹാസനം
കന്ദർപസ്യ വിഭോർജഗത്ത്രയജയപ്രാകട്യമുദ്രാനിധേഃ .
യസ്യാശ്ചാമരചാതുരീം കലയതേ രശ്മിച്ഛടാ ചഞ്ചലാ
സാ മന്ദസ്മിതമഞ്ജരീ ഭവതു നഃ കാമായ കാമാക്ഷി തേ .. 7
ശംഭോര്യാ പരിരംഭസംഭ്രമവിധൗ നൈർമല്യസീമാനിധിഃ
ഗൈർവാണീവ തരംഗിണീ കൃതമൃദുസ്യന്ദാം കലിന്ദാത്മജാം .
കൽമാഷീകുരുതേ കലങ്കസുഷമാം കണ്ഠസ്ഥലീചുംബിനീം
കാമാക്ഷ്യാഃ സ്മിതകന്ദലീ ഭവതു നഃ കല്യാണസന്ദോഹിനീ .. 8
ജേതും ഹാരലതാമിവ സ്തനതടീം സഞ്ജഗ്മുഷീ സന്തതം
ഗന്തും നിർമലതാമിവ ദ്വിഗുണിതാം മഗ്നാ കൃപാസ്രോതസി .
ലബ്ധും വിസ്മയനീയതാമിവ ഹരം രാഗാകുലം കുർവതീ
മഞ്ജുസ്തേ സ്മിതമഞ്ജരീ ഭവഭയം മഥ്നാതു കാമാക്ഷി മേ .. 9
ശ്വേതാപി പ്രകടം നിശാകരരുചാം മാലിന്യമാതന്വതീ
ശീതാപി സ്മരപാവകം പശുപതേഃ സന്ധുക്ഷയന്തീ സദാ .
സ്വാഭാവ്യാദധരാശ്രിതാപി നമതാമുച്ചൈർദിശന്തീ ഗതിം
കാമാക്ഷി സ്ഫുടമന്തരാ സ്ഫുരതു നസ്ത്വന്മന്ദഹാസപ്രഭാ .. 10
വക്ത്രശ്രീസരസീജലേ തരലിതഭ്രൂവല്ലികല്ലോലിതേ
കാലിമ്നാ ദധതീ കടാക്ഷജനുഷാ മാധുവ്രതീം വ്യാപൃതിം .
നിർനിദ്രാമലപുണ്ഡരീകകുഹനാപാണ്ഡിത്യമാബിഭ്രതീ
കാമാക്ഷ്യാഃ സ്മിതചാതുരീ മമ മനഃ കാതര്യമുന്മൂലയേത് .. 11
നിത്യം ബാധിതബന്ധുജീവമധരം മൈത്രീജുഷം പല്ലവൈഃ
ശുദ്ധസ്യ ദ്വിജമണ്ഡലസ്യ ച തിരസ്കർതാരമപ്യാശ്രിതാ .
യാ വൈമല്യവതീ സദൈവ നമതാം ചേതഃ പുനീതേതരാം
കാമാക്ഷ്യാ ഹൃദയം പ്രസാദയതു മേ സാ മന്ദഹാസപ്രഭാ .. 12
ദ്രുഹ്യന്തീ തമസേ മുഹുഃ കുമുദിനീസാഹായ്യമാബിഭ്രതീ
യാന്തീ ചന്ദ്രകിശോരശേഖരവപുഃ സൗധാംഗണേ പ്രേംഖണം .
ജ്ഞാനാംഭോനിധിവീചികാം സുമനസാം കൂലങ്കഷാം കുർവതീ
കാമാക്ഷ്യാഃ സ്മിതകൗമുദീ ഹരതു മേ സംസാരതാപോദയം .. 13
കാശ്മീരദ്രവധാതുകർദമരുചാ കൽമാഷതാം ബിഭ്രതീ
ഹംസൗഘൈരിവ കുർവതീ പരിചിതിം ഹാരീകൃതൈർമൗക്തികൈഃ .
വക്ഷോജന്മതുഷാരശൈലകടകേ സഞ്ചാരമാതന്വതീ
കാമാക്ഷ്യാ മൃദുലസ്മിതദ്യുതിമയീ ഭാഗീരഥീ ഭാസതേ .. 14
കംബോർവംശപരമ്പരാ ഇവ കൃപാസന്താനവല്ലീഭുവഃ
സംഫുല്ലസ്തബകാ ഇവ പ്രസൃമരാ മൂർതാഃ പ്രസാദാ ഇവ .
വാക്പീയൂഷകണാ ഇവ ത്രിപഥഗാപര്യായഭേദാ ഇവ
ഭ്രാജന്തേ തവ മന്ദഹാസകിരണാഃ കാഞ്ചീപുരീനായികേ .. 15
വക്ഷോജേ ഘനസാരപത്രരചനാഭംഗീസപത്നായിതാ
കണ്ഠേ മൗക്തികഹാരയഷ്ടികിരണവ്യാപാരമുദ്രായിതാ .
ഓഷ്ഠശ്രീനികുരുംബപല്ലവപുടേ പ്രേംഖത്പ്രസൂനായിതാ
കാമാക്ഷി സ്ഫുരതാം മദീയഹൃദയേ ത്വന്മന്ദഹാസപ്രഭാ .. 16
യേഷാം ബിന്ദുരിവോപരി പ്രചലിതോ നാസാഗ്രമുക്താമണിഃ
യേഷാം ദീന ഇവാധികണ്ഠമയതേ ഹാരഃ കരാലംബനം .
യേഷാം ബന്ധുരിവോഷ്ഠയോരരുണിമാ ധത്തേ സ്വയം രഞ്ജനം
കാമാക്ഷ്യാഃ പ്രഭവന്തു തേ മമ ശിവോല്ലാസായ ഹാസാങ്കുരാഃ .. 17
യാ ജാഡ്യാംബുനിധിം ക്ഷിണോതി ഭജതാം വൈരായതേ കൈരവൈഃ
നിത്യം യാ നിയമേന യാ ച യതതേ കർതും ത്രിനേത്രോത്സവം .
ബിംബം ചാന്ദ്രമസം ച വഞ്ചയതി യാ ഗർവേണ സാ താദൃശീ
കാമാക്ഷി സ്മിതമഞ്ജരീ തവ കഥം ജ്യോത്സ്നേത്യസൗ കീർത്യതേ .. 18
ആരുഢാ രഭസാത്പുരഃ പുരരിപോരാശ്ലേഷണോപക്രമേ
യാ തേ മാതരുപൈതി ദിവ്യതടിനീശങ്കാകരീ തത്ക്ഷണം .
