கோவிந்தனின் வாக்கும் கோவிந்த தாமோதர ஸ்வாமிகளின் வாழ்வும்

ஸ்ரீக்ருஷ்ண பகவான் தன்னுடைய அவதார பூர்த்திக்கு முன்னால், தன்னுடைய ப்ரிய சகாவும், பரம பக்தருமான உத்தவருக்குச் சொன்ன உபதேசங்கள் ‘உத்தவ கீதை’ என்று கொண்டாடப்படுகிறது. ஸ்ரீமந்நாராயணீயத்தின் 91 முதல் 97 வரையிலான தசகங்களில் ஸ்ரீ நாராயண பட்டத்ரி கொடுத்துள்ள உத்தவ கீதையின் ஸாரத்தையும், அதை நம் குருநாதர் கோவிந்த தாமோதர ஸ்வாமிகள் வாழ்ந்து காண்பித்த விதத்தையும் இணைத்து “கோவிந்தனின் வாக்கும் கோவிந்த தாமோதர ஸ்வாமிகளின் வாழ்வும்” என்ற தலைப்பில் ஒரு புத்தகமாக வெளியிட்டுள்ளேன். அதன் ப்ரதியை கீழ்கண்ட இணைப்பில் இருந்து பெறலாம். நீங்களும் படித்து நண்பர்களுக்கும் பகிருங்கள்.

கோவிந்தனின் வாக்கும் கோவிந்த தாமோதர ஸ்வாமிகளின் வாழ்வும் – தமிழ் புத்தகம் PDF

ஸ்ரீமதி ரஜனி அர்ஜுன் சங்கர் இந்த புத்தகத்துக்கு அளித்த அணிந்துரை. 

ஸ்ரீமன் நாராயணீயத்தையும் கோவிந்த தாமோதர ஸ்வாமிகளுடைய உபதேசங்களையும் அடிப்படையாகக் கொண்டு மலர்ந்துள்ள இந்த அழகான நூலைப் படித்த பொழுது என் உள்ளத்தில் தோன்றிய சில சிந்தனைகளை இங்கே பகிர்ந்துகொள்ள விரும்புகிறேன்.

த்ரிகோணாந்தர தீபிகா

முதலாவதாக, இந்த நூலின் பின்னணியில் ஒரு முப்பெரும் சங்கமத்தைக் காண முடிகிறது:

• ஸ்ரீமத் பாகவதத்தில் கண்ணன் தன் ஆருயிர் தோழனும் சீடனுமான உத்தவருக்கு அருளிய உபதேசங்கள் ஒரு பக்கம் 
• அதனை அற்புதமாகச் சுருக்கி, ஸாரமாக  நமக்குப் பயன்படும் வண்ணம், உபதேசக் கருத்துக்களையே பிரார்த்தனைகளாக மாற்றி, நாராயணீயத்தில் நாராயண பட்டத்திரி அருளிச்செய்த ஏழு தசகங்கள் மறுபக்கம் .
• இந்த நாராயணீயக் கடலில் ஆழ்ந்து மூழ்கி, அதன் பெருமைகளை உலகிற்கு உணர்த்தி, இந்த ஏழு தசகங்களையும் சாதகர்கள் மீண்டும் மீண்டும் பாராயணம் செய்ய வேண்டும் என்று வலியுறுத்திய ஸ்வாமிகள் மற்றொரு புறம்.

பகவான், பட்டத்திரி, ஸ்வாமிகள் ஆகிய இந்த மூவரின் சங்கமத்தை ஒரு த்ரிகோணமாக (முக்கோணமாக)  கொண்டு அதன் நடுவில் ஒரு விளக்கு போல , “த்ரிகோணாந்தர தீபிகா” என்று போற்றப்படும் அம்பாளைப் போல, இந்நூல் திகழ்கிறது.

