சிவானந்தலஹரி 68 முதல் 100 ஸ்லோகங்கள் ஒலிப்பதிவு
अमितमुदमृतं मुहुर्दुहन्तीं, विमलभवत्पदगोष्ठमावसन्तीम् ।
सदय पशुपते, सुपुण्यपाकां, मम परिपालय, भक्तिधेनुमेकाम् ॥ ६८॥
जडता पशुता कलङ्किता, कुटिलचरत्वं च, नास्ति मयि देव ।
अस्ति यदि राजमौले, भवदाभरणस्य, नास्मि किं पात्रम् ॥ ६९॥
अरहसि रहसि स्वतन्त्रबुद्ध्या, वरिवसितुं सुलभः, प्रसन्नमूर्तिः ।
अगणितफलदायकः प्रभुर्मे, जगदधिको हृदि, राजशेखरोऽस्ति ॥ ७०॥
आरूढभक्तिगुणकुञ्चितभावचापयुक्तैः, शिवस्मरणबाणगणैरमोघैः ।
निर्जित्य किल्बिषरिपून्, विजयी सुधीन्द्रः, सानन्दमावहति सुस्थिरराजलक्ष्मीम् ॥ ७१॥
ध्यानाञ्जनेन समवेक्ष्य, तमःप्रदेशं भित्वा, महाबलिभि: ईश्वरनाममन्त्रैः ।
दिव्याश्रितं, भुजगभूषणं, उद्वहन्ति ये, पादपद्ममिह ते, शिव, ते कृतार्थाः ॥ ७२॥
भूदारतां उदवहत्, यदपेक्षया, श्रीभूदार एव, किमतः, सुमते लभस्व ।
केदारं आकलितमुक्तिमहौषधीनां, पादारविन्दभजनं परमेश्वरस्य । ७३॥
आशापाशक्लेश-दुर्वासनादि भेदोद्युक्तै:, दिव्यगन्धैरमन्दैः ।
आशाशाटीकस्य पादारविन्दं, चेतःपेटीं वासितां मे तनोतु ॥ ७४॥
कल्याणिनं, सरसचित्रगतिं, सवेगं, सर्वेङ्गितज्ञं, अनघं, ध्रुवलक्षणाढ्यम् ।
चेतस्तुरङ्गमधिरुह्य चर, स्मरारे, नेतः, समस्तजगतां वृषभाधिरूढ ॥ ७५॥
भक्ति:, महेशपदपुष्करमावसन्ती, कादम्बिनीव कुरुते परितोषवर्षम् ।
सम्पूरितो भवति, यस्य मनस्त्तटाक:, तज्जन्मसस्यमखिलं सफलं च नाऽन्यत् ॥ ७६॥
बुद्धिःस्थिरा भवितुं, ईश्वरपादपद्मसक्ता, वधू: विरहिणीव, सदा स्मरन्ती ।
सद्भावनास्मरणदर्शनकीर्तनादि, सम्मोहितेव, शिवमन्त्रजपेन विन्ते ॥ ७७॥
सदुपचारविधिषु अनुबोधितां, सविनयां, सुहृदं, सदुपाश्रिताम् ।
मम समुद्धर बुद्धिमिमां, प्रभो, वरगुणेन नवोढवधूमिव ॥ ७८॥
नित्यं, योगिमनः सरोजदलसञ्चारक्षम:, त्वत्क्रमः,
शम्भो, तेन कथं, कठोरयमराड्वक्षःकवाटक्षतिः ।
अत्यन्तं मृदुलं त्वदङ्घ्रियुगलं, हा मे मनश्चिन्तयति,
एतत् लोचनगोचरं कुरु, विभो, हस्तेन संवाहये ॥ ७९॥
एष्यत्येष जनिं, मनोऽस्य कठिनं, तस्मिन्नटानि इति,
मद्रक्षायै, गिरिसीम्नि कोमलपदन्यासः पुराभ्यासितः ।
नोचेत् दिव्यगृहान्तरेषु, सुमनस्तल्पेषु, वेद्यादिषु,
प्रायः सत्सु, शिलातलेषु नटनं, शम्भो किमर्थं तव ॥ ८०॥
कञ्चित्कालमुमामहेश, भवतः पादारविन्दार्चनैः,
कञ्चिद्ध्यानसमाधिभिश्च नतिभिः, कञ्चित्कथाकर्णनैः ।
कञ्चित् कञ्चिदवेक्षनैश्च, नुतिभिः, कञ्चिद्दशामीदृशीं,
यः प्राप्नोति, मुदा त्वदर्पितमना:, जीवन् स मुक्तः खलु ॥ ८१ ॥
बाणत्वं, वृषभत्वं, अर्धवपुषा भार्यात्वं, आर्यापते,
घोणित्वं, सखिता, मृदङ्गवहता च, इत्यादि रूपं दधौ ।
त्वत्पादे नयनार्पणं च कृतवान्, त्वद्देहभागो हरिः,
पूज्यात्पूज्यतरः, स एव हि, न चेत्, को वा तदान्योऽधिकः ॥ ८२॥
जननमृतियुतानां, सेवया देवतानां, न भवति सुखलेशः, संशयो नास्ति तत्र ।
अजनिममृतरूपं, साम्बमीशं भजन्ते, य इह, परमसौख्यं ते हि धन्या: लभन्ते ॥ ८३॥
शिव, तव परिचर्या,सन्निधानाय गौर्या, भव, मम गुणधुर्यां, बुद्धिकन्यां प्रदास्ये ।