ഓഷ്ഠൗ വേപയതി ഭ്രുവൗ കുടിലയത്യാനമ്രയത്യാനനം
താം വന്ദേ മൃദുഹാസപൂരസുഷമാമേകാമ്രനാഥപ്രിയേ .. 19
വക്ത്രേന്ദോസ്തവ ചന്ദ്രികാ സ്മിതതതിർവൽഗു സ്ഫുരന്തീ സതാം
സ്യാച്ചേദ്യുക്തമിദം ചകോരമനസാം കാമാക്ഷി കൗതൂഹലം .
ഏതച്ചിത്രമഹർനിശം യദധികാമേഷാ രുചിം ഗാഹതേ
ബിംബോഷ്ഠദ്യുമണിപ്രഭാസ്വപി ച യദ്ബിബ്ബോകമാലംബതേ .. 20
സാദൃശ്യം കലശാംബുധേർവഹതി യത്കാമാക്ഷി മന്ദസ്മിതം
ശോഭാമോഷ്ഠരുചാംബ വിദ്രുമഭവാമേതദ്ഭിദാം ബ്രൂമഹേ .
ഏകസ്മാദുദിതം പുരാ കില പപൗ ശർവഃ പുരാണഃ പുമാൻ
ഏതന്മധ്യസമുദ്ഭവം രസയതേ മാധുര്യരൂപം രസം .. 21
ഉത്തുംഗസ്തനകുംഭശൈലകടകേ വിസ്താരികസ്തൂരികാ-
പത്രശ്രീജുഷി ചഞ്ചലാഃ സ്മിതരുചഃ കാമാക്ഷി തേ കോമലാഃ .
സന്ധ്യാദീധിതിരഞ്ജിതാ ഇവ മുഹുഃ സാന്ദ്രാധരജ്യോതിഷാ
വ്യാലോലാമലശാരദാഭ്രശകലവ്യാപാരമാതന്വതേ .. 22
ക്ഷീരം ദൂരത ഏവ തിഷ്ഠതു കഥം വൈമല്യമാത്രാദിദം
മാതസ്തേ സഹപാഠവീഥിമയതാം മന്ദസ്മിതൈർമഞ്ജുലൈഃ .
കിം ചേയം തു ഭിദാസ്തി ദോഹനവശാദേകം തു സഞ്ജായതേ
കാമാക്ഷി സ്വയമർഥിതം പ്രണമതാമന്യത്തു ദോദുഹ്യതേ .. 23
കർപൂരൈരമൃതൈർജഗജ്ജനനി തേ കാമാക്ഷി ചന്ദ്രാതപൈഃ
മുക്താഹാരഗുണൈർമൃണാലവലയൈർമുഗ്ധസ്മിതശ്രീരിയം .
ശ്രീകാഞ്ചീപുരനായികേ സമതയാ സംസ്തൂയതേ സജ്ജനൈഃ
തത്താദൃങ്മമ താപശാന്തിവിധയേ കിം ദേവി മന്ദായതേ .. 24
മധ്യേഗർഭിതമഞ്ജുവാക്യലഹരീമാധ്വീഝരീശീതലാ
മന്ദാരസ്തബകായതേ ജനനി തേ മന്ദസ്മിതാംശുച്ഛടാ .
യസ്യാ വർധയിതും മുഹുർവികസനം കാമാക്ഷി കാമദ്രുഹോ
വൽഗുർവീക്ഷണവിഭ്രമവ്യതികരോ വാസന്തമാസായതേ .. 25
ബിംബോഷ്ഠദ്യുതിപുഞ്ജരഞ്ജിതരുചിസ്ത്വന്മന്ദഹാസച്ഛടാ
കല്യാണം ഗിരിസാർവഭൗമതനയേ കല്ലോലയത്വാശു മേ .
ഫുല്ലന്മല്ലിപിനദ്ധഹല്ലകമയീ മാലേവ യാ പേശലാ
ശ്രീകാഞ്ചീശ്വരി മാരമർദിതുരുരോമധ്യേ മുഹുർലംബതേ .. 26
ബിഭ്രാണാ ശരദഭ്രവിഭ്രമദശാം വിദ്യോതമാനാപ്യസൗ
കാമാക്ഷി സ്മിതമഞ്ജരീ കിരതി തേ കാരുണ്യധാരാരസം .
ആശ്ചര്യം ശിശിരീകരോതി ജഗതീശ്ചാലോക്യ ചൈനാമഹോ
കാമം ഖേലതി നീലകണ്ഠഹൃദയം കൗതൂഹലാന്ദോലിതം .. 27
പ്രേംഖത്പ്രൗഢകടാക്ഷകുഞ്ജകുഹരേഷ്വത്യച്ഛഗുച്ഛായിതം
വക്ത്രേന്ദുച്ഛവിസിന്ധുവീചിനിചയേ ഫേനപ്രതാനായിതം .
നൈരന്തര്യവിജൃംഭിതസ്തനതടേ നൈചോലപട്ടായിതം
കാലുഷ്യം കബലീകരോതു മമ തേ കാമാക്ഷി മന്ദസ്മിതം .. 28
പീയൂഷം തവ മന്ഥരസ്മിതമിതി വ്യർഥൈവ സാപപ്രഥാ
കാമാക്ഷി ധ്രുവമീദൃശം യദി ഭവേദേതത്കഥം വാ ശിവേ .
മന്ദാരസ്യ കഥാലവം ന സഹതേ മഥ്നാതി മന്ദാകിനീം
ഇന്ദും നിന്ദതി കീർതിതേsപി കലശീപാഥോധിമീർഷ്യായതേ .. 29
വിശ്വേഷാം നയനോത്സവം വിതനുതാം വിദ്യോതതാം ചന്ദ്രമാ
വിഖ്യാതോ മദനാന്തകേന മുകുടീമധ്യേ ച സംമാന്യതാം .
ആഃ കിം ജാതമനേന ഹാസസുഷമാമാലോക്യ കാമാക്ഷി തേ
കാലങ്കീമവലംബതേ ഖലു ദശാം കൽമാഷഹീനോsപ്യസൗ .. 30
ചേതഃ ശീതലയന്തു നഃ പശുപതേരാനന്ദജീവാതവോ
നമ്രാണാം നയനാധ്വസീമസു ശരച്ചന്ദ്രാതപോപക്രമാഃ .