தத்துவத்திலிருந்து நடைமுறைக்கு: முத்துக்களை இணைத்த மாலை

இரண்டாவதாக, வேதாந்த நூல்களையோ உபநிடதங்களையோ பயிலும்பொழுது, “த்விதீயாத் பயம் பவதி” (இரண்டாவதாக ஒன்று இருப்பதாக எண்ணுவதே அச்சத்திற்குக் காரணம்) போன்ற அத்வைதக் கருத்துக்கள் நமக்கு அறிவளவில் விளங்குகின்றன. ஆனால், அவற்றை எவ்வாறு அன்றாட வாழ்வில் நடைமுறைப்படுத்துவது, அந்த நிலையை எவ்வாறு அடைவது என்ற கேள்வி எழுகிறது.

இதற்கு நாராயணீய ஸ்லோகங்கள் ஒரு பாலமாக பாதையை அமைக்கின்றன. “பகவானே! இரண்டாவது பொருள் என்ற பிரமையால் அச்சம் உண்டாகிறது; இந்த உலகமே மாயை; மாயை உனக்கு உட்பட்டது; எனவே உன்னிடமே சரணடைகிறேன், என்னைக் காத்தருள்” என்று இப்படி பட்டத்திரி மிக அழகாக படிப்படியாக வழிநடத்துகிறார். உலக இன்பங்களின் நிலையாமை முதலிய  தோஷங்களை உணர்ந்து, பக்தி செய்ய வேண்டும் என்பதை அவர் தெளிவுபடுத்துகிறார்.

ஆயினும், நாராயணீயமும் ஒர் ஆழ்கடலேயாகும். அதில் மூழ்கி, ஸாரமான ஞான முத்துக்களை எடுத்துக் கொடுக்க, ஸ்வாமிகள் போன்ற ஒரு மகானின் கருணை தேவைப்படுகிறது. அவ்வாறு ஸ்வாமிகள் தொகுத்தளித்த அருமையான முத்துக்களை, இப்போது கணபதி அண்ணா ஒரு அழகிய மாலையாகக் கோர்த்து நமக்கு வழங்கியுள்ளார்.

முக்தி மார்க்கத்துக்கு பட்டத்திரி சொல்லும் கோட்பாடுகளை மிக எளிமையான, வாழ்க்கையின் தினசரி  நடைமுறைகளாக ஸ்வாமிகள் எடுத்துக்கொடுத்த பாங்கு இந்நூலில் மிளிர்கிறது:

• நாம ஜபமும் ஸ்தோத்திரமும்: கடினமான மந்திரங்களை நாடிச் செல்ல வேண்டியதில்லை; மகான்கள் அருளிய ஸ்தோத்திரங்களே சிறந்த மந்திரங்கள்; அவற்றையே நாம் தொடர்ந்து பாராயணம் செய்ய வேண்டும்.
• சாதனையில் உறுதி: சத்சங்கத்தின் இன்றியமையாமை, சாத்வீகமான , ஏகாந்த சிந்தனை, எளிமையான வழிபாடாக இருந்தாலும் அதை  சற்றும் வழுவாமல் செய்வதன்  முக்கியத்துவம்.
• பாவமும் ரசமும்: பாராயணத்தை இயந்திரத்தனமாகச் செய்யாமல், இறைவனின் குணங்களையும் லீலைகளையும் மனதார அனுபவித்து, ரசபூர்வமாகச் செய்ய வேண்டிய முறை.
• அகந்தை அழிவும் ஞானமும்: யசோதைக்கு மஹாமாயை மகளாகத் தோன்றிய பிறகே கிருஷ்ணன் கிடைத்தான்; அதாவது பிரம்மவித்யையான அம்பாளின் கருணையால் அகந்தை நசிந்த பிறகே பரம்பொருள் தரிசனம் கிட்டும் போன்ற ஆழமான உள்ளுறைகள். 