सकलभुवनबन्धो, सच्चिदानन्दसिन्धो, सदय, हृदयगेहे, सर्वदा संवस त्वम् ॥ ८४ ॥
जलधिमथनदक्ष: नैव, पातालभेदी न च, वनमृगयायां नैव लुब्धः प्रवीणः ।
अशनकुसुमभूषावस्त्रमुख्यां सपर्यां, कथय, कथमहं ते कल्पयानि, इन्दुमौले ॥ ८५॥
पूजाद्रव्यसमृद्धयो विरचिताः, पूजां कथं कुर्महे,
पक्षित्वं न च वा, किटित्वमपि न प्राप्तं, मया दुर्लभम् ।
जाने मस्तकमङ्घ्रिपल्लवं, उमाजाने, न तेऽहं, विभो,
न ज्ञातं हि, पितामहेन हरिणा, तत्वेन तद्रूपिणा ॥ ८६॥
अशनं गरलं, फणी कलाप:, वसनं चर्म च, वाहनं महोक्षः ।
मम दास्यसि किं, किमस्ति शम्भो, तव पादाम्बुजभक्तिमेव देहि ॥ ८७॥
यदा कृताम्भोनिधिसेतुबन्धनः, करस्थलाधः, कृतपर्वताधिपः ।
भवानि ते, लङ्घितपद्मसम्भवः, तदा शिव, अर्चास्तवभावनक्षमः ॥ ८८॥
नतिभिर्नुतिभि:, त्वमीश, पूजा-विधिभिर्ध्यानसमाधिभि:, न तुष्टः ।
धनुषा मुसलेन चाश्मभिर्वा, वद ते प्रीतिकरं, तथा करोमि ॥ ८९॥
वचसा चरितं वदामि शम्भो:, अहमुद्योगविधासु, ते, अप्रसक्तः ।
मनसाकृतिमीश्वरस्य सेवे, शिरसा चैव सदाशिवं नमामि ॥ ९०॥
आद्याऽविद्या हृद्गता निर्गतासीत्, विद्या हृद्या हृद्गता त्वत्प्रसादात् ।
सेवे नित्यं, श्रीकरं त्वत्पदाब्जं, भावे, मुक्तेर्भाजनं, राजमौले ॥ ९१॥
दूरीकृतानि, दुरितानि दुरक्षराणि, दौर्भाग्यदुःख-दुरहङ्कृतिदुर्वचांसि ।
सारं त्वदीयचरितं, नितरां पिबन्तं, गौरीश, मामिह समुद्धर सत्कटाक्षैः ॥ ९२ ॥
सोमकलाधरमौलौ, कोमलघनकन्धरे, महामहसि ।
स्वामिनि, गिरिजानाथे, मामकहृदयं निरन्तरं रमताम् ॥ ९३ ॥
सा रसना, ते नयने, तावेव करौ, स एव कृतकृत्यः ।
या ये यौ यो, भर्गं, वदति ईक्षेते सदार्चतः स्मरति ॥ ९४॥
अतिमृदुलौ मम चरणौ, अतिकठिनं ते मन:, भवानीश ।
इति विचिकित्सां सन्त्यज, शिव, कथमासीत्, गिरौ तथा प्रवेशः ॥ ९५॥
धैर्याङ्कुशेन निभृतं, रभसादाकृष्य भक्तिशृङ्खलया ।
पुरहर चरणालाने, हृदयमदेभं, बधान चिद्यन्त्रैः ॥ ९६॥
प्रचरत्यभितः प्रगल्भवृत्त्या, मदवानेष मनः करी गरीयान् ।
परिगृह्य नयेन, भक्तिरज्ज्वा, परम, स्थाणुपदं दृढं नयामुम् ॥ ९७॥
सर्वालङ्कारयुक्तां, सरलपदयुतां साधुवृत्तां सुवर्णां,
सद्भिःसंस्तूयमानां, सरसगुणयुतां, लक्षितां लक्षणाढ्याम् ।
उद्यद्भूषाविशेषां, उपगतविनयां द्योतमानार्थरेखां,
कल्याणीं, देव, गौरीप्रिय, मम कविताकन्यकां त्वं गृहाण ॥ ९८॥
इदं ते युक्तं वा, परमशिव, कारुण्यजलधे,
गतौ तिर्यग्रूपं, तव पदशिरोदर्शनधिया ।
हरिब्रह्माणौ तौ, दिवि भुवि चरन्तौ श्रमयुतौ,
कथं शम्भो स्वामिन्, कथय, मम वेद्योऽसि पुरतः ॥ ९९॥
स्तोत्रेणालमहं, प्रवच्मि न मृषा, देवा: विरिञ्चादय:
स्तुत्यानां गणनाप्रसङ्गसमये, त्वामग्रगण्यं विदुः ।
माहात्म्याग्रविचारणप्रकरणे, धानातुषस्तोमवत्
धूता:, त्वां विदुरुत्तमोत्तमफलं, शम्भो, भवत्सेवकाः ॥ १००॥
One reply on “சிவானந்தலஹரி 68 முதல் 100 ஸ்லோகங்கள் ஒலிப்பதிவு”
Many thanks for your time, efforts,Service and guidance to learners like me with no Sanskrit wisdom.
Regards