സംസാരാഖ്യസരോരുഹാകരഖലീകാരേ തുഷാരോത്കരാഃ
കാമാക്ഷി സ്മരകീർതിബീജനികരാസ്ത്വന്മന്ദഹാസാങ്കുരാഃ .. 31
കർമൗഘാഖ്യതമഃകചാകചികരാൻകാമാക്ഷി സഞ്ചിന്തയേ
ത്വന്മന്ദസ്മിതരോചിഷാം ത്രിഭുവനക്ഷേമങ്കരാനങ്കുരാൻ .
യേ വക്ത്രം ശിശിരശ്രിയോ വികസിതം ചന്ദ്രാതപാംഭോരുഹ-
ദ്വേഷോദ്ഘോഷണചാതുരീമിവ തിരസ്കർതും പരിഷ്കുർവതേ .. 32
കുര്യുർനഃ കുലശൈലരാജതനയേ കൂലങ്കഷം മംഗലം
കുന്ദസ്പർധനചുഞ്ചവസ്തവ ശിവേ മന്ദസ്മിതപ്രക്രമാഃ .
യേ കാമാക്ഷി സമസ്തസാക്ഷിനയനം സന്തോഷയന്തീശ്വരം
കർപൂരപ്രകരാ ഇവ പ്രസൃമരാഃ പുംസാമസാധാരണാഃ .. 33
കമ്രേണ സ്നപയസ്വ കർമകുഹനാചോരേണ മാരാഗമ-
വ്യാഖ്യാശിക്ഷണദീക്ഷിതേന വിദുഷാമക്ഷീണലക്ഷ്മീപുഷാ .
കാമാക്ഷി സ്മിതകന്ദലേന കലുഷസ്ഫോടക്രിയാചുഞ്ചുനാ
കാരുണ്യാമൃതവീചികാവിഹരണപ്രാചുര്യധുര്യേണ മാം .. 34
ത്വന്മന്ദസ്മിതകന്ദലസ്യ നിയതം കാമാക്ഷി ശങ്കാമഹേ
ബിംബഃ കശ്ചന നൂതനഃ പ്രചലിതോ നൈശാകരഃ ശീകരഃ .
കിഞ്ച ക്ഷീരപയോനിധിഃ പ്രതിനിധിഃ സ്വർവാഹിനീവീചികാ-
ബിബ്വോകോsപി വിഡംബ ഏവ കുഹനാ മല്ലീമതല്ലീരുചഃ .. 35
ദുഷ്കർമാർകനിസർഗകർകശമഹസ്സമ്പർകതപ്തം മിലത്
പങ്കം ശങ്കരവല്ലഭേ മമ മനഃ കാഞ്ചീപുരാലങ്ക്രിയേ .
അംബ ത്വന്മൃദുലസ്മിതാമൃതരസേ മങ്ക്ത്വാ വിധൂയ വ്യഥാം
ആനന്ദോദയസൗധശൃംഗപദവീമാരോഢുമാകാങ്ക്ഷതി .. 36
നമ്രാണാം നഗരാജശേഖരസുതേ നാകാലയാനാം പുരഃ
കാമാക്ഷി ത്വരയാ വിപത്പ്രശമനേ കാരുണ്യധാരാഃ കിരൻ .
ആഗച്ഛന്തമനുഗ്രഹം പ്രകടയന്നാനന്ദബീജാനി തേ
നാസീരേ മൃദുഹാസ ഏവ തനുതേ നാഥേ സുധാശീതലഃ .. 37
കാമാക്ഷി പ്രഥമാനവിഭ്രമനിധിഃ കന്ദർപദർപപ്രസൂഃ
മുഗ്ധസ്തേ മൃദുഹാസ ഏവ ഗിരിജേ മുഷ്ണാതു മേ കിൽബിഷം .
യം ദ്രഷ്ടും വിഹിതേ കരഗ്രഹ ഉമേ ശംഭുസ്ത്രപാമീലിതം
സ്വൈരം കാരയതി സ്മ താണ്ഡവവിനോദാനന്ദിനാ തണ്ഡുനാ .. 38
ക്ഷുണ്ണം കേനചിദേവ ധീരമനസാ കുത്രാപി നാനാജനൈഃ
കർമഗ്രന്ഥിനിയന്ത്രിതൈരസുഗമം കാമാക്ഷി സാമാന്യതഃ .
മുഗ്ധൈർദ്രഷ്ടുമശക്യമേവ മനസാ മൂഢസ്യ മേ മൗക്തികം
മാർഗം ദർശയതു പ്രദീപ ഇവ തേ മന്ദസ്മിതശ്രീരിയം .. 39
ജ്യോത്സ്നാകാന്തിഭിരേവ നിർമലതരം നൈശാകരം മണ്ഡലം
ഹംസൈരേവ ശരദ്വിലാസസമയേ വ്യാകോചമംഭോരുഹം .
സ്വച്ഛൈരേവ വികസ്വരൈരുഡുഗണൈഃ കാമാക്ഷി ബിംബം ദിവഃ
പുണ്യൈരേവ മൃദുസ്മിതൈസ്തവ മുഖം പുഷ്ണാതി ശോഭാഭരം .. 40
മാനഗ്രന്ഥിവിധുന്തുദേന രഭസാദാസ്വാദ്യമാനേ നവ-
പ്രേമാഡംബരപൂർണിമാഹിമകരേ കാമാക്ഷി തേ തത്ക്ഷണം .
ആലോക്യ സ്മിതചന്ദ്രികാം പുനരിമാമുന്മീലനം ജഗ്മുഷീം
ചേതഃ ശീലയതേ ചകോരചരിതം ചന്ദ്രാർധചൂഡാമണേഃ .. 41
കാമാക്ഷി സ്മിതമഞ്ജരീം തവ ഭജേ യസ്യാസ്ത്വിഷാമങ്കുരാൻ
ആപീനസ്തനപാനലാലസതയാ നിശ്ശങ്കമങ്കേശയഃ .