இவ்வாறு மந்த புத்தியுடையோரும் புரிந்துகொள்ளும் வண்ணம், தத்துவங்களை தெளிவுபடுத்தி, வாழ்வில் பயில்வதற்க்கு ஏற்றதாக  மாற்றியமைத்த ஸ்வாமிகளின் கருணையை இந்நூல் முழுமையாகப் புலப்படுத்துகிறது.

திருப்புகழும் தியாகராஜ கீர்த்தனையும்: “ஏகம் ஸத்”

மூன்றாவதாக, இந்நூலில் அருணகிரிநாதரின் திருப்புகழ் முதலிய நூல்களில் பொதிந்துள்ள உபதேசங்களை எடுத்துக் காட்டியிருப்பது தனிச்சிறப்பு.  திருப்புகழில் பாகவதக் கருத்துக்களை ஸ்வாமிகளின் உபதேசங்களின் வாயிலாகவே  முதன்முதலில் உணர்ந்தேன்.

“உடுக்கத் துகில்” என்ற பாடலின் முதற்பகுதி ஸ்ரீமத் பாகவதம் காட்டும் உலக நிலையாமையையும், பிற்பகுதி சுந்தர காண்டத்தின் சாரத்தையும் உள்ளடக்கியது என்று ஸ்வாமிகள் விளக்கியதை அறிந்தபொழுது, திருப்புகழை அணுகுவதற்கே ஒரு புதிய பார்வை கிட்டியது.

அதேபோல், “அந்தோ மனமே” என்ற பாடலில் உலக அநித்யத்தை உணர்ந்து முருகனிடம் சரணடையும்பொழுது, “மயில் வாகனர் சீட்டு இது, “வந்தாளுவம் நாம்” என்று அவனளிக்கும் அபய வாக்கு, பக்தனுக்கு அளப்பரிய நிம்மதியையும் உற்சாகத்தையும் அளிக்கிறது. பகவான் நமக்குத் துணையிருக்க நாம் எதற்கும் அஞ்சத் தேவையில்லை என்ற பேருண்மையை திருப்புகழ், கந்தர் அநுபூதி, கந்தர் அலங்காரப் பாடல்கள் அழகாக உணர்த்துகின்றன.

“இந்த கன்னானந்தமே” என்ற தியாகராஜரின் கீர்த்தனையின் பொருளைச் வாசித்த பொழுது, இதே கருத்துக்களை அவரும் சொல்வது வியப்பாக இருந்தது “பகவானின் நாமங்களையும் குணங்களையும் பாடி ஆடுவதை விடப் பெரிய பேரின்பம் இவ்வுலகில் உண்டோ? அதில் தேகத்தையே மறந்து “ஸோஹம்” நிலையில் இருக்கலாம்” நாமஜபம் செய்யும்போது, உலகமே ஒளிமயமான உன் ரூபமாக காண்பதைவிட பெரிய ஆனந்தம் உண்டோ ? “  என்று அவர் பாட “ஏகம் ஸத் விப்ரா பகுதா வதந்தி” என அத்தனை  மகான்களும் ஒரே மெய்ப்பொருளையே வெவ்வேறு விதமாக பாடியுள்ளனர் என்றறியலாம்.

மகான்களின் தெய்வீக வாக்குகளைச் சரியாகப் புரிந்து கொள்ள  நமக்கு வழிகாட்டியவர்  ஸ்வாமிகள். அவரது உபதேசங்களை  ஒரே இடத்தில்  மிக எளிமையாகவும் முழுமையாகவும் திரட்டித் தந்துள்ள இந்த நூல், சாதகர்கள் அனைவருக்கும் பேருதவியாக விளங்கும் என்பதில் ஐயமில்லை.

மேலும் சில நண்பர்கள் இந்த புத்தகத்தை படித்துவிட்டு பகிர்ந்து கொண்ட கருத்துகளை ஒலிப்பதிவாக இங்கே கேட்கலாம் – Folder with speeches from the book release function