நாராயணீயம் முப்பத்தி ஏழாவது தசகம் ஒலிப்பதிவு; Narayaneeyam 37th Dashakam audio mp3
Have given the 37th dashakam lyrics below, the way Govinda Damodara Swamigal splits while chanting. I have also attempted to chant that way in the recording above.
श्रीमन्नारायणीये सप्तत्रिंशं दशकम्
सान्द्रानन्दतनो हरे ननु पुरा, दैवासुरे सङ्गरे,
त्वत्कृत्ता अपि, कर्मशेषवशत:, ये, ते न याता गतिम् ।
तेषां भूतलजन्मनां, दितिभुवां भारेण, दूरार्दिता,
भूमि:, प्राप विरिञ्चं, आश्रितपदं, देवै: पुरैवागतै: ॥ १ ॥
हा हा, दुर्जनभूरिभारमथितां, पाथोनिधौ पातुकां,
एतां पालय, हन्त, मे विवशतां, सम्पृच्छ, देवान् इमान् ।
इत्यादिप्रचुरप्रलापविवशां, आलोक्य धाता महीं,
देवानां वदनानि वीक्ष्य परित:, दध्यौ, भवन्तं, हरे ॥ २ ॥
ऊचे च, अम्बुजभू:, अमून् अयि सुरा:, सत्यं धरित्र्या वच:,
नन्वस्या, भवतां च रक्षणविधौ, दक्षो हि, लक्ष्मीपति: ।
सर्वे शर्वपुरस्सरा वयमितो, गत्वा पयोवारिधिं,
नत्वा तं, स्तुमहे, जवात्, इति ययु:, साकं तवाकेतनम् ॥ ३ ॥
ते, मुग्धानिलशालिदुग्धजलधे:, तीरं गता: सङ्गता:,
यावत्, त्वत्पदचिन्तनैकमनस:, तावत्, स पाथोजभू: ।
त्वद्वाचं हृदये निशम्य, सकलान् आनन्दयन् ऊचिवान्,
आख्यात: परमात्मना, स्वयमहं, वाक्यं तत् आकर्ण्यताम् ॥ ४ ॥
जाने दीनदशामहं, दिविषदां, भूमेश्च भीमैर्नृपै:,
तत्क्षेपाय, भवामि यादवकुले, सोऽहं समग्रात्मना ।
देवा:, वृष्णिकुले भवन्तु कलया, देवाङ्गनाश्चावनौ,
मत्सेवार्थं इति, त्वदीयवचनं, पाथोजभू: ऊचिवान् ॥ ५ ॥
श्रुत्वा, कर्णरसायनं तव वच:, सर्वेषु, निर्वापित-
स्वान्तेषु, ईश, गतेषु, तावककृपापीयूष,तृप्तात्मसु ।
विख्याते, मधुरापुरे किल, भवत्सान्निध्यपुण्योत्तरे,
धन्यां, देवकनन्दनां, उदवहत्, राजा, स शूरात्मज: ॥ ६ ॥
उद्वाहावसितौ, तदीयसहज:, कंसोऽथ सम्मानयन्,
एतौ, सूततया गत: पथि रथे, व्योमोत्थया, त्वद्गिरा ।
अस्या:, त्वां, अतिदुष्टं, अष्टमसुतो हन्तेति, हन्तेरित:,
सन्त्रासात्, स तु हन्तुं, अन्तिकगतां, तन्वीं, कृपाणीं, अधात् ॥ ७ ॥
गृह्णान:, चिकुरेषु तां खलमति:, शौरेश्चिरं सान्त्वनै:,
नो मुञ्चन् पुन:, आत्मजार्पणगिरा, प्रीतोऽथ, यातो गृहान् ।
आद्यं, त्वत्सहजं तथाऽर्पितमपि, स्नेहेन नाहन्नसौ,
दुष्टानामपि देव, पुष्टकरुणा, दृष्टा हि धी:, एकदा ॥ ८ ॥
तावत्त्वन्मनसैव, नारदमुनि:, प्रोचे स भोजेश्वरं,
यूयं नन्वसुरा:, सुराश्च यदव:. जानासि, किं न प्रभो ।
मायावी स हरि:, भवद्वधकृते, भावी, सुरप्रार्थनात्,
इत्याकर्ण्य, यदून्, अदूधुनदसौ, शौरेश्च, सूनून्, अहन् ॥ ९ ॥
प्राप्ते सप्तमगर्भतां, अहिपतौ, त्वत्प्रेरणान्मायया,
नीते माधव, रोहिणीं, त्वमपि भो:, सच्चित्सुखैकात्मक: ।
देवक्या:, जठरं विवेशिथ, विभो, संस्तूयमान: सुरै:,
स त्वं कृष्ण, विधूय रोगपटलीं, भक्तिं परां, देहि मे ॥ १० ॥
ॐ तत्सदिति श्रीमन्नारायणीये सप्तत्रिंशं दशकं समाप्तम् |
श्री हरये नम: | रमा रमण गोविन्द, गोविन्द | श्रीकृष्णार्पणमस्तु |
If you prefer regular lyrics it can be found here – Narayaneeyam 37th dashakam.