ഊർധ്വം വീക്ഷ്യ വികർഷതി പ്രസൃമരാനുദ്ദാമയാ ശുണ്ഡയാ
സൂനുസ്തേ ബിസശങ്കയാശു കുഹനാദന്താവലഗ്രാമണീഃ .. 42
ഗാഢാശ്ലേഷവിമർദസംഭ്രമവശാദുദ്ദാമമുക്താഗുണ-
പ്രാലംബേ കുചകുംഭയോർവിഗലിതേ ദക്ഷദ്വിഷോ വക്ഷസി .
യാ സഖ്യേന പിനഹ്യതി പ്രചുരയാ ഭാസാ തദീയാം ദശാം
സാ മേ ഖേലതു കാമകോടി ഹൃദയേ സാന്ദ്രസ്മിതാംശുച്ഛടാ .. 43
മന്ദാരേ തവ മന്ഥരസ്മിതരുചാം മാത്സര്യമാലോക്യതേ
കാമാക്ഷി സ്മരശാസനേ ച നിയതോ രാഗോദയോ ലക്ഷ്യതേ .
ചാന്ദ്രീഷു ദ്യുതിമഞ്ജരീഷു ച മഹാന്ദ്വേഷാങ്കുരോ ദൃശ്യതേ
ശുദ്ധാനാം കഥമീദൃശീ ഗിരിസുതേsശുദ്ധാ ദശാ കഥ്യതാം .. 44
പീയൂഷം ഖലു പീയതേ സുരജനൈർദുഗ്ധാംബുധിർമഥ്യതേ
മാഹേശൈശ്ച ജടാകലാപനിഗഡൈർമന്ദാകിനീ നഹ്യതേ .
ശീതാംശുഃ പരിഭൂയതേ ച തമസാ തസ്മാദനേതാദൃശീ
കാമാക്ഷി സ്മിതമഞ്ജരീ തവ വചോവൈദഗ്ധ്യമുല്ലംഘതേ .. 45
ആശങ്കേ തവ മന്ദഹാസലഹരീമന്യാദൃശീം ചന്ദ്രികാം
ഏകാമ്രേശകുടുംബിനി പ്രതിപദം യസ്യാഃ പ്രഭാസംഗമേ .
വക്ഷോജാംബുരുഹേ ന തേ രചയതഃ കാഞ്ചിദ്ദശാം കൗങ്മലീം
ആസ്യാംഭോരുഹമംബ കിഞ്ച ശനകൈരാലംബതേ ഫുല്ലതാം .. 46
ആസ്തീർണാധരകാന്തിപല്ലവചയേ പാതം മുഹുർജഗ്മുഷീ
മാരദ്രോഹിണി കന്ദലത്സ്മരശരജ്വാലാവലീർവ്യഞ്ജതീ .
നിന്ദന്തീ ഘനസാരഹാരവലയജ്യോത്സ്നാമൃണാലാനി തേ
കാമാക്ഷി സ്മിതചാതുരീ വിരഹിണീരീതിം ജഗാഹേതരാം .. 47
സൂര്യാലോകവിധൗ വികാസമധികം യാന്തീ ഹരന്തീ തമ-
സ്സന്ദോഹം നമതാം നിജസ്മരണതോ ദോഷാകരദ്വേഷിണീ .
നിര്യാന്തീ വദനാരവിന്ദകുഹരാന്നിർധൂതജാഡ്യാ നൃണാം
ശ്രീകാമാക്ഷി തവ സ്മിതദ്യുതിമയീ ചിത്രീയതേ ചന്ദ്രികാ .. 48
കുണ്ഠീകുര്യുരമീ കുബോധഘടനാമസ്മന്മനോമാഥിനീം
ശ്രീകാമാക്ഷി ശിവങ്കരാസ്തവ ശിവേ ശ്രീമന്ദഹാസാങ്കുരാഃ .
യേ തന്വന്തി നിരന്തരം തരുണിമസ്തംബേരമഗ്രാമണീ-
കുംഭദ്വന്ദ്വവിഡംബിനി സ്തനതടേ മുക്താകുഥാഡംബരം .. 49
പ്രേംഖന്തഃ ശരദംബുദാ ഇവ ശനൈഃ പ്രേമാനിലൈഃ പ്രേരിതാ
മജ്ജന്തോ മദനാരികണ്ഠസുഷമാസിന്ധൗ മുഹുർമന്ഥരം .
ശ്രീകാമാക്ഷി തവ സ്മിതാംശുനികരാഃ ശ്യാമായമാനശ്രിയോ
നീലാംഭോധരനൈപുണീം തത ഇതോ നിർനിദ്രയന്ത്യഞ്ജസാ .. 50
വ്യാപാരം ചതുരാനനൈകവിഹൃതൗ വ്യാകുർവതീ കുർവതീ
രുദ്രാക്ഷഗ്രഹണം മഹേശി സതതം വാഗൂർമികല്ലോലിതാ .
ഉത്ഫുല്ലം ധവലാരവിന്ദമധരീകൃത്യ സ്ഫുരന്തീ സദാ
ശ്രീകാമാക്ഷി സരസ്വതീ വിജയതേ ത്വന്മന്ദഹാസപ്രഭാ .. 51
കർപൂരദ്യുതിതസ്കരേണ മഹസാ കൽമാഷയത്യാനനം
ശ്രീകാഞ്ചീപുരനായികേ പതിരിവ ശ്രീമന്ദഹാസോsപി തേ .
ആലിംഗത്യതിപീവരാം സ്തനതടീം ബിംബാധരം ചുംബതി
പ്രൗഢം രാഗഭരം വ്യനക്തി മനസോ ധൈര്യം ധുനീതേതരാം .. 52
വൈശദ്യേന ച വിശ്വതാപഹരണക്രീഡാപടീയസ്തയാ
പാണ്ഡിത്യേന പചേലിമേന ജഗതാം നേത്രോത്സവോത്പാദനേ .
കാമാക്ഷി സ്മിതകന്ദലൈസ്തവ തുലാമാരോഢുമുദ്യോഗിനീ
ജ്യോത്സ്നാസൗ ജലരാശിപോഷണതയാ ദൂഷ്യാം പ്രപന്നാ ദശാം .. 53
ലാവണ്യാംബുജിനീമൃണാലവലയൈഃ ശൃംഗാരഗന്ധദ്വിപ-
ഗ്രാമണ്യഃ ശ്രുതിചാമരൈസ്തരുണിമസ്വാരാജ്യതേജോങ്കുരൈഃ .
ആനന്ദാമൃതസിന്ധുവീചിപൃഷതൈരാസ്യാബ്ജഹംസൈസ്തവ
ശ്രീകാമാക്ഷി മഥാന മന്ദഹസിതൈർമത്കം മനഃകൽമഷം .. 54
ഉത്തുംഗസ്തനമണ്ഡലീപരിചലന്മാണിക്യഹാരച്ഛടാ-
ചഞ്ചച്ഛോണിമപുഞ്ജമധ്യസരണിം മാതഃ പരിഷ്കുർവതീ .
യാ വൈദഗ്ധ്യമുപൈതി ശങ്കരജടാകാന്താരവാടീപതത്-
സ്വർവാപീപയസഃ സ്മിതദ്യുതിരസൗ കാമാക്ഷി തേ മഞ്ജുലാ .. 55
സന്നാമൈകജുഷാ ജനേന സുലഭം സംസൂചയന്തീ ശനൈഃ
ഉത്തുംഗസ്യ ചിരാദനുഗ്രഹതരോരുത്പത്സ്യമാനം ഫലം .
പ്രാഥമ്യേന വികസ്വരാ കുസുമവത്പ്രാഗൽഭ്യമഭ്യേയുഷീ
കാമാക്ഷി സ്മിതചാതുരീ തവ മമ ക്ഷേമങ്കരീ കൽപതാം .. 56
ധാനുഷ്കാഗ്രസരസ്യ ലോലകുടിലഭ്രൂലേഖയാ ബിഭ്രതോ
ലീലാലോകശിലീമുഖം നവവയസ്സാമ്രാജ്യലക്ഷ്മീപുഷഃ .
ജേതും മന്മഥമർദിനം ജനനി തേ കാമാക്ഷി ഹാസഃ സ്വയം
വൽഗുർവിഭ്രമഭൂഭൃതോ വിതനുതേ സേനാപതിപ്രക്രിയാം .. 57
യന്നാകമ്പത കാലകൂടകബലീകാരേ ചുചുംബേ ന യദ്-
ഗ്ലാന്യാ ചക്ഷുഷി രൂഷിതാനലശിഖേ രുദ്രസ്യ തത്താദൃശം .
ചേതോ യത്പ്രസഭം സ്മരജ്വരശിഖിജ്വാലേന ലേലിഹ്യതേ
തത്കാമാക്ഷി തവ സ്മിതാംശുകലികാഹേലാഭവം പ്രാഭവം .. 58
സംഭിന്നേവ സുപർവലോകതടിനീ വീചീചയൈര്യാമുനൈഃ
സംമിശ്രേവ ശശാങ്കദീപ്തിലഹരീ നീലൈർമഹാനീരദൈഃ .
കാമാക്ഷി സ്ഫുരിതാ തവ സ്മിതരുചിഃ കാലാഞ്ജനസ്പർധിനാ
കാലിമ്നാ കചരോചിഷാം വ്യതികരേ കാഞ്ചിദ്ദശാമശ്നുതേ .. 59
ജാനീമോ ജഗദീശ്വരപ്രണയിനി ത്വന്മന്ദഹാസപ്രഭാം
ശ്രീകാമാക്ഷി സരോജിനീമഭിനവാമേഷാ യതഃ സർവദാ .
ആസ്യേന്ദോരവലോകനേ പശുപതേരഭ്യേതി സംഫുല്ലതാം
തന്ദ്രാലുസ്തദഭാവ ഏവ തനുതേ തദ്വൈപരീത്യക്രമം .. 60
യാന്തീ ലോഹിതിമാനമഭ്രതടിനീ ധാതുച്ഛടാകർദമൈഃ
ഭാന്തീ ബാലഗഭസ്തിമാലികിരണൈർമേഘാവലീ ശാരദീ .
ബിംബോഷ്ഠദ്യുതിപുഞ്ജചുംബനകലാശോണായമാനേന തേ
കാമാക്ഷി സ്മിതരോചിഷാ സമദശാമാരോഢുമാകാങ്ക്ഷതേ .. 61
ശ്രീകാമാക്ഷി മുഖേന്ദുഭൂഷണമിദം മന്ദസ്മിതം താവകം
നേത്രാനന്ദകരം തഥാ ഹിമകരോ ഗച്ഛേദ്യഥാ തിഗ്മതാം .
ശീതം ദേവി തഥാ യഥാ ഹിമജലം സന്താപമുദ്രാസ്പദം
ശ്വേതം കിഞ്ച തഥാ യഥാ മലിനതാം ധത്തേ ച മുക്താമണിഃ .. 62
ത്വന്മന്ദസ്മിതമഞ്ജരീം പ്രസൃമരാം കാമാക്ഷി ചന്ദ്രാതപം
സന്തഃ സന്തതമാമനന്ത്യമലതാ തല്ലക്ഷണം ലക്ഷ്യതേ .
അസ്മാകം ന ധുനോതി താപമധികം ധൂനോതി നാഭ്യന്തരം
ധ്വാന്തം തത്ഖലു ദുഃഖിനോ വയമിദം കേനേതി നോ വിദ്മഹേ .. 63
നമ്രസ്യ പ്രണയപ്രരൂഢകലഹച്ഛേദായ പാദാബ്ജയോഃ
മന്ദം ചന്ദ്രകിശോരശേഖരമണേഃ കാമാക്ഷി രാഗേണ തേ .
ബന്ധൂകപ്രസവശ്രിയം ജിതവതോ ബംഹീയസീം താദൃശീം
ബിംബോഷ്ഠസ്യ രുചിം നിരസ്യ ഹസിതജ്യോത്സ്നാ വയസ്യായതേ .. 64
മുക്താനാം പരിമോചനം വിദധതസ്തത്പ്രീതിനിഷ്പാദിനീ
ഭൂയോ ദൂരത ഏവ ധൂതമരുതസ്തത്പാലനം തന്വതീ .
ഉദ്ഭൂതസ്യ ജലാന്തരാദവിരതം തദ്ദൂരതാം ജഗ്മുഷീ
കാമാക്ഷി സ്മിതമഞ്ജരീ തവ കഥം കംബോസ്തുലാമശ്നുതേ .. 65
ശ്രീകാമാക്ഷി തവ സ്മിതദ്യുതിഝരീവൈദഗ്ധ്യലീലായിതം
പശ്യന്തോsപി നിരന്തരം സുവിമലംമന്യാ ജഗന്മണ്ഡലേ .
ലോകം ഹാസയിതും കിമർഥമനിശം പ്രാകാശ്യമാതന്വതേ
മന്ദാക്ഷം വിരഹയ്യ മംഗലതരം മന്ദാരചന്ദ്രാദയഃ .. 66
ക്ഷീരാബ്ധേരപി ശൈലരാജതനയേ ത്വന്മന്ദഹാസസ്യ ച
ശ്രീകാമാക്ഷി വലക്ഷിമോദയനിധേഃ കിഞ്ചിദ്ഭിദാം ബ്രൂമഹേ .
ഏകസ്മൈ പുരുഷായ ദേവി സ ദദൗ ലക്ഷ്മീം കദാചിത്പുരാ
സർവേഭ്യോsപി ദദാത്യസൗ തു സതതം ലക്ഷ്മീം ച വാഗീശ്വരീം .. 67
ശ്രീകാഞ്ചീപുരരത്നദീപകലികേ താന്യേവ മേനാത്മജേ
ചാകോരാണി കുലാനി ദേവി സുതരാം ധന്യാനി മന്യാമഹേ .
കമ്പാതീരകുടുംബചങ്ക്രമകലാചുഞ്ചൂനി ചഞ്ചൂപുടൈഃ
നിത്യം യാനി തവ സ്മിതേന്ദുമഹസാമാസ്വാദമാതന്വതേ .. 68
ശൈത്യപ്രക്രമമാശ്രിതോsപി നമതാം ജാഡ്യപ്രഥാം ധൂനയൻ
നൈർമല്യം പരമം ഗതോsപി ഗിരിശം രാഗാകുലം ചാരയൻ .
ലീലാലാപപുരസ്സരോsപി സതതം വാചംയമാൻപ്രീണയൻ
കാമാക്ഷി സ്മിതരോചിഷാം തവ സമുല്ലാസഃ കഥം വർണ്യതേ .. 69
ശ്രോണീചഞ്ചലമേഖലാമുഖരിതം ലീലാഗതം മന്ഥരം
ഭ്രൂവല്ലീചലനം കടാക്ഷവലനം മന്ദാക്ഷവീക്ഷാചണം .
യദ്വൈദഗ്ധ്യമുഖേന മന്മഥരിപും സംമോഹയന്ത്യഞ്ജസാ
ശ്രീകാമാക്ഷി തവ സ്മിതായ സതതം തസ്മൈ നമസ്കുർമഹേ .. 70
ശ്രീകാമാക്ഷി മനോജ്ഞമന്ദഹസിതജ്യോതിഷ്പ്രരോഹേ തവ
സ്ഫീതശ്വേതിമസാർവഭൗമസരണിപ്രാഗൽഭ്യമഭ്യേയുഷി .
ചന്ദ്രോsയം യുവരാജതാം കലയതേ ചേടീധുരം ചന്ദ്രികാ
ശുദ്ധാ സാ ച സുധാഝരീ സഹചരീസാധർമ്യമാലംബതേ .. 71
ജ്യോത്സ്നാ കിം തനുതേ ഫലം തനുമതാമൗഷ്ണ്യപ്രശാന്തിം വിനാ
ത്വന്മന്ദസ്മിതരോചിഷാ തനുമതാം കാമാക്ഷി രോചിഷ്ണുനാ .
സന്താപോ വിനിവാര്യതേ നിജവചഃ പ്രാചുര്യമങ്കൂര്യതേ
സൗന്ദര്യം പരിപൂര്യതേ ജഗതി സാ കീർതിശ്ച സഞ്ചാര്യതേ .. 72
വൈമല്യം കുമുദശ്രിയാം ഹിമരുചഃ കാന്ത്യൈവ സന്ധുക്ഷ്യതേ
ജ്യോത്സ്നാരോചിരപി പ്രദോഷസമയം പ്രാപ്യൈവ സമ്പദ്യതേ .
സ്വച്ഛത്വം നവമൗക്തികസ്യ പരമം സംസ്കാരതോ ദൃശ്യതേ
കാമാക്ഷ്യാഃ സ്മിതദീധിതേർവിശദിമാ നൈസർഗികോ ഭാസതേ .. 73
പ്രാകാശ്യം പരമേശ്വരപ്രണയിനി ത്വന്മന്ദഹാസശ്രിയഃ
ശ്രീകാമാക്ഷി മമ ക്ഷിണോതു മമതാവൈചക്ഷണീമക്ഷയാം .
യദ്ഭീത്യേവ നിലീയതേ ഹിമകരോ മേഘോദരേ ശുക്തികാ-
ഗർഭേ മൗക്തികമണ്ഡലീ ച സരസീമധ്യേ മൃണാലീ ച സാ .. 74
ഹേരംബേ ച ഗുഹേ ച ഹർഷഭരിതം വാത്സല്യമങ്കൂരയത്
മാരദ്രോഹിണി പൂരുഷേ സഹഭുവം പ്രേമാങ്കുരം വ്യഞ്ജയത് .
ആനമ്രേഷു ജനേഷു പൂർണകരുണാവൈദഗ്ധ്യമുത്താലയത്
കാമാക്ഷി സ്മിതമഞ്ജസാ തവ കഥങ്കാരം മയാ കഥ്യതേ .. 75
സങ്ക്രുദ്ധദ്വിജരാജകോsപ്യവിരതം കുർവന്ദ്വിജൈഃ സംഗമം
വാണീപദ്ധതിദൂരഗോsപി സതതം തത്സാഹചര്യം വഹൻ .
അശ്രാന്തം പശുദുർലഭോsപി കലയൻപത്യൗ പശൂനാം രതിം
ശ്രീകാമാക്ഷി തവ സ്മിതാമൃതരസസ്യന്ദോ മയി സ്പന്ദതാം .. 76
ശ്രീകാമാക്ഷി മഹേശ്വരേ നിരുപമപ്രേമാങ്കുരപ്രക്രമം
നിത്യം യഃ പ്രകടീകരോതി സഹജാമുന്നിദ്രയന്മാധുരീം .
തത്താദൃക്തവ മന്ദഹാസമഹിമാ മാതഃ കഥം മാനിതാം
തന്മൂർധ്നാ സുരനിമ്നഗാം ച കലികാമിന്ദോശ്ച താം നിന്ദതി .. 77
യേ മാധുര്യവിഹാരമണ്ടപഭുവോ യേ ശൈത്യമുദ്രാകരാ
യേ വൈശദ്യദശാവിശേഷസുഭഗാസ്തേ മന്ദഹാസാങ്കുരാഃ .
കാമാക്ഷ്യാഃ സഹജം ഗുണത്രയമിദം പര്യായതഃ കുർവതാം
വാണീഗുംഫനഡംബരേ ച ഹൃദയേ കീർതിപ്രരോഹേ ച മേ .. 78
കാമാക്ഷ്യാ മൃദുലസ്മിതാംശുനികരാ ദാക്ഷാന്തകേ വീക്ഷണേ
മന്ദാക്ഷഗ്രഹിലാ ഹിമദ്യുതിമയൂഖാക്ഷേപദീക്ഷാങ്കുരാഃ .
ദാക്ഷ്യം പക്ഷ്മലയന്തു മാക്ഷികഗുഡദ്രാക്ഷാഭവം വാക്ഷു മേ
സൂക്ഷ്മം മോക്ഷപഥം നിരീക്ഷിതുമപി പ്രക്ഷാലയേയുർമനഃ .. 79
ജാത്യാ ശീതലശീതലാനി മധുരാണ്യേതാനി പൂതാനി തേ
ഗാംഗാനീവ പയാംസി ദേവി പടലാന്യൽപസ്മിതജ്യോതിഷാം .
ഏനഃപങ്കപരമ്പരാമലിനിതാമേകാമ്രനാഥപ്രിയേ
പ്രജ്ഞാനാത്സുതരാം മദീയധിഷണാം പ്രക്ഷാലയന്തു ക്ഷണാത് .. 80
അശ്രാന്തം പരതന്ത്രിതഃ പശുപതിസ്ത്വന്മന്ദഹാസാങ്കുരൈഃ
ശ്രീകാമാക്ഷി തദീയവർണസമതാസംഗേന ശങ്കാമഹേ .
ഇന്ദും നാകധുനീം ച ശേഖരയതേ മാലാം ച ധത്തേ നവൈഃ
വൈകുണ്ഠൈരവകുണ്ഠനം ച കുരുതേ ധൂലീചയൈർഭാസ്മനൈഃ .. 81
ശ്രീകാഞ്ചീപുരദേവതേ മൃദുവചസ്സൗരഭ്യമുദ്രാസ്പദം
പ്രൗഢപ്രേമലതാനവീനകുസുമം മന്ദസ്മിതം താവകം .
മന്ദം കന്ദലതി പ്രിയസ്യ വദനാലോകേ സമാഭാഷണേ
ശ്ലക്ഷ്ണേ കുങ്മലതി പ്രരൂഢപുലകേ ചാശ്ലേഷണേ ഫുല്ലതി .. 82
കിം ത്രൈസ്രോതസമംബികേ പരിണതം സ്രോതശ്ചതുർഥം നവം
പീയൂഷസ്യ സമസ്തതാപഹരണം കിംവാ ദ്വിതീയം വപുഃ .
കിംസ്വിത്ത്വന്നികടം ഗതം മധുരിമാഭ്യാസായ ഗവ്യം പയഃ
ശ്രീകാഞ്ചീപുരനായകപ്രിയതമേ മന്ദസ്മിതം താവകം .. 83
ഭൂഷാ വക്ത്രസരോരുഹസ്യ സഹജാ വാചാം സഖീ ശാശ്വതീ
നീവീ വിഭ്രമസന്തതേഃ പശുപതേഃ സൗധീ ദൃശാം പാരണാ .
ജീവാതുർമദനശ്രിയഃ ശശിരുചേരുച്ചാടനീ ദേവതാ
ശ്രീകാമാക്ഷി ഗിരാമഭൂമിമയതേ ഹാസപ്രഭാമഞ്ജരീ .. 84
സൂതിഃ ശ്വേതിമകന്ദലസ്യ വസതിഃ ശൃംഗാരസാരശ്രിയഃ
പൂർതിഃ സൂക്തിഝരീരസസ്യ ലഹരീ കാരുണ്യപാഥോനിധേഃ .
വാടീ കാചന കൗസുമീ മധുരിമസ്വാരാജ്യലക്ഷ്മ്യാസ്തവ
ശ്രീകാമാക്ഷി മമാസ്തു മംഗലകരീ ഹാസപ്രഭാചാതുരീ .. 85
ജന്തൂനാം ജനിദുഃഖമൃത്യുലഹരീസന്താപനം കൃന്തതഃ
പ്രൗഢാനുഗ്രഹപൂർണശീതലരുചോ നിത്യോദയം ബിഭ്രതഃ .
ശ്രീകാമാക്ഷി വിസൃത്വരാ ഇവ കരാ ഹാസാങ്കുരാസ്തേ ഹഠാത്
ആലോകേന നിഹന്യുരന്ധതമസസ്തോമസ്യ മേ സന്തതിം .. 86
ഉത്തുംഗസ്തനമണ്ഡലസ്യ വിലസല്ലാവണ്യലീലാനടീ-
രംഗസ്യ സ്ഫുടമൂർധ്വസീമനി മുഹുഃ പ്രാകാശ്യമഭ്യേയുഷീ .
ശ്രീകാമാക്ഷി തവ സ്മിതദ്യുതിതതിർബിംബോഷ്ഠകാന്ത്യങ്കുരൈഃ
ചിത്രാം വിദ്രുമമുദ്രിതാം വിതനുതേ മൗക്തീം വിതാനശ്രിയം .. 87
സ്വാഭാവ്യാത്തവ വക്ത്രമേവ ലലിതം സന്തോഷസമ്പാദനം
ശംഭോഃ കിം പുനരഞ്ചിതസ്മിതരുചഃ പാണ്ഡിത്യപാത്രീകൃതം .
അംഭോജം സ്വത ഏവ സർവജഗതാം ചക്ഷുഃപ്രിയംഭാവുകം
കാമാക്ഷി സ്ഫുരിതേ ശരദ്വികസിതേ കീദൃഗ്വിധം ഭ്രാജതേ .. 88
പുംഭിർനിർമലമാനസൈർവിദധതേ മൈത്രീം ദൃഢം നിർമലാം
ലബ്ധ്വാ കർമലയം ച നിർമലതരാം കീർതിം ലഭന്തേതരാം .
സൂക്തിം പക്ഷ്മലയന്തി നിർമലതമാം യത്താവകാഃ സേവകാഃ
തത്കാമാക്ഷി തവ സ്മിതസ്യ കലയാ നൈർമല്യസീമാനിധേഃ .. 89
ആകർഷന്നയനാനി നാകിസദസാം ശൈത്യേന സംസ്തംഭയൻ
ഇന്ദും കിഞ്ച വിമോഹയൻപശുപതിം വിശ്വാർതിമുച്ചാടയൻ .
ഹിംസൻസംസൃതിഡംബരം തവ ശിവേ ഹാസാഹ്വയോ മാന്ത്രികഃ
ശ്രീകാമാക്ഷി മദീയമാനസതമോവിദ്വേഷണേ ചേഷ്ടതാം .. 90
ക്ഷേപീയഃ ക്ഷപയന്തു കൽമഷഭയാന്യസ്മാകമൽപസ്മിത-
ജ്യോതിർമണ്ഡലചങ്ക്രമാസ്തവ ശിവേ കാമാക്ഷി രോചിഷ്ണവഃ .
പീഡാകർമഠകർമഘർമസമയവ്യാപാരതാപാനല-
ശ്രീപാതാ നവഹർഷവർഷണസുധാസ്രോതസ്വിനീശീകരാഃ .. 91
ശ്രീകാമാക്ഷി തവ സ്മിതൈന്ദവമഹഃപൂരേ പരിസ്ഫൂർജതി
പ്രൗഢാം വാരിധിചാതുരീം കലയതേ ഭക്താത്മനാം പ്രാതിഭം .
ദൗർഗത്യപ്രസരാസ്തമഃപടലികാസാധർമ്യമാബിഭ്രതേ
സർവം കൈരവസാഹചര്യപദവീരീതിം വിധത്തേ പരം .. 92
മന്ദാരാദിഷു മന്മഥാരിമഹിഷി പ്രാകാശ്യരീതിം നിജാം
കാദാചിത്കതയാ വിശങ്ക്യ ബഹുശോ വൈശദ്യമുദ്രാഗുണഃ .
ശ്രീകാമാക്ഷി തദീയസംഗമകലാമന്ദീഭവത്കൗതുകഃ
സാതത്യേന തവ സ്മിതേ വിതനുതേ സ്വൈരാസനാവാസനാം .. 93
ഇന്ധാനേ ഭവവീതിഹോത്രനിവഹേ കർമൗഘചണ്ഡാനില-
പ്രൗഢിമ്നാ ബഹുലീകൃതേ നിപതിതം സന്താപചിന്താകുലം .
മാതർമാം പരിഷിഞ്ച കിഞ്ചിദമലൈഃ പീയൂഷവർഷൈരിവ
ശ്രീകാമാക്ഷി തവ സ്മിതദ്യുതികണൈഃ ശൈശിര്യലീലാകരൈഃ .. 94
ഭാഷായാ രസനാഗ്രഖേലനജുഷഃ ശൃംഗാരമുദ്രാസഖീ-
ലീലാജാതരതേഃ സുഖേന നിയമസ്നാനായ മേനാത്മജേ .
ശ്രീകാമാക്ഷി സുധാമയീവ ശിശിരാ സ്രോതസ്വിനീ താവകീ
ഗാഢാനന്ദതരംഗിതാ വിജയതേ ഹാസപ്രഭാചാതുരീ .. 95
സന്താപം വിരലീകരോതു സകലം കാമാക്ഷി മച്ചേതനാ
മജ്ജന്തീ മധുരസ്മിതാമരധുനീകല്ലോലജാലേഷു തേ .
നൈരന്തര്യമുപേത്യ മന്മഥമരുല്ലോലേഷു യേഷു സ്ഫുടം
പ്രേമേന്ദുഃ പ്രതിബിംബിതോ വിതനുതേ കൗതൂഹലം ധൂർജടേഃ .. 96
ചേതഃക്ഷീരപയോധിമന്ഥരചലദ്രാഗാഖ്യമന്ഥാചല-
ക്ഷോഭവ്യാപൃതിസംഭവാം ജനനി തേ മന്ദസ്മിതശ്രീസുധാം .
സ്വാദംസ്വാദമുദീതകൗതുകരസാ നേത്രത്രയീ ശാങ്കരീ
ശ്രീകാമാക്ഷി നിരന്തരം പരിണമത്യാനന്ദവീചീമയീ .. 97
ആലോകേ തവ പഞ്ചസായകരിപോരുദ്ദാമകൗതൂഹല-
പ്രേംഖന്മാരുതഘട്ടനപ്രചലിതാദാനന്ദദുഗ്ധാംബുധേഃ .
കാചിദ്വീചിരുദഞ്ചതി പ്രതിനവാ സംവിത്പ്രരോഹാത്മികാ
താം കാമാക്ഷി കവീശ്വരാഃ സ്മിതമിതി വ്യാകുർവതേ സർവദാ .. 98
സൂക്തിഃ ശീലയതേ കിമദ്രിതനയേ മന്ദസ്മിതാത്തേ മുഹുഃ
മാധുര്യാഗമസമ്പ്രദായമഥവാ സൂക്തേർനു മന്ദസ്മിതം .
ഇത്ഥം കാമപി ഗാഹതേ മമ മനഃ സന്ദേഹമാർഗഭ്രമിം
ശ്രീകാമാക്ഷി ന പാരമാർഥ്യസരണിസ്ഫൂർതൗ നിധത്തേ പദം .. 99
ക്രീഡാലോലകൃപാസരോരുഹമുഖീസൗധാംഗണേഭ്യഃ കവി-
ശ്രേണീവാക്പരിപാടികാമൃതഝരീസൂതീഗൃഹേഭ്യഃ ശിവേ .
നിർവാണാങ്കുരസാർവഭൗമപദവീസിംഹാസനേഭ്യസ്തവ
ശ്രീകാമാക്ഷി മനോജ്ഞമന്ദഹസിതജ്യോതിഷ്കണേഭ്യോ നമഃ .. 100
ആര്യാമേവ വിഭാവയന്മനസി യഃ പാദാരവിന്ദം പുരഃ
പശ്യന്നാരഭതേ സ്തുതിം സ നിയതം ലബ്ധ്വാ കടാക്ഷച്ഛവിം .
കാമാക്ഷ്യാ മൃദുലസ്മിതാംശുലഹരീജ്യോത്സ്നാവയസ്യാന്വിതാം
ആരോഹത്യപവർഗസൗധവലഭീമാനന്ദവീചീമയീം .. 101
.. ഇതി മന്ദസ്മിതശതകം സമ്പൂർണം ..